ភ្នំពេញ៖ រដ្ឋសភា បានបញ្ជាក់ថា សាលដីការបស់តុលាការកំពូលដែលបានសម្រេច រំលាយគណបក្សសង្គ្រោះជាតិនេះ នឹងពង្រឹងការគោរព និងការអនុវត្តរដ្ឋធម្មនុញ្ញ ស្របតាមគោលការណ៍នីតិរដ្ឋ និងលទ្ធិប្រជាធិបតេយ្យ ដើម្បីរក្សាស្ថិរភាព និងការពារសន្តិភាព ការអភិរក្ស ភាពសុខសាន្តរបស់ប្រជាពលរដ្ឋ និងសេចក្តីថ្លៃថ្នូររបស់ប្រជាជាតិយើង។
សេចក្តីថ្លែងការណ៍របស់រដ្ឋសភា នៃព្រះរាជាណាចក្រកម្ពុជា ថ្ងៃសុក្រ ទី១៧ ខែវិច្ឆិកា ឆ្នាំ២០១៧ បានបញ្ជាក់យ៉ាងដូច្នេះថា “រដ្ឋសភានៃព្រះរាជាណាចក្រកម្ពុជា បានតាមដានយ៉ាងយកចិត្តទុកដាក់ នូវការវិវត្តន៍ នៃព្រឹត្តិការណ៍សំខាន់ៗរបស់ប្រទេសជាតិ ជាពិសេសក្នុងរយៈពេលចុងក្រោយនេះ។ នៅថ្ងៃទី១៦ ខែវិច្ឆិកា ឆ្នាំ២០១៧ តុលាការកំពូល នៃព្រះរាជាណាចក្រកម្ពុជា បានជំនុំជម្រះ លើពាក្យបណ្តឹង របស់ក្រសួងមហាផ្ទៃ ហើយបានសម្រេច រំលាយគណបក្សសង្គ្រោះជាតិ និងហាមឃាត់ ថ្នាក់ដឹកនាគណបក្សសង្គ្រោះជាតិ ចំនួន១១៨នាក់ ធ្វើសកម្មភាពនយោបាយ រយៈពេលឆ្នាំ៥ឆ្នាំ ដែលជាសេចក្តីសម្រេចស្ថាពរ និងបិទផ្លូវតវ៉ា”។
ក្នុងសេចក្តីថ្លែងការណ៍ដដែល បានបញ្ជាក់ថា តុលាការកំពូល គឺជាស្ថាប័ន មានសមត្ថកិច្ចតែមួយគត់ ក្នុងការសម្រេច សេចក្តីរំលាយគណបក្សនយោបាយណាមួយ ដែលប្រព្រឹត្តផ្ទុយ នឹងរដ្ឋធម្មនុញ្ញ ផ្ទុយនឹងច្បាប់ ស្តីពី គណបក្សនយោបាយ និងច្បាប់ពាក់ព័ន្ធជាធរមាន។ សាលដីការបស់តុលាការកំពូលនេះ នឹងពង្រឹងការគោរព និងការអនុវត្តរដ្ឋធម្មនុញ្ញ ច្បាប់ជាធរមាន ស្របតាមគោលការណ៍នីតិរដ្ឋ និងលទ្ធិប្រជាធិបតេយ្យ សេរីពហុបក្ស ដើម្បីរក្សាស្ថិរភាព នយោបាយ ឯករាជ្យ អធិបតេយ្យ និងការពារសន្តិភាព ការអភិរក្ស ភាពសុខសាន្តរបស់ប្រជាពលរដ្ឋ និងសេចក្តីថ្លៃថ្នូររបស់ប្រជាជាតិយើង ព្រមទាំងប្រឆាំងនឹងការជ្រៀតជ្រែត កិច្ចការផ្ទៃក្នុងពីមជ្ឈដ្ឋានអមិត្ត។
រដ្ឋសភានៃព្រះរាជាណាចក្រកម្ពុជា នៅតែបន្តបំពេញតួនាទី ស្របតាមរដ្ឋធម្មនុញ្ញ ច្បាប់ និងបទបញ្ជាផ្ទៃក្នុងនៃរដ្ឋធម្មនុញ្ញជានិច្ច៕ ដោយ៖កូឡាប
