អ្នកនេសាទមួយក្រុមនៅទីក្រុង Qingdao ខេត្ត Shandong ប្រទេសចិន បានទៅនេសាទក្នុងសមុទ្រ ក្បែរកោះ Lingshan ហើយស្ទួចបានត្រីស្បៃកាអេស្បាញមួយក្បាល ប៉ុន្តែ អ្វីដែលធ្វើឲ្យភ្ញាក់ផ្អើលខ្លាំងនោះ គឺពួកគេបានរកឃើញកងដៃមាសរបស់មនុស្ស ត្រូវបានពាក់ជាប់នឹងផ្នែកនៃក្បាលរបស់វាតែម្តង។
យោងតាមរបាយការណ៍ “Western Decision” របស់ប្រទេសចិន អ្នកនេសាទដែលមាននាមត្រកូល Chen ដែលបានថតវីដេអូ បាននិយាយថា ត្រីស្បៃកាអេស្បាញនេះ ត្រូវបានស្ទួចបានដោយមិត្តរបស់គាត់ នៅក្នុងក្រុមតែមួយ។
តាមរយៈវីដេអូ បានបង្ហាញកងដៃមាសនោះ ត្រូវបានពាក់ជាប់នៅត្រង់ប្រសព្វនៃក្បាល និងដងខ្លួនរបស់វា ហើយបានលិចកប់ចូលក្នុងសាច់យ៉ាងជ្រៅ ជាមួយស្លាកស្នាមដាច់ដូចបានឃើញក្នុងរូប។
Chen បាននិយាយថា បន្ទាប់ពីបានដោះកងដៃមាសនេះចេញ ពួកគេពុំបានយកត្រីនេះទៅផ្ទះទេ ដោយបានព្រលែងវាចូលក្នុងសមុទ្រវិញផងដែរ។
យ៉ាងណាមិញ ករណីកងដៃមាស ដែលជាប់នឹងត្រីដ៏មិននឹកស្មានដល់បែបនេះ ត្រូវបានគេជឿថា អាចជារបស់វាជនរងគ្រោះ នៃការធ្លាក់យន្តហោះ ឬ អ្នកទៅលេងសមុទ្រជ្រុះចូលក្នុងទឹកដោយចៃដន្យ៕ រក្សាសិទ្ធិដោយ៖ លឹម ហុង
