ទង្វើដ៏ល្អរបស់នារីជនជាតិចិនម្នាក់ ដែលស្ថិតក្នុងឈុតសម្លៀកបំពាក់ជា cosplayer ប្រញាប់ប្រញាល់ចុះចេញពីរថយន្តរបស់នាង ដើម្បីជួយយុវជនម្នាក់ ដែលដួលសន្លប់នៅលើផ្លូវទាំងកណ្តាលមេឃភ្លៀង បានឆក់យកបេះដូងអ្នកប្រើប្រាស់អ៊ីនធឺណេតរាប់លាននាក់។
យោងតាម SCMP បានបញ្ចេញឲ្យដឹងថា នារីក្នុងវីដេអូឃ្លីបដែលល្បីពេញបណ្ដាញសង្គមនោះ ត្រូវបានគេស្គាល់មានឈ្មោះ Zhang Xinyu ជានិស្សិតដែលទើបបញ្ចប់ការសិក្សាផ្នែកវេជ្ជសាស្ត្រ ពីសាកលវិទ្យាល័យ Suzhou។ ខណៈពេលដែលកំពុងសិក្សាផ្នែកវេជ្ជសាស្ត្រ Xinyu មានចំណង់ចំណូលចិត្តមួយទៀត គឺការលេងឈុតសម្លៀកបំពាក់បន្ទាប់ ពីតួអង្គក្នុងរឿងកំប្លែងជប៉ុន។
នៅថ្ងៃកើតហេតុ (២១ ខែកក្កដា) Xinyu កំពុងធ្វើដំណើរទៅកាន់ព្រឹត្តិការណ៍ Bilibili World Comic Con ។ នៅពេលនោះ យុវតីរូបនេះបានឃើញយុវជនម្នាក់ ដួលសន្លប់ក្រោមដំណក់ទឹកភ្លៀង នៅខាងក្រៅមជ្ឈមណ្ឌលសន្និបាត និងពិព័រណ៍ជាតិសៀងហៃ។
តែបើទោះបីជាមេឃកំពុងធ្លាក់ភ្លៀង ផ្លូវសើម ជោគជាំដោយភក់យ៉ាងណាក៏ដោយ តែនារីវ័យក្មេងដ៏ស្រស់ស្អាតម្នាក់នេះ ដែលស្ថិតក្នុងឈុតដូចព្រះនាង មិនស្ទាក់ស្ទើរ ក្នុងការប្រញាប់ប្រញាល់ចុះពីឡាន ដើម្បីជួយបុរសវ័យក្មេងដែលកំពុងត្រូវការការជួយសង្គ្រោះជីវិតនោះទេ។
វីដេអូដែលថតដោយមិត្តរបស់នាង និងត្រូវបានចែករំលែកនៅលើគេហទំព័រ Douyin ទទួលបានការចូលមើលជាង ៧ លានដង។ វីដេអូឃ្លីបបានបង្ហាញ Xinyu លុតជង្គង់ជួយបុរសរងគ្រោះ បើទោះបីជាសម្លៀកបំពាក់ព្រះនាងដ៏ស្រស់ស្អាតរបស់នាង ត្រូវបានប្រឡាក់ដោយទឹកភ្លៀងក៏ដោយ។ ក្នុងការជួយសង្គ្រោះបឋមទៅដល់យុវជននោះ Xinyu ត្រូវបានលឺនិយាយថា «ដកដង្ហើមឲ្យវែងៗ កុំព្យាយាមកម្រើកក្បាល បើអ្នកមានអារម្មណ៍វិលមុខ សូមច្របាច់ដៃរបស់ខ្ញុំ»។
បន្ទាប់មក នាងបានជួយហៅរថយន្តសង្គ្រោះ មកដឹកបុរសនោះ ទៅសង្គ្រោះបន្តនៅមន្ទីរពេទ្យផងដែរ។
Xinyu បាននិយាយនៅលើទំព័រផ្ទាល់ខ្លួនរបស់នាងថា បន្ទាប់ពីទទួលបានការសង្គ្រោះបឋម សុខភាពរបស់យុវជនរូបនេះមានស្ថេរភាព។ គេដឹងថា បុរសម្នាក់នេះមានជាតិស្ករក្នុងឈាមទាប នាំឱ្យដួលសន្លប់។
ចែករំលែកជាមួយទូរទស្សន៍ Suzhou យុវជនរូបនោះ បាននិយាយដោយសប្បាយរីករាយថា «ខ្ញុំសប្បាយចិត្តណាស់ ដែលត្រូវបានជួយសង្គ្រោះដោយបងស្រីដ៏ស្រស់ស្អាតម្នាក់»។
ជាមួយគ្នានេះផងដែរ ឃើញថា មានអ្នកនិយមលេងអ៊ីនធឺណេតមួយចំនួនធំ បានបញ្ចេញអារម្មណ៍ចេញពីបេះដូង កោតសរសើរនូវទឹកចិត្ត និងភាពក្លាហានរបស់នារីវ័យក្មេងរូបនេះជាខ្លាំង។ ឆ្លើយតបនឹងការមតិលើកសរសើរ Xinyu បាននិយាយថា នាងគ្រាន់តែធ្វើអ្វីដែលគ្រូពេទ្យនឹងធ្វើប៉ុណ្ណោះ។ នាងក៏បានបន្ថែមថា «Cosplay គឺជាចំណង់ចំណូលចិត្តរបស់ខ្ញុំ ការសង្គ្រោះជីវិត គឺជាសភាវគតិរបស់ខ្ញុំ»៕ រក្សាសិទ្ធិដោយ៖ លឹម ហុង
