ថ្មីៗនេះ ទីក្រុង Guizhou ប្រទេសចិន បានជួបព្យុះផ្គររន្ទះយ៉ាងខ្លាំង។ ហើយទន្ទឹមនឹងគ្រោះធម្មជាតិដ៏គួរឲ្យខ្លាចនេះ បុរសម្នាក់ឈ្មោះ Liu Nan ត្រូវរន្ទះបាញ់២ដងជាប់គ្នាក្នុងរយៈពេលត្រឹមតែ៥នាទីប៉ុណ្ណោះ។ តែអាចចាត់ទុកថាមានសំណាងខ្លាំងណាស់ដែលនៅមានជីវិត ដោយគាត់អាចមានឱកាសទូរស័ព្ទហៅរថយន្តសង្គ្រោះមកជួយ ហើយគ្រាន់តែរបួសរលាកកម្រិតទីបី។
លោក Liu ត្រូវបានរន្ទះបាញ់នៅមាត់ទ្វារផ្ទះរបស់គាត់។ ក្នុងនោះ លើកទី១ គាត់ត្រូវរន្ទះបាញ់ ដេកដួលនៅនឹងកន្លែង និងលើកទី២ នៅពេលដែលគាត់ភ្ញាក់ដឹងខ្លួនដោយអព្ភូតហេតុ Liu បានឃើញប្រពន្ធ និងកូនៗរបស់គាត់ ភ័យស្លន់ស្លោយ៉ាងខ្លាំង ពេលគាត់ដេកលើដី។ គាត់បានដឹងថាគាត់ត្រូវរន្ទះបាញ់ ហើយគាត់បានហៅរថយន្តសង្គ្រោះបន្ទាន់។ បុរសវ័យកណ្តាលរូបនេះ ត្រូវបានបញ្ជូនទៅកាន់មន្ទីរពេទ្យក្នុងស្រុក ហើយគ្រូពេទ្យបានបញ្ជាក់ថា គាត់ត្រូវបានរន្ទះបាញ់មិនមែនម្តងទេ ប៉ុន្តែពីរដង។ គាត់បានបង្ហាញការរលាកកម្រិតទីបីនៅជើង ចង្កេះ និងគូទ។
ក្រោយបានធូរស្រាលពីរបួស និងភាពតក់ស្លុត Liu បានប្រាប់ឲ្យដឹងថា «ខ្ញុំត្រូវបានវាយចេញភ្លាមៗនៅពេលនោះ ហើយប្រហែលជាត្រូវការពេលប៉ុន្មានវិនាទី ដើម្បីក្រោកដឹងខ្លួន។ បន្ទាប់មកពន្លឺជះចំមុខក៏មកម្តងទៀត ស្រាប់តែរន្ទះបានវាយប្រហារតែម្តង ហើយខ្ញុំក៏ដេកដួលនៅលើដី។ ទោះបីជាខ្ញុំដឹងថាត្រូវអគ្គិសនីឆក់ក៏ដោយ ខ្ញុំមិនដឹងថាដីទាំងមូលក៏មានចរន្តអគ្គិសនីដែរ»។ លោក Liu បន្ថែមថា គាត់មិនដែលគិតថា នឹងមានរឿងហេតុដូចជារន្ទះ កើតឡើងចំពោះគាត់នោះទេ។
ទោះជាយ៉ាងណា ការរលាកអគ្គិសនី អាចបង្កការខូចខាតយ៉ាងធ្ងន់ធ្ងរដល់ជាលិកាស្បែករបស់មនុស្ស។ ជាសំណាងល្អ បន្ទាប់ពីស្នាក់នៅក្នុងមន្ទីរពេទ្យសម្រាប់ការសង្កេត ស្ថានភាពបច្ចុប្បន្នរបស់ Liu មានស្ថេរភាព ហើយជំហានបន្ទាប់ គឺត្រូវធ្វើប្រតិបត្តិការជួសជុលដំណាក់កាលទីពីរ រួមទាំងផលប៉ះពាល់លើរូបរាង ហើយការព្យាបាលប្រឆាំងនឹងស្លាកស្នាមបន្ថែមទៀត នឹងត្រូវបានអនុវត្ត៕ រក្សាសិទ្ធិដោយ៖ លឹម ហុង
