Friday, March 29, 2024

ទំនាក់ទំនង : 0716140005

Address : #16 (Borey New World) St. 6A sk . Phnom Penh Thmey kh. Sen Sok ct., Phnom Penh 120913 Office: +85523232725 Tel: 017 93 61 91

សម្តេច​តេ​ជោ ហ៊ុន សែន អំពាវនាវ​ដល់​សមាជិក​របស់​គណបក្ស​សង្គ្រោះ​ជាតិ តុលា​ការមិន​ហាមឃាត់ អាច​ទៅ​ចូលរួម​ជាមួយ​គណបក្ស​ប្រជាជន​កម្ពុជា និង​គណបក្ស​ដទៃ ឬ​ទៅ​បង្កើត​គណបក្ស​ដោយ​ខ្លួនឯងបាន​

spot_img

ភ្នំពេញ​៖​ក្នុង​សេចក្ដីថ្លែងការណ៍​បន្ទាន់​សម្តេច​តេ​ជោ ហ៊ុន សែន​៖ គាំទ្រ​ការសម្រេច​របស់​តុលាការ​កំពូល​។ សម្តេច​បាន​អំពាវនាវ​ពលរដ្ឋ​រក្សា​ភាពស្ងប់ស្ងាត់ និង​ការពារ​លទ្ធិប្រជាធិបតេយ្យ សេរី​ពហុបក្ស​នៅ​កម្ពុជា​។ តាមរយៈ​សេចក្តីថ្លែងការណ៍​ផ្ទាល់មាត់​រយៈពេល​ជិត​២០​នាទី នៅ​យប់​ថ្ងៃទី​១៦ ខែវិច្ឆិកា ឆ្នាំ​២០១៧​នេះ ក្រោយ​តុលាការ​កំពូល​កាត់ទោស​រំលាយ​គណបក្ស​សង្គ្រោះ​ជាតិ សម្តេច​តេ​ជោ ហ៊ុន សែន នាយករដ្ឋមន្ត្រី​នៃ​កម្ពុជា បានធ្វើការ​អំពាវនាវ​ផ្ទាល់មាត់​ជាមួយ​ខ្លឹមសារ​សំខាន់ៗ​ដូចតទៅ​។​ក្នុងនាម​ជា​ស្ថាប័ន​នីតិប្រតិបត្តិ រាជរដ្ឋាភិបាល​កម្ពុជា សូម​ប្រកាស​គាំទ្រ នូវ​ដីកា​សម្រេច​របស់​តុលាការ​កំពូល ដែល​កាត់ទោស​រំលាយ គណបក្ស​សង្គ្រោះ​ជាតិ​។ ការសម្រេច​នេះ នឹង​ការពារ​ដល់​សន្តិសុខ ស្ថិរភាព និង​ការអភិវឌ្ឍន៍​បស់​ប្រទេស​កម្ពុជា​។​

​សម្តេច​តេ​ជោ ហ៊ុន សែន អំពាវនាវ​ឱ្យ​ប្រជាពលរដ្ឋ​រក្សា​ការ​ស្ងប់ស្ងាត់ ដើម្បី​រក្សា​សណ្តាប់ធ្នាប់​សង្គម ក្រោយពេល​រំលាយ គណបក្ស​សង្គ្រោះ​ជាតិ ហើយ​សម្តេច​ប្រកាសថា រាជរដ្ឋាភិបាល​កម្ពុជា នៅតែ​បន្ត​ប្តេជ្ញាចិត្ត ការពារ​លទ្ធិប្រជាធិបតេយ្យ សេរី​ពហុបក្ស​នៅក្នុង​ប្រទេស​។ ការបោះឆ្នោត​នឹង​នៅតែ​បន្ត​ធ្វើជា​បន្តបន្ទាប់​តាម​ការកំណត់​នៅពេល​ខាងមុខ ក្នុងនោះ​មានការ​បោះឆ្នោត​ជ្រើសតាំង​សមាជិក​ព្រឹទ្ធសភា និង​ការបោះឆ្នោត​ជ្រើសតាំង តំណាងរាស្ត្រ​ជាដើម​។

​ទោះជា​អវត្តមាន​គណបក្សនយោបាយ​មួយ ប៉ុន្តែ​កម្ពុជា​នៅតែមាន​គណបក្ស​ដទៃ​ជាច្រើន​ទៀត ចូលរួម​ក្នុងការ​បោះឆ្នោត​។​សម្តេច​តេ​ជោ ហ៊ុន សែន បានប្រកាសថា សកម្មជន និង​អ្នកគាំទ្រ គណបក្ស​សង្គ្រោះ​ជាតិ នៅតែមាន​សេរីភាព​ពេញលេញ ក្នុង​ការធ្វើ​នយោបាយ លើកលែងតែ​សមាជិក​ជាន់ខ្ពស់ ដែល​ត្រូវ​តុលាការ​ដកសិទ្ធិ​នយោបាយ​រយៈពេល​៥​ឆ្នាំ​។​

​សម្តេច​តេ​ជោ ហ៊ុន សែន អំពាវនាវ​ទៅកាន់ ចំពោះ​សមាជិក​ក្រុមប្រឹក្សាឃុំ សង្កាត់ ខេត្ត​ស្រុក​ខណ្ឌ នៅ​ទូទាំងប្រទេស​ថា បងប្អូន​នៅមាន​ពេលវេលា នៅឡើយ​។ បន្ទាប់ពី គណបក្ស​សង្គ្រោះ​ជាតិ ត្រូវ​រំលាយ រយៈពេល​២​សប្តាហ៍​យ៉ាងយូរ ទើបត្រូវ​រៀបចំ​បែងចែក​អ​សនៈ ដូច្នេះ​បងប្អូន​មាន​ពេល​១​សប្តាហ៍ ទៅ​២​សប្តាហ៍ ដើម្បី​ធ្វើការ​សម្រេចចិត្ត​ចុះ ចូល​ជាមួយ​គណបក្ស​ប្រជាជន​កម្ពុជា ឬ​គណបក្ស​ណាមួយ​។ បើសិនជា​បងប្អូន ចង់​នៅតែ​បន្ត​តួនាទី​របស់ខ្លួន សម្តេច​តេ​ជោ សូម​ប្រកាស​បន្ត​ស្វាគមន៍ ក្នុងការ​ចូលរួម​ជាមួយ គណបក្ស​ប្រជាជន​កម្ពុជា​។​

​សម្តេច​តេ​ជោ ហ៊ុន សែន បាន​ថ្លែង​ទៀតថា សមាជិក​គណបក្ស​សង្គ្រោះ​ជាតិ ដែល​នៅ​មូលដ្ឋាន មិនត្រូវ​ចាត់ទុក ការអំពាវនាវ​របស់​សម្តេច ជាការ​ទិញដូរ​នោះទេ ប៉ុន្តែ​ត្រូវ​ចាត់ទុកថា ជា​ឱកាស​ដែល​ផ្តល់ជូន​ពួកខ្លួន សម្រាប់​បម្រើ​ប្រជាពលរដ្ឋ​។ ជាមួយគ្នានេះ សមាជិក​ក្រុមប្រឹក្សាឃុំ​សង្កាត់ របស់​គណបក្ស​សង្គ្រោះ​ជាតិ ដែល​មិន​ចុះចូល​ជាមួយ គណបក្ស​ណាមួយ កុំ​លាក់ខ្លួន ហើយ​ដោះស្រាយ​កិច្ច​ការដែល​នៅ​សេសសល់ ដូចជា​ប្រគល់​ត្រា និង​សម្ភារៈ​ផ្សេងៗ ជូន​ដល់​អ្នក​កាន់តំណែង​ថ្មី ដែល​នឹង​មកដល់​នៅ ពេលខាងមុខ​។ សម្តេច​តេ​ជោ ហ៊ុន សែន ក៏​ព្រមាន​ដល់​សមាជិក​គណបក្ស​ស​ង្គ្រោះ​ជាតិ នៅ​មូលដ្ឋាន កុំ​ធ្វើ​សកម្មភាព​ណាមួយ ដែលនាំឱ្យ​មានទោស​ព្រហ្មទណ្ឌ​ថែមទៀត ក្រោយ​គណបក្ស​ត្រូវបាន​រំលាយ​។​សម្តេច​ប្រកាសប្រាប់​ទៅ​បរទេស​ថា យើង​កំពុង​អនុវត្ត​ច្បាប់​ប្រទេស​របស់​យើង បើទោះបី​មាន​អ្វី​កើតឡើង​ក៏ដោយ អ្នក​ទាំងនោះ មិនត្រូវ​ធ្វើ​អ្វី​ដូច​អតីតកាល ដូចជា​គាំទ្រ លោក លន់ នល់ នោះទេ​។ សម្តេច​សង្ឃឹមថា បរទេស​ទាំងអស់ នឹងមិន​ប្រព្រឹត្ត​នូវ​រឿង​ច្រំ​ដែល ដូច​អតីតកាល​នោះទេ​។​

​សម្តេច​តេ​ជោ ហ៊ុន សែន សង្ឃឹមថា ប្រជាពលរដ្ឋ ដែល​បាន​រួមរស់​ជាមួយ គណបក្ស​ប្រជាជន​កម្ពុជា ៤០​ឆ្នាំ​មកនេះ នឹង​ទទួលបាន​ផល ប្រយោជន៍​ពី​សន្តិភាព និង​ការអភិវឌ្ឍន៍ នៅ​កម្ពុជា​តទៅទៀត​។​សម្តេច​តេ​ជោ​បាន​ថ្លែងថា នៅពេលនេះ សមាជិក​របស់​គណបក្ស​សង្គ្រោះ​ជាតិ ដែល​តុលា​ការមិន​ហាមឃាត់ អាចមាន​សេរីភាព ទៅ​ចូលរួម​ជាមួយ​គណបក្ស​ប្រជាជន​កម្ពុជា គណបក្ស​ដទៃ ឬ​ទៅ​បង្កើត​គណបក្ស​ដោយ​ខ្លួនឯងបាន​៕ ដោយ​៖​បញ្ញា​ស័ក្តិ​

spot_img
×