ក្មេងប្រុសថៃ ដែលត្រូវបានជួយសង្គ្រោះពីក្នុងរូងភ្នំលិចទឹក Tham Luang នៅក្នុងបេសកកម្មដ៏អស្ចារ្យមួយ បានកោរសក់កាលពីថ្ងៃអង្គារ ដើម្បីបួសសងគុណដល់អ្នកមុជទឹកម្នាក់ដែលបានស្លាប់អំឡុងប្រតិបត្តិការសង្គ្រោះពួកគេ ។
ក្រុមបាល់ទាត់ “ជ្រូកព្រៃ” វ័យក្មេង ធ្វើឲ្យរំជួលចិត្តពីមនុស្សនៅលើពិភពលោក ខណៈក្រុមអ្នកមុជទឹកបានធ្វើការសង្គ្រោះដ៏ប្រថុយជីវិតបំផុត ដើម្បីរំដោះពួកគេចេញពីរូងភ្នំ Tham Luang ដែលពួកគេបានចំណាយពេល ១៨ ថ្ងៃ ជាប់គាំងក្នុងនោះ ។ ក្មេងប្រុស ១២ នាក់ និងគ្រូបង្វឹកម្នាក់របស់ពួកគេ បានបន្សល់ទុកការស្លាប់របស់អ្នកមុជទឹកម្នាក់គួរឲ្យអាសូរ ដែលបានស្លាប់ដោយសារខ្វះអុកស៊ីហ្សែន ក្នុងអំឡុងពេលប្រតិបត្តិការ ។
ឥឡូវនេះ ពួកគេកំពុងរៀបចំខ្លួន ដើម្បីរស់ជាព្រះសង្ឃ និងស្នាក់នៅក្នុងវត្តចំនួន ៩ ថ្ងៃ ដើម្បី«សងគុណ» សម្រាប់អតីតអ្នកមុជទឹក SEAL លោក Saman Kunan, ដែលបានស្លាប់នៅពេលដែលកំពុងជញ្ជូនបំពង់អុកស៊ីសែន នៅតាមបណ្តោយផ្លូវសង្គ្រោះ ។
Aisha Wiboonrungrueang ម្តាយរបស់ក្មេងប្រុសឈ្មោះ Chanin អាយុ ១១ ឆ្នាំ បានប្រាប់ AFP ថា៖ «នេះជាអ្វីដែលយើងបានគិតធ្វើឡើង ចាប់តាំងពីពួកគេបានចេញពីរូង ។ ឥឡូវនេះវាដល់ពេលហើយ»។
ពួកគេទាំង១៣នាក់ បានបួសសងគុណអតីតអ្នកមុជទឹកថៃដែលបានស្លាប់ដោយសារពួកគេ នៅឯវត្ត Pha That Doi ស្ថិតនៅក្នុងស្រុក Mae Sai ភាគខាងជើងនៃប្រទេសថៃ ៕ ឧត្តម
