សៀមរាប៖ នៅថ្ងៃទី២០ ខែកក្កដា ឆ្នាំ២០២៣ សាលាបារាំងចុងបូព៌ា (EFEO) ដែលជាដៃគូកិច្ចសហប្រតិបត្តិការជាមួយអាជ្ញាធរជាតិអប្សរា ដើម្បីបំពេញការងារអភិរក្ស និងស្រាវជ្រាវនៅរមណីយដ្ឋានអង្គរ បានប្រគល់វត្ថុបុរាណចំនួន៣១កេស បដិមាព្រះពុទ្ធចំនួន០១ និងបំណែកសន្លឹកសីមាចំនួន០១ ជូនអាជ្ញាធរជាតិអប្សរា ដើម្បីរក្សាទុកបន្ទាប់ពីបានសិក្សាស្រាវជ្រាវ និងរៀបចំបញ្ជីសារពើភណ្ឌរួចរាល់។
![](https://cen.com.kh/wp-content/uploads/2023/07/photo_2023-07-22_10-42-20-3-1024x683.jpg)
លោក ទិន ទីណា ជាអនុប្រធាននាយកដ្ឋានស្រាវជ្រាវ បណ្តុះបណ្តាល និងផ្សព្វផ្សាយ បានឱ្យដឹងថា វត្ថុបុរាណទាំងអស់ដែលវិទ្យាស្ថានសាលាបារាំងចុងបូព៌ា (EFEO) ប្រគល់មកអាជ្ញាធរជាតិអប្សរា បានរកឃើញដោយការធ្វើកំណាយនៅតាមការដ្ឋានស្រាវជ្រាវមួយចំនួននៅក្នុងរមណីយដ្ឋានអង្គរ ដូចជា គោកតាសៀម បឹងដូនប៉ា ប្រាសាទអ៊ុងម៉ុង ប្រាសាទបាភួន និងប្រាសាទព្រៃមន្ទីរ។ លោកបានបញ្ជាក់ទៀតថា វត្ថុទាំងនេះរួមមាន ទី១ កុលាលភាជន៍មកពីប្រាសាទបាភួនចំនួន២៧កេស ដែលក្នុងនោះ មានប្រភេទកុលាលភាជន៍រឹង កុលាលភាជន៍ផុយជារបស់ខ្មែរ និងកុលាលភាជន៍ចិន សៀម យួនជាដើម។ ទី២ ថ្មភក់ចំនួន២កេស ដែលមកពីគោកតាសៀម។ ទី៣ បំណែកថ្មភក់មានក្បាច់លម្អខ្លះៗចំនួន២កេស មកពីបឹងដូនប៉ា និងគោកតាសៀម ព្រមទាំងប្រាសាទអ៊ុងម៉ុង។ ទី៤ បដិមាព្រះពុទ្ធចំនួន០១ មកពីប្រាសាទអ៊ុងម៉ុង និងបំណែកសន្លឹកសីមាចំនួន០១ មកពីប្រាសាទព្រៃមន្ទីរ។
![](https://cen.com.kh/wp-content/uploads/2023/07/photo_2023-07-22_10-42-20-2-1024x683.jpg)
លោក ទិន ទីណា បន្តឱ្យដឹងទៀតថា ក្រោយពីទទួលបានវត្ថុទាំងអស់នេះ ក្រុមអ្នកជំនាញរបស់អាជ្ញាធរជាតិអប្សរានឹងរៀបចំទុកដាក់អភិរក្សតាមលក្ខណៈបច្ចេកទេស ហើយនៅថ្ងៃខាងនេះ អាជ្ញាធរជាតិនឹងរៀបចំពិព័រណ៌មិនអចិន្ត្រៃយ៍នៅក្នុងសារមន្ទីរព្រះនរោត្តមសីហនុ-អង្គរ ដើម្បីតាំងបង្ហាញឱ្យសាធារណជនជាតិ និងអន្តរជាតិបានទស្សនា សិក្សាស្វែងយល់ពីវត្ថុសិល្បៈខ្មែរ។
សូមរំឮកដែរថា នេះជាលើកទី៣ហើយ ដែលវិទ្យាស្ថានសាលាបារាំងចុងបូព៌ា (EFEO) បានប្រគល់បុរាណវត្ថុដែលបានមកពីកំណាយនៅតាមការដ្ឋានស្រាវជ្រាវ និងការដ្ឋានជួសជុលប្រាសាទមួយចំនួននៅក្នុងរមណីយដ្ឋានអង្គរមកដល់អាជ្ញាធរជាតិអប្សរា៕ រក្សាសិទ្ធដោយ ៖ សុទ្ធលី
![](https://cen.com.kh/wp-content/uploads/2023/07/photo_2023-07-22_10-42-20-4-1024x683.jpg)
![](https://cen.com.kh/wp-content/uploads/2023/07/photo_2023-07-22_10-42-20-5-1024x683.jpg)
![](https://cen.com.kh/wp-content/uploads/2023/07/photo_2023-07-22_10-42-20-6-1024x683.jpg)
![](https://cen.com.kh/wp-content/uploads/2023/07/photo_2023-07-22_10-42-21-2-1024x683.jpg)
![](https://cen.com.kh/wp-content/uploads/2023/07/photo_2023-07-22_10-42-21-3.jpg)
![](https://cen.com.kh/wp-content/uploads/2023/07/photo_2023-07-22_10-42-21-4.jpg)
![](https://cen.com.kh/wp-content/uploads/2023/07/photo_2023-07-22_10-42-21-5.jpg)
![](https://cen.com.kh/wp-content/uploads/2023/07/photo_2023-07-22_10-42-21-6.jpg)
![](https://cen.com.kh/wp-content/uploads/2023/07/photo_2023-07-22_10-42-21-7.jpg)
![](https://cen.com.kh/wp-content/uploads/2023/07/photo_2023-07-22_10-42-21-8.jpg)
![](https://cen.com.kh/wp-content/uploads/2023/07/photo_2023-07-22_10-42-21-9.jpg)
![](https://cen.com.kh/wp-content/uploads/2023/07/photo_2023-07-22_10-42-21-10.jpg)
![](https://cen.com.kh/wp-content/uploads/2023/07/photo_2023-07-22_10-42-21-11.jpg)
![](https://cen.com.kh/wp-content/uploads/2023/07/photo_2023-07-22_10-42-21-12.jpg)
![](https://cen.com.kh/wp-content/uploads/2023/07/photo_2023-07-22_10-42-21-13.jpg)
![](https://cen.com.kh/wp-content/uploads/2023/07/photo_2023-07-22_10-42-21-14.jpg)
![](https://cen.com.kh/wp-content/uploads/2023/07/photo_2023-07-22_10-42-21-1024x683.jpg)