ភ្នំពេញ ៖ ដីដែលជាដីកម្មសិទ្ធិឯកជនរបស់រដ្ឋចំនួន១៥៦៥ក្បាលដី នៅភូមិតំណាក់ធំ១ ភូមិឫស្សី៣ សង្កាត់ស្ទឹងមានជ័យ ខណ្ឌ មានជ័យត្រូវបានរាជរដ្ឋាភិបាលកម្ពុជា សម្រេចកាត់ និងប្រទានកម្ម ជូនប្រជាពលរដ្ឋ និងបានបិទផ្សាយទិន្នន័យជាសាធារណៈនូវឯកសារនៃការវិនិច្ឆ័យការចុះបញ្ជីដីធ្លីមានលក្ខណៈជាប្រព័ន្ធ ដើម្បីឲ្យបងប្អូនមកពិនិត្យមើល ជៀសវាង ខុសអក្ខរាវិរុទ្ធខុសឈ្មោះឬបាត់ទំហំដីជាដើម ។
ពិធីបិទផ្សាយទិន្នន័យជាសាធារណៈនេះ បានធ្វើឡើងនាព្រឹកថ្ងៃទី២០ កក្កដា ឆ្នាំ២០១៨ នៅក្នុងបរិវេណវត្តនន្ទមុនី សង្កាត់ ស្ទឹងមានជ័យ ខណ្ឌមានជ័យ ក្រោមវត្តមានលោកឃួង ស្រេង អភិបាលនៃគណៈអភិបាលរាជធានីភ្នំពេញ អាជ្ញាធរដែនដី មន្ទីរពាក់ព័ន្ធ និងមានការចូលរួម ពីប្រជាពលរដ្ឋរាប់រយនាក់ ។
លោកសារិន វណ្ណា ប្រធានមន្ទីររៀបចំដែនដីសំណង់ និងសុរិយោដីរាជធានីភ្នំពេញ បានមានប្រសាសន៍លើកឡើងថា រាជរដ្ឋាភិបាលកម្ពុជាក្រោមការងារដឹកនាំ របស់សម្តេចតេជោហ៊ុន សែន ជានាយករដ្ឋមន្ត្រី បានចំណាយដីឯកជនរបស់រដ្ឋជិត១០០ហិកតា ជូនប្រជាពលរដ្ឋ មានសិទ្ធិកាន់កាប់ស្របច្បាប់ ។ ជាក់ស្តែងនៅពេលនេះ សម្តេចបានសម្រេចប្រគល់ដីចំនួន ៩០៥ ក្បាលដីនៅភូមិតំណាក់ធំ និង៦៦០ក្បាលដីនៅភូមិឫស្សី៣ សង្កាត់ស្ទឹងមានជ័យ ខណ្ឌមានជ័យ ដែលសរុបទាំងអស់ចំនួន១៥៦៥ក្បាលដី។
លោក បានបន្តថា “នេះជាដំណាក់កាលចុងក្រោយ មុនយកទៅបោះពុម្ពជាប័ណ្ណកម្មសិទ្ធិ ប្រគល់ជូនបងប្អូនប្រជាពលរដ្ឋ។ ការបិទផ្សាយក្បាលដីនេះ មានរយៈពេល១៥ថ្ងៃ ដូច្នេះទេ សូមបងប្អូនមកពិនិត្យមើល ក្បាលដីរបស់ខ្លួន ឲ្យបានច្បាស់លាស់ ចៀសវាងខុសអក្ខរាវិរុទ្ធ កម្មសិទ្ធិរួម ជាប្តី ជារបស់ប្រពន្ធ ជាដើម ឬការបាត់ទំហំដីជាដើម ដើម្បីឲ្យមន្ត្រីជំនាញរបស់យើង ត្រូវចុះពិនិត្យ និងកែ សម្រួលឡើងវិញ ឲ្យមានតម្លាភាព” ។ លោកក៏បានបញ្ជាក់ថា ក្បាលដីជានឹងប្រគល់ជូនបងប្អូនប្រជាពលរដ្ឋនេះ ជាអតីតដីរបស់វិទ្យុជាតិ នៃក្រសួងព័ត៌មាន ហើយការងារនេះនៅក្រោយការបោះឆ្នោត នឹងប្រគល់ជូនបងប្អូន មិនមែនសន្យាខ្យល់នោះទេ។
លោកឃួង ស្រេង បានមានប្រសាសន៍ថា ប្រជាពលរដ្ឋរស់នៅលើដី ក្រោមអង់តែនរបស់វិទ្យុជាតិ នៃក្រសួងព័ត៌មាននេះកន្លងមកនេះពិតជារស់នៅដោយការភ័យព្រួយ ដោយសារតែបងប្អូនរស់ នៅលើដីឯកជនរបស់រដ្ឋ មិនដឹងថា ថ្ងៃណាត្រូវគេដេញចេញនោះទេ។ប៉ុន្តែនៅពេលនេះមិនត្រឹមតែមិនដេញចេញប៉ុណ្ណោះទេ សម្តេចតេជោហ៊ុន សែន នាយករដ្ឋមន្ត្រី នៅបានប្រគល់ជូនជាកម្មសិទ្ធិស្របច្បាប់ថែមទៀត ។ នេះជាការយកចិត្តទុកដាក់របស់សម្តេច ចំពោះបងប្អូនប្រជាពលរដ្ឋដែលតែងតែគិតគូរជានិច្ច ពីសុខទុក្ខរបស់ប្រជាពលរដ្ឋ។
លោកឃួង ស្រេង ក្នុងឱកាសនោះ ក៏បានស្នើឲ្យបងប្អូនប្រជាពលរដ្ឋទាំងអស់ មកពិនិត្យក្បាលដីរបស់ខ្លួន ឲ្យបានច្បាស់លាស់ ចៀសវាងខុសអក្ខរាវិរុទ្ធ កម្មសិទ្ធិ ឬបាត់ទំហំដីជា ដើម្បីឲ្យមន្ត្រីរបស់យើងពិនិត្យនិងកែសម្រួលឡើងវិញ ឲ្យមានតម្លាភាព ៕ ដោយ៖ កូឡាប
