ភ្នំពេញ : រថយន្តកូរ៉េមួយតោនកន្លះ បើកបរតាមបណ្ដោយផ្លូវ ៥០ម៉ែត្រសង្ស័យតៃកុងងោកមួយភាំង រេចង្កូតបុកឃឿនសួនច្បារពុះចែកទ្រូងផ្លូវ បណ្ដាលឲ្យក្រឡាបផ្ងារជើង សំណាងល្អមិនបង្កគ្រោះថ្នាក់ដល់អ្នកដទៃ។
ហេតុការណ៍គ្រោះថ្នាក់ចរាចរណ៍នេះបានកើតឡើងកាលវេលាម៉ោង ១១និង៥០នាទីថ្ងៃទី ២១ខែកញ្ញាឆ្នាំ២០២៣ ស្ថិតនៅតាមបណ្ដោយផ្លូវ ៥០ម៉ែត្រសង្កាត់ព្រៃស ខណ្ឌដង្កោ រាជធានីភ្នំពេញ។
តាមប្រភពព័ត៌មាននៅកន្លែងកើតហេតុបានឲ្យដឹងថា មុនពេលកើតហេតុឃើញរថយន្តកូរ៉េមួយតោនកន្លះ ប្រភេទទំនិញពណ៌ខៀវពាក់ផ្លាកលេខភ្នំពេញ2AX-9573 បើកបរដោយបុរសម្នាក់ធ្វើដំណើរតាមបណ្ដោយផ្លូវ ៥០ម៉ែត្រ ក្នុងទិសដៅពីកើតមកលិច ខណៈមកដល់ត្រង់ចំណុចកន្លែងកើតហេតុ សង្ស័យតែតៃកុងងោកមួយភាំង រេចង្កូតទៅឆ្វេងដៃបុកឡើងឃឿនសួនច្បារពុះចែកទ្រូងផ្លូវ បណ្ដាលឲ្យរថយន្តក្រឡាប់ផ្ងារជើងតែម្ដង សំណាងល្អមិនបង្កគ្រោះថ្នាក់ដល់អ្នកដទៃ។
ក្រោយកើតហេតុសមត្ថកិច្ចមូលដ្ឋាន បានចុះទៅដល់ពិនិត្យកន្លែងកើតហេតុ ដោយឃើញរថយន្តបង្កហេតុដោយខ្លួនឯង មិនបង្កគ្រោះថ្នាក់ដល់អ្នកដទៃ ក៏អនុញ្ញាតឲ្យម្ចាស់រថយន្តហៅរថយន្តស្ទូច មកស្ទូចយករថយន្តទៅជួសជុលដោយខ្លួនឯង៕ រក្សាសិទ្ធដោយ ៖ សួង សាម
