កាលពីពេលថ្មីៗនេះ ហេតុការណ៍ដ៏គួរឲ្យរន្ធត់ និងមិននឹកស្មានដល់មួយ ដែលបានកើតឡើងចំពោះស្រ្តីម្នាក់ នៅទីក្រុង Chongqing ប្រទេសចិន ធ្វើឱ្យអ្នកនិយមលេងអ៊ីនធឺណិត ព្រួយបារម្ភពីសុវត្ថិភាពរបស់នាងជាខ្លាំង បន្ទាប់ពីស្រ្តីរូបនោះត្រូវជាប់សក់នៅក្នុងកៅអីម៉ាស្សា។
យោងតាមរបាយការណ៍ប្រព័ន្ធផ្សព្វផ្សាយដីគោក បានឲ្យដឹងថា នៅថ្ងៃទី៣ ខែសីហា ឆ្នាំ២០២៣ ស្ត្រីរូបនោះបានទៅស្ថានីយ៍រថភ្លើង Chongqing ដើម្បីធ្វើដំណើរ។ ពេលមកដល់ ឃើញកៅអីម៉ាស្សាមួយដាក់នៅក្បែរ នាងក៏បានប្រើប្រាស់វា។ តែមិននឹកស្មានដល់ថា បន្ទាប់ឡើងប្រើ ស្រាប់តែសក់របស់នាងត្រូវជាប់នឹងឧបករណ៍នៃកៅអីម៉ាស្សា ហើយជាប់គាំង ធ្វើឱ្យនាងស្រែកទាំងឈឺចាប់ ដល់មនុស្សគ្រប់គ្នាដែលនៅជុំវិញ។
ដោយឮសំឡេងស្ត្រីនោះស្រែកឱ្យគេជួយ មនុស្សជាច្រើនបានប្រញាប់ទៅជួយនាង។ បុរសម្នាក់ក្នុងចំណោមនោះបានព្យាយាមដោះកៅអីម៉ាស្សា ខណៈអ្នកផ្សេងទៀត បានរួមគ្នាទាញកៅអីចេញ ខណៈវាកំពុងដំណើរការ។
បើទោះជាពេលនោះ ម៉ាស៊ីនឈប់ដំណើរការក៏ដោយ ក៏សក់របស់ស្ត្រីនោះនៅតែជាប់គាំងនៅខាងក្នុង មិនអាចរើចេញបាន។ ក្នុងស្ថានភាពនេះ ប្រសិនបើគ្មានវិធីអ្វីផ្សេងទេ មនុស្សមួយចំនួនបានលើកឡើងថា វិធីតែមួយគត់ គឺត្រូវតែកាត់សក់ដែលជាប់គាំង ទើបអាចជួយសង្រ្គោះនាងចេញពីកៅអី។
ទោះជាយ៉ាងណា នៅទីបញ្ចប់ គ្រប់គ្នាបានរួមគ្នារុះរើកៅអីម៉ាស្សា ផ្តាច់ខ្សែភ្លើង និងកាត់ផ្នែកដែលជាប់គាំងនៃសក់របស់ស្ត្រីនោះ ដែលទទួលបានជោគជ័យ ក្នុងការជួយនាងឱ្យរួចផុតពីគ្រោះថ្នាក់។
ក្រោយហេតុការណ៍កើតឡើង អ្នកគ្រប់គ្រងបាននិយាយថា កៅអីម៉ាស្សាអាចដំណើរការខុសប្រក្រតី ដែលជាមូលហេតុធ្វើឲ្យសក់ស្ត្រីរងគ្រោះត្រូវបានទាញចូលក្នុងនោះ។ ទោះជាយ៉ាងណា អ្នកគ្រប់គ្រងបានបិទកៅអីម៉ាស្សាទាំងអស់នៅក្នុងតំបន់នេះភ្លាមៗ រហូតដល់មានការជូនដំណឹងនៅពេលក្រោយ៕ រក្សាសិទ្ធិដោយ៖ លឹម ហុង
