មនុស្សល្អម្នាក់ មិនមែនស្ថិតលើរូបរាង និងទ្រព្យសម្បតិ្តនោះទេ ប៉ុន្តែស្ថិតនៅលើចិត្ត។ មនុស្សល្អ មិនប្រាកដថាមានរូបរាងស្អាតចំណែកមនុស្សស្អាត ក៏មិនប្រាកដថាមានបេះដូងល្អ។ បុរសជនជាតិថៃម្នាក់នេះគឺជាឧទាហរណ៍បញ្ជាក់យ៉ាងច្បាស់ថា មនុស្សល្អមិនស្ថិតលើសម្បកក្រៅនោះទេ។
បុរសអនាថាជនជាតិថៃម្នាក់ឈ្មោះ Waralop អាយុ ៤៤ឆ្នាំ បានធ្វើរឿងដ៏គួរឲ្យភ្ញាក់ផ្អើល និង គួរឲ្យសរសើរមួយ គឺនៅពេលគាត់រើសបានកាបូបលុយ ដែលមានលុយចំនួន ២០.០០០បាត (៦២៣ដុល្លាអាមេរិច) ព្រមទាំងមានកាត់ធនាគារក្នុងនោះផងដែរ។
បុរសចិត្តល្អកម្ររកបាននេះ មានលុយតែប្រមាណ ៩បាតប៉ុណ្ណោះ ក្នុងហោប៉ៅរបស់គាត់ ហើយនៅពេលគាត់រើសបានកាបូបលុយដែលមានលុយយ៉ាងច្រើន គាត់បែរជាដើរសំដៅទៅកាន់ប៉ុស្តិ៍ប៉ូលិស ដើម្បីឲ្យប៉ូលិសជួយស្វែងរកម្ចាស់របស់វាទៅវិញ។ នេះជាគំរូល្អ ដែលយើងគ្រប់ៗគ្នាគួរយកតម្រាប់តាម។
អំពើល្អ និងភាពស្មោះត្រង់របស់គាត់ ទទួលបានការតបស្នងមកវិញ គួរឲ្យភ្ញាក់ផ្អើលផងដែរ ដោយសារតែម្ចាស់កាបូប ឈ្មោះ Nitty Pongkriangyos វ័យ ៣០ឆ្នាំ បានសម្រេចផ្តល់ការងារមួយនៅក្នុងរោងចក្ររបស់គាត់ ស្ថិតក្នុងទីក្រុងបាងកក ទៅដល់បុរសស្មោះត្រង់ម្នាក់នោះ។
បុរសជាម្ចាស់កាបូបបាននិយាយថា “ខ្ញុំមានការភ្ញាក់ផ្អើលយ៉ាងខ្លាំង នៅពេលប៉ូលិសបានប្រាប់ខ្ញុំថា ពួកគេមានកាបូបរបស់ខ្ញុំ ខណៈដែលខ្ញុំមិនទាំងដឹងសោះថា ខ្ញុំបានបាត់វា” ដំបូងឡើយ ម្ចាស់កាបូប ដែលជាអ្នកជំនួញបានផ្តល់ប្រាក់រង្វាន់ដល់ បុរសគ្មានផ្ទះសម្បែងនោះចំនួន ២.០០០បាត ប៉ុន្តែក្រោយមកក៏បានសម្រេចចិត្ត ផ្តល់ការងារថ្មីដល់គាត់វិញ ដោយឲ្យកន្លែងស្នាក់នៅ
និងប្រាក់ខែចំនួន ១១.០០០បាត (៣៤៣ដុល្លាអាមេរិច)។
ចំណែកបុរសក្រីក្រម្នាក់នោះ បាននិយាយថា គាត់បានមើលឃើញកាបូបលុយរបស់លោក Nitty ពីចំងាយ នៅពេលគាត់កំពុងដេកនៅស្ថានីយ៍រថភ្លើងក្រោមដី ហើយគាត់ព្យាយាមស្វែងរកម្ចាស់ កាបូបនៅកន្លែងនោះ ប៉ុន្តែគាត់រកមិនឃើញសោះ ទើបគាត់ សម្រេចចិត្តយកទៅឲ្យប៉ូលិស។
នេះជាមេរៀនជីវិតដ៏ល្អដែលយើងគ្រប់គ្នាគួរយកគំរូតាម។ ការធ្វើអំពើល្អ ប្រៀបដូចជាការវិនិយោគអញ្ជឹងដែរ ថ្ងៃណាមួយអ្នកនឹងទទួលបានផ្លែផ្កាពីវាវិញជាមិនខាន៕ សុភ័ក្ត្រ
ប្រភព៖ Trendszilla
