នារីវ័យក្មេង២នាក់ បានធ្វើឱ្យអ្នកនិយមលេងអ៊ីនធឺណិត ទប់សំណើចមិនបាន បន្ទាប់ពីជួបក្រុមក្មេងស្ទាវអ្នកជិះម៉ូតូ ដេញវាយគ្នា និងផ្ទុះអាវុធ ដែលធ្វើឲ្យពួកនាងភ័យស្លោ នាំគ្នារត់គេចខ្លួនភ្លេចយកទូរស័ព្ទដៃតាម ហើយប្រថុយត្រឡប់មកយកវិញទាំងព្រលឹងចុងសក់ ប៉ុន្តែ សំណាងទូរស័ព្ទមិនបាត់ បាត់តែរបស់របរខ្លះមានដូចស្រាបៀរ។
តាមរយៈវីដេអូកាមេរ៉ាសុវត្ថិភាព បានបង្ហាញមុនពេលកើតហេតុ គេបានឃើញនារី២នាក់ អង្គុយលេងទូរស័ព្ទ ខណៈកំពុងអង្គុយផឹកស្រាបៀរនៅមុខផ្ទះ។ ប៉ុន្តែ បន្ទាប់មក ស្រាប់តែមានក្មេងស្ទាវមួយក្រុម បានជិះម៉ូតូឌុបគ្នាបើកកាត់តាមផ្លូវមុខផ្ទះ ស្រែកឡោឡាពេញផ្អើលផ្លូវតែម្តង។ ដំបូង ដោយគិតស្មានថា ក្រុមក្មេងស្ទាវទាំងនោះជាក្រុមជាមួយគ្នា ជាហេតុធ្វើឲ្យពួកនាងមិនចាប់អារម្មណ៍នោះទេ។ ទោះជាយ៉ាងណា នៅពេលពួកនាងបន្តស្តាប់បទចម្រៀងមនោសញ្ចេតនាមិនបានប៉ុន្មានផង ស្រាប់តែឮក្មេងទំនើបស្រែកសួរថាមានរឿងអី? ហើយភ្លាមៗនោះ ក៏បានឮស្នូរគ្រាប់កាំភ្លើងផ្ទុះឡើង។
ដោយសារគ្រាប់កាំភ្លើង ផ្ទុះឡើងយ៉ាងសន្ធាប់ និងលឺកាន់តែកៀក នារីទាំងពីរបានរត់គេចចូលក្នុងផ្ទះយ៉ាងលឿន ដោយបន្សល់ទុកទូរស័ព្ទដៃនៅលើតុមុខផ្ទះ។ ក្នុងពេលមានចលាចលរត់យកប្រាសអាយុនេះ ស្រាប់តែបានឃើញក្មេងទំនើងម្នាក់រត់សំដៅមកតុ និងប្រមូលរបស់នៅលើតុយកទៅបាត់។ តែអ្វីដែលសំណាងនោះ គឺក្មេងស្ទាវនោះជំនួសការលួចយកទូរស័ព្ទ គឺរូបគេត្រូវបានដឹងថា បានលួចយកដបស្រាបៀរប៉ុណ្ណោះ។
តាមរយៈវីដេអូកាមេរ៉ា ក៏បានបង្ហាញក្មេងស្ទាវនោះ រត់មកប្រមូលដបស្រាយ៉ាងប្រញាប់ប្រញាល់ ហើយបន្ទាប់មក នារីម្នាក់ក្នុងចំណោមនោះ ក៏បានរត់មកយកទូរស័ព្ទរបស់ខ្លួនវិញទាំងប្រថុយគ្រោះថ្នាក់។
ក្រោយបានឃើញវីដេអូនេះ អ្នកនិយមលេងអ៊ីនធឺណេតបាននិយាយលេងសើចថា៖ «ព្រលឹងហោះស៊ីព្រលឹត ឃើញហើយទប់សំណើចពុំបានទេ, សុំទោសស្រីស្អាតទាំងពីរ តើទូរស័ព្ទរបស់អ្នកម៉ាកអ្វីដែរ បានជាលោកចោរមើលមិនឃើញ ឃើញតែដបស្រា?? ហាសហា,…»៕ រក្សាសិទ្ធិដោយ៖ លឹម ហុង
ទស្សនាវីដេអូ=>(Video)