ថ្មីៗនេះ រឿងរ៉ាវដ៏អស់ទាស់មួយ បានធ្វើឲ្យមហាជននៅលើបណ្តាញសង្គម ភ្ញាក់ផ្អើល និងហួសចិត្តយ៉ាងខ្លាំង ព្រោះតែមិននឹកស្មានថា ម្ចាស់ផ្ទះ និងលោកចោរ បានជួបគ្នាដោយចៃដន្យ នៅកន្លែងទិញ និងលក់ម៉ូទ័រតែមួយ បង្កការភ្ញាក់ផ្អើលទាំងព្រឹកតែម្តង។
នេះបើតាមស្រីស្អាតជាម្ចាស់ផ្ទះ ដែលគេស្គាល់ថាជាតារាចម្រៀងអ្នកនាង ផាត់ សុធារ៉ា កាលពីថ្ងៃទី១៦ ខែកក្កដា ឆ្នាំ២០២៣ បានបង្ហោះរឿងរ៉ាវដ៏ចៃដន្យបំផុតនេះ ឲ្យបងប្អូននៅក្នុងបណ្តាញសង្គមបានដឹងយ៉ាងដូច្នេះថា៖ «រឿងមិននឹកស្មានដល់បងប្អូន ចោរចូលគាស់កន្លែងខ្ញុំលក់កង់ឡានយប់មិញ លួចម៉ូទ័រអស់2 និងស្ពិកឃ័រខ្ញុំមួយគ្រឿងទៀត ព្រឹកឡើងគេយកមកលក់នៅម្ដុំផ្សារតូច ក៏ស្រាប់តែវាយកមកលក់ចំពេលខ្ញុំមករកទិញម៉ូទ័រថ្មីដែរ»។
អ្នកនាង ផាត់ សុធារ៉ា ក៏បានឲ្យដឹងទាំងហួសចិត្តថា នៅពេលមករកទិញម៉ូទ័រថ្មី ហើយក៏បានស្គាល់ច្បាស់របស់ទ្រព្យខ្លួន អ្នកនាងក៏បានសួរទៅកាន់ប្តីប្រពន្ធដែលបានយកមកលក់ ប៉ុន្តែ ពួកគេបានឆ្លើយប្រាប់ថា ទិញតពីគេប៉ុណ្ណោះ ដែលធ្វើឲ្យនាងលឺហើយ និយាយមិនចេញនោះទេ។
ទោះជាយ៉ាងណា អ្នកនាងក៏បានបញ្ជាក់ថា ស្ពិកឃ័រមិនទាន់រកឃើញនៅឡើយទេ ប៉ុន្តែ បានទំនាក់ទំនងទៅកាន់សមត្ថកិច្ចមូលដ្ឋាន ដើម្បីចុះមកជួយអន្តរាគមន៍សួរនាំ និងនាំខ្លួនជនសង្ស័យប្រុសស្រីទាំងពីរទៅប៉ុស្តិ៍ផងដែរ។ ក្រោយពីបានឃើញការបង្ហោះមួយនេះ មហាជនអ្នកលេងបណ្តាញសង្គមជាច្រើន ក៏បានចូលទៅបញ្ចេញមតិហួសចិត្តបែបលេងសើចថា៖ «ចៃដន្យពេកហើយ, និស្ស័យច្បាស់ក្រឡែត វិលចុះឡើងជួបគ្នាដដែល ហាសហា,… »៕ រក្សាសិទ្ធិដោយ៖ លឹម ហុង
