រថភ្លើងក្រោមដីរបស់ប្រទេសចិន គឺជាកន្លែងមានមន្តអាគមចម្លែក ដែលជាញឹកញាប់វាហាក់ដូចមានអ្វីៗបានកើតឡើង ។ ជាក់ស្តែង ថ្មីៗនេះ បុរសអ្នកដំណើរម្នាក់ កំពុងអង្គុយនៅលើរថភ្លើងសុខៗ ស្រាប់តែស្ត្រីម្នាក់មិនដឹងជាកើតរោគអ្វី បានស្ទុះមកចាប់ក្រសោបមុខគាត់ នឹងខាំយ៉ាងសាហាវតែម្តង ។
វីដេអូនេះដែលបានរីករាលដាលនៅលើអ៊ីនធើរណែតចិន បានបង្ហាញឲ្យឃើញស្ត្រី «ឆ្កួត» ម្នាក់ បានចាប់ឱបក្រសោបមុខអ្នកដំណើរប្រុសម្នាក់ និងព្យាយាមខាំមុខរបស់គាត់យ៉ាងស្អិតរមួត ដែលមើលទៅហាក់ដូចជាពួកគេកំពុងថើបគ្នាយ៉ាងស្រើបស្រាលអីចឹង ។ នៅពេលនោះ បុរសរងគ្រោះត្រូវបានឃើញខំប្រឹងរុញច្រាននាងចេញពីគាត់ ដែលបានស្រែកទ្រហ៊ោយំក្នុងភាពដ៏ឈឺចាប់នឹងបញ្ហាអ្វីមួយ ។ ហើយទីបំផុត គាត់បានបង្ខំចិត្តខោកក្បាលនាង១ទូរស័ព្ទមួយទំហឹងដៃតែម្តង ។
បន្ទាប់នោះ គាត់ក៏បានរត់គេចខ្លួនទៅកាន់ទូដទៃ ជាមួយផ្ទៃមុខរបស់គាត់ពោរពេញដោយឈាម ។ ទោះយ៉ាងណា ស្ត្រីនោះដែលក៏ត្រូវបានឃើញប្រឡាក់ឈាមនៅនឹងបបូរមាត់ផងដែរ បានដេញតាមគាត់ទៀតផង ប៉ុន្តែ ត្រូវបានរារាំងដោយរបាំងខណ្ឌនៃកម្រាលទូរថភ្លើង និងទីបំផុត ស្ត្រីរូបនេះក៏បានស្រាតខោអាវ និងឈរទាំងខ្លួនប្រាណននលគកតែម្តង បន្ទាប់ពីយំឡាំប៉ាបោកខ្លួនមួយសន្ទុះ ។
ហេតុការណ៍នេះបានកើតឡើងនៅខ្សែទី៣នៃរថភ្លើងក្រោមដី Chongqing វេលាម៉ោងប្រហែល១រសៀល ថ្ងៃពុធ (១៨ កក្កដា) ។ យោងតាមប្រភពព័ត៌មានក្នុងស្រុកមួយបានឲ្យដឹងថា ស្ត្រីរូបនោះមានឈ្មោះថា Li អាយុ ៣៦ ឆ្នាំ បានមានបញ្ហាផ្លូវចិត្តធ្ងន់ធ្ងរមួយ បន្ទាប់ពីកើតមានជម្លោះជាមួយប្តីរបស់នាង ។
ទោះយ៉ាងណា នាងត្រូវបានអាជ្ញាធររថភ្លើងចាប់ខ្លួន ខណៈបុរសរងគ្រោះមានឈ្មោះថា Gao អាយុ ៥៦ ឆ្នាំ ត្រូវបានគេបញ្ជូនទៅសង្គ្រោះនៅមន្ទីរពេទ្យផងដែរ ៕ ចន្ទី (shanghaiist)