កាលពីពេលថ្មីៗនេះ វីដេអូមួយដែលលេចចេញនៅលើបណ្តាញសង្គម ក្នុងប្រទេសអាហ្រ្វិកខាងត្បូង បានបង្ហាញពីទិដ្ឋភាពដ៏គួរឱ្យភ័យខ្លាច នៅពេលដែលរលកយក្សស៊ូណាមិ បានវាយប្រហារបង្កមហន្តរាយដល់អ្នកទទួលមកទានអាហារ នៅមាត់សមុទ្រ កាលពីថ្ងៃទី១៧ ខែកញ្ញា ឆ្នាំ២០២៣ ដែលពិតជាគួរឲ្យរន្ធត់ណាស់។
តាមប្រភពព័ត៌មានពី Mens Journal បានឲ្យដឹងថា រលកដ៏ធំបានបោកបក់ចូលទៅក្នុងទីធ្លាខាងមុខភោជនីយដ្ឋាន Mariners មុនពេល «គ្របដណ្តប់» ពេញតំបន់នោះយ៉ាងលឿន ជាមួយនឹងកម្រិតទឹករហូតដល់មួយម៉ែត្រ ក្នុងរយៈពេលពីរបីវិនាទីប៉ុណ្ណោះ។
ភ្ញៀវដែលកំពុងញ៉ាំអាហារនៅភោជនីយដ្ឋាន ដែលកំពុងផ្តោតការចាប់អារម្មណ៍ទស្សនាការប្រកួតបាល់ឱប រវាងក្រុមអាហ្រ្វិកខាងត្បូង និងក្រុមរ៉ូម៉ានី ក្នុងការប្រកួតបាល់ឱបពិភពលោកដោយរំភើបរីករាយ ស្រាប់តែរំពេចនោះ រលកបានបោកបក់មកលើទាំងកម្រោល ធ្វើឲ្យពួកគេស្រែកទាំងភ័យស្លន់ស្លោ។ គ្រឿងសង្ហារិម តុ កៅអី និងកម្ទេចកម្ទី ត្រូវបានទឹកជន់លិចភ្លាមៗ។
កម្លាំងនៃរលកដ៏ធំនេះ បានរុញអតិថិជនមួយចំនួនទៅខាងក្រោយភោជនីយដ្ឋាននៅឆ្នេរ Marina រដ្ឋ KwaZulu-Natal (អាហ្វ្រិកខាងត្បូង) មុនពេលមានចរន្តទឹកហូរខ្លាំង បានទាញមនុស្ស ៧ នាក់ ចូលទៅកាន់សមុទ្រ។
ការស្រែកថា «មានកូននៅទីនេះ» ត្រូវបានឮ ខណៈដែលយ៉ាងហោចណាស់មនុស្សម្នាក់ ត្រូវបានគេឃើញត្រូវបានអូសចេញទៅសមុទ្រ។
សាក្សីម្នាក់ដែលបានថតវីដេអូ បាននិយាយថា គាត់បានព្យាយាមទៅដល់ក្មេងស្រីនោះ ប៉ុន្តែមិនអាចជួយបានដោយសារតែចរន្តទឹកខ្លាំងពេក។ សាក្សីបាននិយាយថា មានមនុស្ស២នាក់បានព្យាយាមទាញក្មេងស្រីទៅច្រាំង បន្ទាប់ពីនាងត្រូវបាននាំយកទៅទៅសមុទ្រយ៉ាងលឿន។
Mi7 National Group ដែលជាក្រុមហ៊ុនសន្តិសុខរបស់ប្រទេសប្រេស៊ីល បាននិយាយអំពីឧបទ្ទវហេតុនេះថា «រលកធំទីមួយបានបោកបក់មកភោជនីយដ្ឋាន ដោយរុញអ្នកទទួលទានអាហារទៅខាងក្រោយអាគារ។ នៅពេលវាស្រកចុះ មនុស្សមួយចំនួនបានរងរបួស។ តែជាសំណាងល្អ ពួកគេបានត្រឡប់មកកាន់ច្រាំងវិញដោយសុវត្ថិភាព»។
ក្រុមហ៊ុនសន្តិសុខបានបន្ថែមថា «បន្ទាប់មក ជំនោរទឹកបានហក់ឡើងយ៉ាងលឿន បន្តជន់លិចភោជនីយដ្ឋាន បណ្តាលឱ្យមានការជន់លិចយ៉ាងខ្លាំង»។
យោងតាមរបាយការណ៍ មនុស្ស៧នាក់បានរងរបួសក្នុងហេតុការណ៍នេះ ក្នុងនោះ៥នាក់ត្រូវសម្រាកព្យាបាលនៅមន្ទីរពេទ្យ។
ក្រុមហ៊ុន Mi7 National Group ក៏បាននិយាយផងដែរថា «ឧបទ្ទវហេតុនេះបានកើតឡើងនៅពេលមានជំនោរទឹកឡើងខ្ពស់ ដែលបណ្តាលឱ្យខូចខាតទូទាំងទីក្រុងឆ្នេរសមុទ្រ តាមបណ្តោយឆ្នេរសមុទ្រភាគខាងកើតរបស់ប្រទេសប្រេស៊ីល ជាពិសេសតំបន់រវាង Port Elizabeth និងទីក្រុងកំពង់ផែ Cape Town ។ រលកខ្ពស់បានស្ងប់ ហើយទឹកជន់លិចបានស្រកនៅរសៀលថ្ងៃចន្ទ (១៨ កញ្ញា)។
នេះជាករណីថ្មីបំផុត ក្នុងឧប្បទ្ទវហេតុនៃគ្រោះធម្មជាតិស្រដៀងគ្នានេះ ដែលបានកើតឡើងក្នុងប្រទេសអាហ្វ្រិកកាលពីចុងសប្តាហ៍ពីថ្ងៃទី១៦ ខែកញ្ញា ដែលភោជនីយដ្ឋានមួយនៅឆ្នេរ Kalk Bay ជិតក្រុង Cape Town ក៏ត្រូវបានរលកធំៗបោកបក់ដែរ។ អាជីវកម្មរបស់ពួកគេបានរងការខូចខាតយ៉ាងខ្លាំង ប៉ុន្តែមិនមានមនុស្សណាម្នាក់រងរបួសនោះទេ។ តែទន្ទឹមនឹងនេះដែរ មានស្ត្រីអាយុ ៩៣ ឆ្នាំម្នាក់ នៅ Leentjiesklip បានស្លាប់នៅពេលដែលរលកដ៏ធំបានបោកបក់ចំណតរថយន្ត៕ រក្សាសិទ្ធិដោយ៖ លឹម ហុង
