ភ្នំពេញ៖ ដោយអនុវត្តន៍តាមសេចក្តីប្រកាសរបស់ក្រសួងមហាផ្ទៃ ពាក់ព័ន្ធនឹងករណីទម្លាក់ស្លាកសញ្ញា និងបដាផ្សេងៗ របស់គណបក្សសង្គ្រោះជាតិនោះ នៅម៉ោង ៨ព្រឹក ថ្ងៃសៅរ៍ ទី១៨ វិច្ឆិកា ឆ្នាំ២០១៧នេះ ទីស្នាក់ការគណបក្សសង្គ្រោះជាតិ ត្រូវបានក្រុមសមត្ថកិច្ចចម្រុះ ដោះស្លាកសញ្ញាគណបក្សសង្គ្រោះជាតិ ចេញហើយ ។
មិនមែនតែនៅរាជធានីភ្នំពេញនោះទេ ថ្ងៃនេះ ស្លាកសញ្ញា បដា និងពាក្យស្លោកផ្សេងៗ របស់គណបក្សសង្គ្រោះជាតិ នៅតាមមូលដ្ឋានរាជធានី ខេត្ត នៅតាមដងផ្លូវ និងតាមទីស្នាក់ការខេត្តនានា ក៏ចាប់ផ្តើមរុះរើទម្លាក់ចេញជាបណ្តើរៗដែរ។
ការរុះរើទម្លាក់ស្លាកនេះ បានធ្វើឡើងបន្ទាប់ពីតុលាការកំពូលនៃកម្ពុជា បានកាត់ទោសរំលាយគណបក្សសង្គ្រោះជាតិ ហើយក្រសួងមហាផ្ទៃ បានប្រកាសលុបឈ្មោះគណបក្សនេះចេញពីបញ្ជីគណបក្សនយោបាយ ព្រមទាំងបង្គាប់ឲ្យអាជ្ញាធរគ្រប់រាជធានីខេត្ត ចុះអនុវត្ដសាលដីកា ទម្លាក់ស្លាក បដា និងពាក្យស្លោកផ្សេងៗ របស់គណបក្សសង្គ្រោះជាតិទូទាំងប្រទេស។
លិខិតរបស់សម្ដេចក្រឡាហោម ស ខេង បានបញ្ជាក់ទៅអភិបាល និងជាប្រធានគណៈបញ្ជាការឯកភាពរដ្ឋបាលរាជធានី-ខេត្ត ឲ្យចុះផ្សព្វផ្សាយ ដល់ប្រជាពលរដ្ឋ នៅគ្រប់កន្លែងអំពីការអនុវត្តសាលដីកានេះ។ ជាមួយគ្នានេះ សម្ដេចក៏បានបង្គាប់ឲ្យអាជ្ញាធរ បង្កើនការយកចិត្តក្នុងការគ្រប់គ្រង រក្សាការពារសន្ដិសុខ សុវត្ថិភាព សណ្ដាប់ធ្នាប់ និងរបៀបរាប់រយសាធារណៈ ក្នុងរាជធានី-ខេត្ដ នីមួយៗ។
សម្ដេចក្រឡាហោម បានបញ្ជាក់ទៀតថា ចំពោះស្នាក់ការរបស់គណបក្សសង្គ្រោះជាតិ ដែលមាននៅរាជធានី-ខេត្តនីមួយៗ ត្រូវណែនាំឲ្យទម្លាក់ស្លាក សញ្ញា បដា និងពាក្យស្លោកផ្សេងៗ ហើយមិនត្រូវឲ្យត្រូវធ្វើសកម្មភាពនានា ពាក់ព័ន្ធនឹងគណបក្សសង្គ្រោះជាតិដែលត្រូវបានរំលាយដោយតុលាការរួចហើយឡើយ។ មិនតែប៉ុណ្ណោះ អាជ្ញាធរ ត្រូវណែនាំដល់ម្ចាស់លំនៅឋាន អគារ សំណង់នានា ឲ្យធ្វើការដកចេញ នៅស្លាកសញ្ញានានា របស់អតីតគណបក្សសង្គ្រោះជាតិ នៅតាមលំនៅឋាន អាគារ សំណង់នានា របស់ខ្លួនជាបន្ទាន់។ ចំពោះស្លាកសញ្ញា នៅតាមទីផ្សារសាធារណៈ អាជ្ញាធរមានសមត្ថកិច្ច ត្រូវចាត់វិធានការ រុះរើចេញជាបន្ទាន់៕ ដោយ៖បញ្ញាស័ក្តិ
