យោងតាម BBC និងប្រព័ន្ធផ្សព្វផ្សាយបរទេសផ្សេងទៀត បានឲ្យដឹងថា កាលពីថ្ងៃទី១៧ ខែកក្កដា ឆ្នាំ២០២៣ ទីភ្នាក់ងារអវកាសអូស្ត្រាលីបានបង្ហោះរូបថតមួយនៅលើទំព័រ Twitter របស់ពួកគេ ហើយទទួលបានការចាប់អារម្មណ៍យ៉ាងខ្លាំង ពីសហគមន៍បណ្តាញសង្គម។
នៅក្នុងការបង្ហោះ ទីភ្នាក់ងារបាននិយាយថា ខ្លួនបានរកឃើញវត្ថុលោហៈដ៏អាថ៌កំបាំងមួយនៅលើឆ្នេរខ្សាច់ក្បែរ Jurien Bay ភាគខាងលិចនៃប្រទេសអូស្ត្រាលី។ តាមរូបភាពដែលបានបង្ហោះនោះ បានបង្ហាញឲ្យឃើញ វត្ថុមួយនេះធ្វើពីដែក និងមានរាងស៊ីឡាំងដែលមានទំហំធំ។
យោងតាមសេចក្តីរាយការណ៍ វត្ថុធំនេះត្រូវបានរកឃើញដោយអ្នកស្រុកនៅលើឆ្នេរ Green Head ហើយពួកគេបានជូនដំណឹងដល់អាជ្ញាធរក្នុងតំបន់។ ដោយសារតែរូបរាងដ៏ពិសេសរបស់វា អ្នកខ្លះសង្ស័យថា នេះអាចជាផ្នែកមួយនៃយន្តហោះដឹកអ្នកដំណើរ MH370 របស់ម៉ាឡេស៊ី ដែលបានបាត់ខ្លួនដ៏អាថ៌កំបាំងកាលពីខែមីនា ឆ្នាំ២០១៤។
ទន្ទឹមនឹងនេះ អាជ្ញាធរអូស្ត្រាលីភាគខាងលិច បាននិយាយថា ពួកគេនឹងចាត់ទុកវត្ថុនេះជាវត្ថុគ្រោះថ្នាក់ “រហូតដល់ប្រភពដើមរបស់វាត្រូវបានកំណត់” ហើយបាននិយាយថា វាមិនមែនជាបំណែកនៃយន្តហោះនោះទេ។
BBC ក៏បានរាយការណ៍ផងដែរថា អ្នកជំនាញផ្នែកអវកាស Geoffrey Thomas ជឿជាក់ថា វត្ថុនោះអាចជាធុងប្រេងគ្រាប់រ៉ុក្កែត ដែលត្រូវបានបាញ់បង្ហោះទៅកាន់ទីអវកាសកាលពីឆ្នាំមុន ហើយបានធ្លាក់ចូលទៅក្នុងមហាសមុទ្រឥណ្ឌាដោយចៃដន្យ។ អ្នកជំនាញបានសន្និដ្ឋានថា ប្រសិនបើធុងសាំងពិត វាអាចជាកាំជ្រួចដែលមកពីប្រទេសឥណ្ឌា ហើយអាចមានផ្ទុកសារធាតុពុល។
ទាក់ទងនឹងមន្ទិលសង្ស័យថា អាចជារបស់ជើងហោះហើរ MH370 លោក Thomas ក៏ជឿថា វត្ថុនេះមិនមែនជាកម្មសិទ្ធិរបស់ផ្នែកណាមួយនៃយន្តហោះ Boeing 777 ដែលបាត់ខ្លួននោះទេ។ លោកគិតថា វាមានរយ:ពេល ៩ ឆ្នាំកន្លះហើយ ចាប់តាំងពីយន្តហោះនេះបាត់ខ្លួន ដូច្នេះវានឹងមានសញ្ញានៃការសឹករេចរិល និងរហែកជាច្រើនទៀត សម្រាប់ការខូចខាត។
ទោះជាយ៉ាងណា ជើងហោះហើរ MH370 ដែលជាកម្មសិទ្ធិរបស់ក្រុមហ៊ុន Malaysia Airlines នៅតែជាយន្តហោះធ្លាក់ដែលមានអាថ៌កំបាំងជាច្រើន។ គេដឹងថា ជើងហោះហើរនេះដឹកមនុស្ស ២៣៩នាក់ បានបាត់ខ្លួនដោយគ្មានដាន ដែលមិនដល់១ម៉ោង បន្ទាប់ហោះចេញពីទីក្រុងគូឡាឡាំពួ (ម៉ាឡេស៊ី) កាលពីថ្ងៃទី៨ ខែមីនា ឆ្នាំ ២០១៤។
បើទោះជាមានការខិតខំប្រឹងប្រែងស្វែងរក និងជួយសង្គ្រោះជាច្រើនខែក៏ដោយ ក៏គ្មានបំណែកណាមួយនៃយន្តហោះនេះមិនត្រូវបានរកឃើញនោះទេ ក្នុងរយៈពេលជាង៩ឆ្នាំមកនេះ ហើយវាក្លាយជាសំណួរដែលមិនអាចដោះស្រាយបាន៕ រក្សាសិទ្ធិដោយ៖ លឹម ហុង
