ជីវិតគ្រួសារ គឺជៀសមិនរួចពីការឈ្លោះប្រកែកគ្នានោះទេ។ ប៉ុន្តែមិនថាឈ្លោះគ្នាប៉ុន្មានដងទេ អ្វីដែលមិនគួរធ្វើ គឺការធ្វើបាបរាងកាយ ឬបណ្ដេញចេញ។ ព្រោះវាអាចនឹងធ្វើឱ្យរបួសផ្លូវចិត្តយ៉ាងខ្លាំង ដែលពីរឿងតូច បង្កឲ្យក្លាយជារឿងធំដោយមិននឹកស្មានដល់។
ជាក់ស្តែង យុវជនម្នាក់បានជួបស្រ្តីវ័យក្មេងម្នាក់ កំពុងដើរបីកូនតូចនៅកណ្តាលផ្លូវ ក៏ឈប់រថយន្ត ប៉ុន្តែបន្ទាប់ពីបានស្តាប់រឿងរ៉ាវហើយ ធ្វើឲ្យគាត់ឈឺចិត្តជំនួសស្រ្តីរូបនេះជាខ្លាំង។ នាងត្រូវបានប្តីដេញចេញពីរថយន្ត បន្ទាប់ឈ្លោះប្រកែកគ្នា។
នេះបើតាមគណនីហ្វេសប៊ុកឈ្មោះ Weerawat Nuanphaka នៅថ្ងៃទី១១ ខែសីហា ឆ្នាំ២០២៣ បានបង្ហោះឲ្យដឹងថា ខណៈពេលគាត់កំពុងបើករថយន្តត្រឡប់មកពីផ្លូវ Phetchaburi ក៏ប្រទះឃើញស្រ្តីវ័យក្មេងម្នាក់ កំពុងដើរបីកូនតូច នៅតាមចិញ្ចើមផ្លូវ។ នៅពេលនោះ គាត់ក៏បត់រថយន្តត្រឡប់ក្រោយ ដើម្បីចង់ដឹង។
លទ្ធផលសំណួរបានបង្ហាញថា ស្រ្តីរូបនេះមានជម្លោះជាមួយប្តីរបស់នាង ហើយបុរសនោះក៏បានដេញនាងចុះពីរថយន្តទាំងកណ្តាលផ្លូវ។ ចំណែកគោលដៅដែលនាងដើរ គឺឆ្ពោះទៅ Mahachai។ ឃើញបែបនេះ ដោយក្តីអាណិតជាខ្លាំង គាត់ក៏បានជូនស្រ្តី និងកូនប្រុសតូច ទៅផ្ទះដោយសុវត្ថិភាព។ ស្រ្តីនោះបានប្រាប់ថា នាងបានដើរចម្ងាយប្រហែល ៣ ទៅ ៤ គីឡូម៉ែត្រ ប៉ុន្តែ គ្មានអ្នកណាឈប់ឲ្យនាងជិះទេ។
បុរសជាម្ចាស់ឡានចិត្តធម៌ ក៏បានឲ្យដឹងថា «ពេលជូននាងទៅដល់ផ្ទះ ខ្ញុំក៏សុំអាសយដ្ឋាននាង ដើម្បីផ្ញើសម្លៀកបំពាក់កូនរបស់ខ្ញុំដែលមាន ទៅឱ្យកូនតូចរបស់នាងផងដែរ»។ រឿងនេះត្រូវបានគេចែករំលែករហូតដល់ទៅ 10,000 ដង។ គ្រប់គ្នាសូមកោតសរសើរចំពោះម្ចាស់ឡានដែលមានចិត្តសប្បុរសមួយនេះ។ តែទោះយ៉ាងណា មានមតិលើកឡើងគួរពិចារណាថា មូលហេតុដែលគ្មានអ្នកណាឈប់ឲ្យនាងជិះពីមុនៗ គឺមិនមែនថាគេគ្មានក្តីមេត្តានោះទេ។ ប៉ុន្តែសព្វថ្ងៃនេះ មានជនឆបោកច្រើន ខ្លាចគេបោកបញ្ឆោត ដើម្បីយកយើងទៅប្លន់កន្លែងស្ងាត់ណាមួយក៏អាចថាបានដែរណ៎ា!៕ រក្សាសិទ្ធិដោយ៖ លឹម ហុង
