ករណីបុគ្គលលោភលន់ ដែលសុខៗស្រាប់តែ «រំលោភ» យកដីសាធារណៈធ្វើជាកម្មសិទ្ធិរបស់ខ្លួន ជាពិសេសទៅលើ «ផ្លូវដើររួម» ក្នុងស្រុកភូមិ ដែលមានតាំងពីដូនតាមក គឺតែងតែកើតមានជារឿយៗ ដែលឃើញហើយពិតជាគួរឲ្យស្អប់យ៉ាងខ្លាំង។
ជាក់ស្តែង ដូចករណីថ្មីៗនេះជាដើម ពិតជាគួរឲ្យហួសចិត្តខ្លាំងណាស់ នៅពេលដែលបានឃើញបុគ្គលលោភលន់ម្នាក់ ស្រាប់តែសុខៗ បានភ្ជួរផ្លូវដើររួម ដែលប្រជាពលរដ្ឋធ្វើដំណើរចេញចូលរកស៊ីទទួលទានរៀងរាល់ថ្ងៃ ដើម្បី «ពង្រីក» ដីស្រែរបស់ខ្លួនយ៉ាងរំភើយ។
នេះបើតាមគណនីហ្វេសប៊ុកឈ្មោះ Pov Mylife បានបង្ហោះឲ្យដឹងបែបនេះថា៖ «ថ្ងៃទី17 ខែ07 ឆ្នាំ2023 នៅភូមិគ្រាំងគរ ឃុំត្រាំកក់ ស្រុកត្រាំកក់ ខេត្តតាកែវ បងប្អូនប្រជាពលរដ្ឋ រឺក្មេងៗដែលធ្លាប់ជិះកាត់មុខផ្ទះខ្ញុំ ទៅផ្សាត្រាំកក់ ទៅរៀននិងទៅធ្វើការ រឺប្រកបអាជីវកម្មរាល់ដង ពេលនេះលែងមានផ្លូវជិះស្រួលដូចមុនហើយ ព្រោះតែសត្វមនុស្សខ្វះខួរខ្វះ សតិបាតសង្គមមួយសំបុក បានភ្ជួរផ្លូវយកទៅដាំស្រូវ មនុស្សនេះមិនដែលចេះជួយអ្វីដល់សង្គមសោះ ចេះតែនាំរឿង និងបំផ្លាញអ្នកដទៃ»។
បើតាមស្រ្តីជាអ្នកភូមិម្នាក់ ដែលបានថតវីដេអូ បង្ហាញលទ្ធផលក្រោយពេលភ្ជួររួច បានប្រាប់ឲ្យដឹងថា ផ្លូវដើររួមនេះដែលមានទំហំទទឹង ៤-៥ ម៉ែត្រ ត្រូវបានប្រជាពលរដ្ឋចេញចូលក្នុងភូមិ សហការគ្នាចេញលុយចាក់ក្រាលក្រួសក្រហម ដើម្បីបានធ្វើដំណើរស្រួល ដោយមិនមានមុខម្ចាស់ដីស្រែជាប់ផ្លូវនេះ ជួយចេញធ្វើនោះឡើយ។ ប៉ុន្តែ អ្វីដែលមិននឹកស្មានដល់នោះ ស្រាប់តែថ្មីៗនេះ បុគ្គលដ៏គ្មានញាតិរាប់រកនេះ បែរមកភ្ជួរផ្លូវ ធ្វើឲ្យគ្រប់គ្នាក្នុងភូមិស្រឡាំងកាំង និងហួសចិត្តខ្លាំងតែម្តង។
ជាមួយទង្វើដ៏ហួសហេតុនេះ ក្នុងនាមជាប្រជាពលរដ្ឋម្នាក់ក្នុងភូមិ គាត់ក៏សូមស្នើដល់អាជ្ញាធរមូលដ្ឋាន មេត្តាជួយអន្តរាគមន៍ ដើម្បីសម្រួលសម្រាប់ការធ្វើដំណើរចេញចូលដូចធម្មតាវិញផងដែរ ព្រោះពួកគាត់ពុំមានផ្លូវណាផ្សេង ពីផ្លូវនេះ ដើម្បីធ្វើដំណើរនោះទេ៕ រក្សាសិទ្ធិដោយ៖ លឹម ហុង
