វីដេអូនៃរូបភាព ឬអាចជាបាតុភូតដ៏ចម្លែកមួយ នៅលើមេឃ ដែលរសាត់អណ្តែតពីលើឆ្នេរសមុទ្រ Tanjong កោះ Sentosa ប្រទេសសិង្ហបុរី កាលពីពេលថ្មីៗនេះ បានធ្វើឲ្យមានការវែកញែកដ៏ចម្រូងចម្រាស នៅក្នុងពិភពអនឡាញ ខណៈមនុស្សជាច្រើនមានការសង្ស័យ និងការស្មានខុសៗគ្នា។
តាមវីដេអូឃ្លីបបានបង្ហាញថា ហេតុការណ៍នេះបានកើតឡើងនៅកណ្តាលថ្ងៃត្រង់ ខណៈភ្ញៀវទេសចរជាច្រើនកំពុងកម្សាន្តនៅមាត់សមុទ្រ មានទាំងការហែលទឹក និងងូតទឹក។ ប៉ុន្តែភ្លាមៗនោះ នៅលើមេឃ ស្រាប់តែមានផ្សែងខ្មៅយ៉ាងសន្ធោសន្ធៅមួយ កំពុងរសាត់អណ្តែតសន្សឹមៗចូលមក ធ្វើឲ្យអ្នកទេសចរមានការភ្ញាក់ផ្អើលយ៉ាងខ្លាំង។ អ្នកដែលបានកត់សម្គាល់ឃើញភាពមិនប្រក្រតីនេះ បានងើយមើលគ្រប់ៗគ្នា។
វីដេអូឃ្លីបនៃវត្ថុរសាត់អណ្តែតទឹកមិនស្គាល់ប្រភេទនេះ ត្រូវបានគេបង្ហោះនៅលើបណ្តាញសង្គម TikTok កាលពីថ្ងៃទី៧ ខែសីហា ដោយបានដាក់ចំណងជើងថា “តើយើងគួររត់ទេ?”។ ហើយមិនយូរប៉ុន្មាន វីដេអូនេះទទួលបានការចាប់អារម្មណ៍យ៉ាងឆាប់រហ័ស ខណៈអ្នកប្រើប្រាស់សង្គមបានបញ្ចេញមតិយល់ឃើញផ្សេងៗគ្នា។ ក្នុងនោះ អ្នកខ្លះថា វាជាយានអវកាសរបស់ជនបរទេស, ក្រុមសត្វស្លាប ឬសត្វល្អិត ផ្សែងហុយ បាតុភូតធម្មជាតិ ឬវាអាចមកពីកញ្ចក់កាមេរ៉ាមិនស្អាត ជាដើម។
អ្នកទេសចរម្នាក់ឈ្មោះថា Selamat ដែលបានចែករំលែកវីដេអូនេះ បានប្រាប់កាសែត Straits Times ថា គាត់និងមិត្តភក្តិរបស់គាត់កំពុងញ៉ាំអាហារនៅឆ្នេរសមុទ្រ។ ពេលឃើញ «ចិញ្ចៀនខ្មៅ» នេះដំបូង គាត់គិតថាវាជាហ្វូងឃ្មុំ ហើយក៏នាំគ្នាគិតថា តើគួររត់គេចចេញ? ប៉ុន្តែបានសម្រេចចិត្តកត់ត្រាភស្តុតាងជាមុនសិន បើមិនដូច្នេះទេ គ្មានអ្នកណាជឿឡើយ។ ភ្ញៀវខ្លះទៀតដែលមកលេងឆ្នេរនោះ បានព្យាយាមតាមដានមើល រហូតដល់វាបាត់ទៅវិញបន្ទាប់ពីពីរបីនាទី។
ទោះបីជាយ៉ាងណាក៏ដោយ វាហាក់បីដូចជាមិនថាវត្ថុអណ្តែតទឹកដ៏ចម្លែកនេះ មានទំនាក់ទំនងជាមួយមនុស្សក្រៅភពផែនដី ឬបាតុភូតអាថ៌កំបាំងដ៏ចម្លែកណាមួយនោះទេ ប៉ុន្តែមានអ្នកជំនាញតាមអ៊ីនធឺណិតបានទស្សន៍ទាយថា អ្វីដែលអាចទៅរួចនោះ ទំនងជាមានផ្សែងហុយចេញពីការសាកល្បងកាំជ្រួច។ នេះគឺជាកម្មវិធី Wings of Time នៅលើកោះ Sentosa ហើយនេះក៏មិនមែនជាលើកទីមួយទេ ដែលឃើញ «ចិញ្ចៀនខ្មៅ» នេះ។
គួរឲ្យដឹងថា នៅលើកោះ Sentosa កាលពីថ្ងៃទី៥ ខែមករា កន្លងទៅ មានវីដេអូមួយត្រូវបានគេចែករំលែកនៅលើក្រុម Facebook ក្នុងប្រទេសសិង្ហបុរី បានបង្ហាញ «ចិញ្ចៀនខ្មៅ» ស្រដៀងគ្នានេះនៅលើអាកាស ហើយមុននោះ ក្នុងឆ្នាំ២០១៧ ក៏មានបាតុភូតចម្លែកនេះផងដែរ៕ រក្សាសិទ្ធិដោយ៖ លឹម ហុង
@danenrdnslm5 errmmm, should we start running? #trending #sentosa #singapore ♬ original sound – Manic Hispanic