ភ្នំពេញ-ផលិតករ លោក ហួរ សុផល បានប្រកាសថា និងយកថវិកាចំណេញបានមកពីការលក់សំបុត្រកុនរឿង “នរណា Come Back” ទៅជួយសង្គមលោកបានផ្តល់ក្តីសង្ឃឹមបែបនេះ ព្រោះតែមានអ្នកគាំទ្រច្រើន គ្រាដែលលោកទើបតែប្រកាស់ដាក់សម្ពោធរឿង “នរណា Come Back” ជាផ្លូវការត្រឹមតែមួយថ្ងៃប៉ុណ្ណោះ កាលពីថ្ងៃទី១៦ វិច្ឆិកា ២០១៧ នៅផ្សារទំនើបអ៊ីអនម៉ល នៅរោងភាពយន្ត Major Cineplex ។
លោក បញ្ជាក់ថា ទឹកប្រាក់ចំណេញប្រាំភាគរយ គឺយកទៅជួយមន្ទីរពេទ្យគន្ធបុប្ផា និង ទាហាននៅតាមព្រំដែន។ បន្ថែមពីលើនេះទៅទៀត លោកក៏ទទួលបានប្រាក់ជំនួយចំនួន៥ពាន់ដុល្លារពីលោកស្រីលឹមម៉ារីណា ដើម្បីបូកបន្ថែមលើទឹកប្រាក់បានមកពីការចំណេញ ដើម្បីទុកសម្រាប់ជួយដល់សង្គមផងដែរ។
រឿង“នរណាCome Back ”បានដាក់បញ្ចាំងនៅក្នុងថ្ងៃទី១៦ខែវិច្ឆិកាឆ្នាំ២០១៧ នេះតទៅនៅគ្រប់រោងភាពយន្តក្នុងទីក្រុងភ្នំពេញ និងខេត្តសៀមរាបសម្រាប់អ្នកខេត្តផ្សេងៗទៀតគឺត្រៀមនឹងដាក់បញ្ចាំងជាបន្តបន្ទាប់ទៅតាមគម្រោងដែរបានគ្រោងទុក។ លោកបានបញ្ជាក់ប្រាប់ថាលោកនឹងដកប្រាក់ចំណេញចំនួន៥ភាគរយយកទៅជួយសង្គមដូចជាខាងមន្ទីរពេទ្យគន្ធបុប្ជានិងជួយទាហាននៅតាមព្រំដែនទោះបីជាមិនទាន់ដឹងថារឿងនេះជោគជ័យឬមិនជោគជ័យក្តីប៉ុន្តែនៅក្នុងចិត្តរបស់លោកគឺមានក្តីសង្ឃឹមថានឹងមានបងប្អូនខ្មែរជាច្រើនចូលរួមគាំទ្រស្នាដៃថ្មីរបស់លោក។
លោកហួរសុផលបានបន្ថែមទៀតថាជំហានដំបូងនេះគឺខាងយើងទទួលបានប្រាក់ចំនួន៥ពាន់ដុល្លារពីលោកស្រីលឹមម៉ារីណាដែលជាដៃគូភាគហ៊ុនក្នុងរឿង«នរណា Come Back »ដូច្នេះយើងមានប្រាក់នេះរួចជាស្រេចនៅក្នុងដៃដើម្បីជួយដល់មន្ទីរពេទ្យគន្ធបុប្ជាក៏ដូចជាជួយដល់ការងារសង្គមផ្សេងៗទៀត។ លោកហួរសុផលក៏បានអំពាវនាវសូមឱ្យបងប្អូនទាំងអស់ចូលរួមគាំទ្ររឿង « នរណា Come Back »ដែលជាស្នាដៃទី៧របស់លោកទាំងអស់គ្នា។
គួរបញ្ជាក់ផងដែរថារឿង« នរណា Come Back »គឺបានចំណាយពេលវេលាថតរហូតដល់ទៅជិត១ឆ្នាំនិងចំណាយទឹកប្រាក់ជិត៥ម៉ឺនដុល្លារដែលជាភាពយន្តខ្នាតធំកម្រិត៤K ទាំងគុណភាពនិងបច្ចេកទេសគឺស្តង់ដា ៕ ដោយ-គីម ស្រីរ័ត្ន
