ការអប់រំកូនៗតាំងពីនៅវ័យកុមារ គឺមានសារៈសំខាន់ណាស់ សម្រាប់ឪពុកម្តាយ។ ប៉ុន្តែ ម្តាយម្នាក់នេះវិញនៅក្នុងប្រទេសចិន បានធ្វើឲ្យមនុស្សជាច្រើនមានការហួសចិត្តយ៉ាងខ្លាំង បន្ទាប់ពីវីដេអូមួយដែលកំពុងរីករាលដាលនៅលើបណ្តាញសង្គម បានបង្ហាញស្រ្តីរូបនោះបានឈ្លោះជាមួយបុគ្គលិកផ្សារទំនើប បន្ទាប់ពីបណ្តែតបណ្តោយឲ្យកូនប្រុសតូចរបស់ខ្លួន រើកកាយធ្វើឲ្យជ្រុះទំនិញរាយប៉ាវដ៏ទំនើង។
តាមប្រភពវីដេអូបានឲ្យដឹងថា ស្រ្តីជាម្តាយម្នាក់ និងកូនប្រុសរបស់នាង បានឡើងផ្សារទំនើប។ ទោះជាយ៉ាងណា នៅពេលនោះ កូនប្រុសរបស់នាងស្រាប់តែបានរើកកាយបោះទំនិញក្នុងផ្សារទំនើបជាច្រើននៅលើឥដ្ឋ ហើយពេលបុគ្គលិកផ្សារទំនើបរំលឹកឲ្យដឹង ស្រ្តីជាម្តាយបានខឹងសម្បារ និងស្រែកខ្លាំងៗថា «តើកូនខ្ញុំធ្វើអីខុស? ខ្ញុំនិយាយជាមួយកូនរួចហើយ!»។ ស្រ្តីរូបនេះបានបន្ថែមទៀតថា «ទុកឲ្យគាត់លេងទៅ បើគាត់ញ៉ាំអី ខ្ញុំនឹងចេញថ្លៃឲ្យ»។
អ្នកផុសបានឲ្យដឹងទៀតថា ស្ត្រីម្នាក់ដែលឈរក្បែរនោះមិនពេញចិត្ត ក៏និយាយភ្លាមថា “អ្នកឯងពេញវ័យហើយ ហេតុអីនិយាយបែបនេះ តើអ្នកឯងបង្រៀនកូនយ៉ាងម៉េចទៅ?”។ ម្ដាយរូបនេះក៏បានប្រកែកភ្លាមៗជាមួយមនុស្សជុំវិញខ្លួនថា «ខ្ញុំចេះបង្រៀនកូនហើយ បើគាត់ធ្វើឲ្យខូចអ្វីខ្ញុំនឹងសង»។
ប្រឈមមុខនឹងម្តាយក្តៅក្រហាយ និងមិនសមហេតុផលបែបនេះ បុគ្គលិកផ្សារទំនើបមិននិយាយអ្វីទៀតទេ ក្រៅពីយកផលិតផលនោះមកដាក់លើធ្នើវិញ។ ម្តាយរូបនេះក៏មិនមានបំណងមើលដែរថា តើកូនរបស់ខ្លួនធ្វើឲ្យខូចផលិតផលអ្វី ដើម្បីសងជំងឺចិត្តនោះទេ។
ក្រោយវីដេអូនេះត្រូវបានគេចែករំលែក អ្នកលេងអ៊ីនធឺណិតបានរិះគន់ស្រ្តីម្ដាយរូបនេះជាបន្តបន្ទាប់ថា៖ «ផ្សារទំនើបមិនមែនជាកន្លែងលេងសម្រាប់កូនរបស់អ្នកទេ។ បន្ទាប់ពីលេងហើយ អ្នកក៏មិនបានរើសទំនិញដាក់នៅទីតាំងដើមវិញដែរ។ តើអ្នកចង់ឱ្យបុគ្គលិកផ្សារទំនើបទទួលខុសត្រូវចំពោះអាកប្បកិរិយារបស់កូនអ្នក និងត្រូវទទួលទោសដែរមែនទេ?”, “ម្តាយបែបនេះ គួរឲ្យរំខានបំផុត មិនខ្វល់ពីការអប់រំកូនឲ្យបានល្អ និងធ្វើជាគំរូដល់កូនសោះឡើយ”, “វាជារឿងមិនសមហេតុផលទាល់តែសោះ មូលហេតុដែលមានកូនខូចច្រើនណាស់សព្វថ្ងៃនេះ គឺដោយសារតែមានម្តាយបែបនេះហើយ មានម្តាយដែលតែងតែឈរនៅពីក្រោយពួកគេ និងគាំទ្ររាល់ទង្វើខុសឆ្គងរបស់ពួកគេ”,…៕ រក្សាសិទ្ធិដោយ៖ លឹម ហុង
