បុរសម្នាក់ត្រូវបានគេចាប់ខ្លួន ពីបទបៀតបៀនកេរ្តិ៍ខ្មាស់ (ច្របាច់គូទ) ស្ត្រីអ្នកបម្រើម្នាក់ មុនពេលត្រូវបាន «ផ្តួល» ទៅនឹងជញ្ជាំងយ៉ាងអាម៉ាស់ ដោយដៃនារីរងគ្រោះផ្ទាល់ ។
យោងតាមប្រភពព័ត៌មានបានឲ្យដឹងថា បុរសឈ្មោះ Ryan Cherwinski អាយុ ៣១ ឆ្នាំ ត្រូវបានគេមើលឃើញនៅក្នុងវីដេអូកាមេរ៉ាឃ្លាំមើល បានយកដៃទៅស្ទាបច្របាច់គូទនារីអ្នកបម្រើឈ្មោះ Emelia Holden អាយុ ២១ ឆ្នាំ នៅក្នុងភោជនីយដ្ឋាន Vinnie Van Go-Go’s ស្ថិតក្នុងទីក្រុង Savannah, រដ្ឋ Georgia សហរដ្ឋអាមេរិក ។
ឃ្លីបវីដេអូដែលបានកត់ត្រានៅថ្ងៃទី៣០ មិថុនា បានបង្ហាញឲ្យឃើញ នារីអ្នកបម្រើវ័យក្មេងដ៏ក្លាហានរងគ្រោះ បានចាប់បុរសឈ្លើយរូបនោះ គ្រវែងទៅនឹងកម្រាលនៃហាងលក់ម្ហូបអាហាររបស់នាង ដែលធ្វើឲ្យអ្នកមកទទួលទានជាច្រើនមានការភ្ញាក់ផ្អើលគ្រប់ៗគ្នាតែម្តង ។
នៅពេលនេះ Cherwinski ត្រូវបានចាប់ខ្លួនហើយ បន្ទាប់ពីប៉ូលីសបានទទួលវីដេអូអំពីហេតុការណ៍ ដែលបានកើតឡើងមិនសមរម្យនេះទៅលើនារីភេទ ។
បុរសនេះមកពី Palm Bay រដ្ឋ Florida កំពុងញ៉ាំអាហារជាមួយដៃគូរបស់គាត់ ដែលមានទំនាក់ទំនងស្នេហានឹងគ្នាអស់រយៈពេល ១១ ឆ្នាំ មកហើយ នៅក្នុងភោជនីយដ្ឋានខាងលើ ហើយនៅពេលនោះ គាត់ក៏បានបង្ករឿងនេះឡើង ។
កាសែត Mail Online បានរាយការណ៍ថា បុរសអាយុ ៣១ ឆ្នាំ រូបនេះ មានកូនស្រីភ្លោះ១គូ ជាមួយមិត្តស្រីរបស់គាត់ ។
Cherwinski ត្រូវបានចោទប្រកាន់ពីបទរំលោភបំពានផ្លូវភេទ បន្ទាប់ពីបានប្រព្រឹត្តទង្វើយកដៃស្ទាបច្របាច់គូទនារីរងគ្រោះ និងត្រូវបានឃុំខ្លួនក្នុងពន្ធនាគារ ២ យប់ កាលពីថ្ងៃទី២ កក្កដា ប៉ុន្តែ ត្រូវបានដោះលែងវិញ ដោយមានប្រាក់ធានាក្រៅឃុំចំនួន ២,៥០០ ដុល្លារ ៕ ចន្ទី (ប្រភព៖ thesun)