បាត់ដំបង ៖ ស្នងការដ្ឋាននគរបាលខេត្តបាត់ដំបង បានឲ្យដឹងថា ឈាមស្រែកល្បែកហៅ ឃាតករញីឈ្មោះពីរនាក់ សម្លាប់កាត់ក្បាលជនរងគ្រោះ ប្លន់យកម៉ូតូនៅខេត្តតាកែវ អស់រយៈពេល១៤ថ្ងៃ ត្រូវអស់លក្ខណ៍ មកជាប់អន្ទាក់សមត្ថកិច្ចនគរបាលនៅខេត្តបាត់ដំបង។
នៅព្រឹកថ្ងៃទី២៦ ខែកក្កដា ឆ្នាំ២០១៨នេះ លោកឧត្តមសេនីយ៍ត្រី ជេត វណ្ណនី ស្នងការរងទទួលផែនព្រហ្មទណ្ឌ បានបញ្ជាក់ថា អនុវតតាមបទបញ្ជារបស់លោក ឧត្តមសេនីយ៍ទោ អ៊ុច សុខុន ស្នងការនៃស្នងការដ្ឋាននគរបាលខេត្តបាត់ដំបង និងដោយបានការយល់ព្រមពីលោកនួន សាន ព្រះរាជអាជ្ញាអមសាលាដំបូងខេត្តបាត់ដំបង ព្រមទាំងមានការចូលរួមសហការណ៍ ពីសមត្ថកិច្ចជំនាញរបស់នាយកដ្ឋានព្រហ្មទណ្ឌក្រសួងមហាផ្ទៃ សមត្ថកិច្ចនគរបាល នៃស្នងការដ្ឋាននគរបាលខេត្តតាកែវ និងកម្លាំងជំនាញរបស់ស្នងការដ្ឋាននគរបាលខេត្តបាត់ដំបង ចូលរួមដោយកម្លាំងនគរបាល នៃអធិការដ្ឋាននគរបាលស្រុកកំរៀង ឃាតករដៃឆៅសម្លាប់កាត់ក្បាលជនរងគ្រោះ ប្លន់យកម៉ូតូកាលពីថ្ងៃទី១៣ ខែ កក្កដា ឆ្នាំ២០១៨នៅភូមិស្មន់មុន្នី ឃុំព្រៃផ្តៅ ស្រុកព្រៃកប្បាស ខេត្តតាកែវ ត្រូវបានចាប់ខ្លួននៅក្នុងមូលដ្ឋានស្រុកកំរៀង ខេត្តបាត់ដំបង វេលាម៉ោង៩និង៣០នាទីមុននេះតាមដីកាបង្គាប់របស់ចៅក្រមស៊ើបសួរតុលាការខេត្តតាកែវ ។
នគរបាលបន្ថែមថា ជនសង្ស័យទាំងពីរនាក់រួមមាន ឈ្មោះ ផាន់ បញ្ញារិទ្ធ ហៅវ៉េវ ភេទប្រុស អាយុ១៧ឆ្នាំរស់នៅភូមិព្រៃផ្តៅខាងត្បូង ឃុំព្រៃផ្តៅ ស្រុកព្រៃកប្បាស ខេត្តតាកែវ ជាជនដៃដល់ និងឈ្មោះហុន ធីតា ភេទស្រីអាយុ ១៧ឆ្នាំរស់នៅភូមិព្រៃចំបក់ ឃុំតាំងយ៉ាប ស្រុកព្រៃកប្បាស ខេត្តតាកែវ ជាអ្នកផ្សំគំនិត។
បច្ចុប្បនជនសង្ស័យទាំងពីរនាក់ កំពុងរៀបចំបញ្ជូនទៅ សមត្ថកិច្ចនគរបាលខេត្តតាកែវ ចាត់ការតាមផ្លូវច្បាប់៕ ដោយ ៖ កូឡាប
