នេះមិនមែនជារឿងសម្តែង ឬក៏ Prank អ្វីនោះទេ ខណៈដែលតារាកំប្លែងដ៏ល្បីឈ្មោះលោក ចែម ចាន់ដារ៉ា ហៅ «ពាក់មី» បានជួបរឿងកំពុងព្រួយបារម្ភជាខ្លាំង ខណៈប្រពន្ធរបស់លោកកំពុងត្រូវបានសង្គ្រោះបន្ទាន់នៅបន្ទប់ ICU អស់រយៈពេល ២ថ្ងៃហើយ មិនទាន់ដឹងខ្លួននៅឡើយនោះទេ បន្ទាប់ពីទៅកែសម្ផស្ស «ឲ្យសាច់ស» នៅហាងកែសម្ភស្សមួយកន្លែងដែលមានយីហោ «អេស 88 ប៊ីយូធី ផ្សារធំថ្មី (SS88 Beuaty)»។
ក្រោយរឿងនេះកើតឡើង ខណៈម្ចាស់ហាងខាងលើបានរត់គេចខ្លួនមិនទទួលខុសត្រូវ នៅព្រឹកថ្ងៃទី៤ ខែសីហា ឆ្នាំ២០២៣ នេះ លោក ពាក់មី បានសម្រេចបង្ហោះទម្លាយឲ្យបងប្អូនសាធារណជនបានដឹងថា៖ «ប្រពន្ធខ្ញុំសង្គ្រោះបន្ទាន់នៅបន្ទប់ ICU 2 ថ្ងៃហើយ បន្ទាប់ពីគាត់បានព្យួសេរ៉ូមអោយសាច់ស នៅមជ្ឈមណ្ឌលកែសម្ភស្ស S88 Beauty នៅថ្ងៃពុធ ទី2 ម៉ោង1រសៀល តើម្ចាស់ S88 Beauty ទាំង13សាខា ជានណា?»។
ដោយឡែក ថ្មីៗនេះ លោក ពាក់មី ក៏បានបន្តបង្ហោះនៅលើទំព័រហ្វេសប៊ុករបស់លោកឲ្យដឹងថា បានស្គាល់មុខម្ចាស់ហាងហើយ ដោយលោកបានផ្តាំបែបនេះថា៖ «ស្គាល់មុខ ម្ចាស់ហាងហើយ កុំគេចវេស មកដោះស្រាយជាមួយសមត្ថកិច្ចភ្លាម!!»។
ទោះជាយ៉ាងណា ក្រោយទទួលពាក្យបណ្តឹងរបស់តារាកំប្លែងរូបនេះ សមត្ថកិច្ចក៏បានចុះធ្វើកំណត់ហេតុ និងបិទហាងកែសម្ផស្សនេះផងដែរ។ នេះបើប្រភពព័ត៌មានចែករំលែកនៅលើបណ្តាញសង្គម បានបញ្ជាក់ឲ្យដឹងថា «បិទហាងកែសម្ផស្សយីហោ S88 Beauty ផ្សារថ្មី មួយកន្លែង បន្ទាប់ពីរកឃើញថា ទីតាំងមួយកន្លែងនេះមិនមានអជ្ញាបណ្ណ័ត្រឹមត្រូវ និងបានធ្វើអោយប្រពន្ធតារាកម្លែងនាយពាក់មី រងរបួសធ្ងន់ធ្ងរ ក្រោយទទួលសេវ៉ាកម្មចាក់សេរ៉ូម ខូលជិន ចាក់វីតាមីនផ្ទៃមុខ។ សូមបញ្ជាក់ថាទីតាំងខាងលើនេះស្ថិតនៅផ្ទះលេខ១១០E0 តាមបណ្តោយផ្លូវលេខ៥៣ សង្កាត់ផ្សារថ្មី៣ ខណ្ឌដូនពេញ»៕ រក្សាសិទ្ធិដោយ៖ លឹម ហុង
