ខេត្តស្វាយរៀង៖ នៅព្រឹកថ្ងៃទី២៦ខែកក្កដាឆ្នាំ២០១៨នេះសមត្ថកិច្ចបានឱ្យដឹងថាៈដោយមានការចង្អុលដឹកនាំ និងដាក់បទបញ្ជាយ៉ាងម៉ឺងម៉ាត់របស់លោក ឧត្តមសេនីយ៍ទោ កឹង ឃន ស្នងការនគរបាលខេត្ត និងដឹកនាំបញ្ជាផ្ទាល់ដោយលោកឧត្តមសេនីយ៍ត្រី កុយ សុភាព ស្នងការរងទទួលផែនព្រហ្មទណ្ឌ កម្លាំងការិយាល័យជំនាញខេត្ត និង ស្រុក បានសហការជាមួយកម្លាំងអធិការដ្ឋាននគរបាលខ័ណ្ឌមានជ័យ នៃស្នងការដ្ឋាននគរបាលរាជធានីភ្នំពេញ និងមានការសម្របសម្រួលពីព្រះរាជអាជ្ញាលោក គង់ ចន្ទ័ខេមរិទ្ធ បានធ្វើការស្រាវជ្រាវទីតាំងលាក់ខ្លួន និងឈានដល់ការឃាត់ខ្លួន ជនសង្ស័យជាឃាតករបាននៅថ្ងៃទី២៥ ខែកក្កដា ឆ្នាំ២០១៨ ម៉ោង២៣.៣០ នៅចំណុចភូមិ ព្រែកទាល់១ សង្កាត់ ស្ទឹងមាជ័យ២ ខណ្ឌមានជ័យ រាជធានីភ្នំពេញ ជនសង្ស័យបានបញ្ជូនខ្លួនមកកាន់ការិយាល័យជំនាញ នៃស្នងការដ្ឋាននគរបាល ខេត្តស្វាយរៀង ទាំងយប់ ។
ប្រភពដដែលបានឱ្យដឹងទៀតថាៈលុះដល់ព្រឹកថ្ងៃទី២៦ ខែកក្កដា ឆ្នាំ២០១៨ នេសមត្ថកិច្ច បានអោយជនសង្ស័យនាំទៅចង្អុលបង្ហាញទីតាំងលាក់ទុកវត្ថុតាង(កាំបិតកកុក) ជាក់ស្តែងបានរកឃើញវត្ថុតាង ។ បច្ចុប្បន្នជនសង្ស័យ រួមនឹងវត្ថុតាង ត្រូវបានកសាងសុំណុំរឿងបញ្ជួនទៅសាលាដំបូងខេត្តចាត់ការតាមច្បាប់។
សូមបញ្ជាក់ផងដែរថា៖កាលពីថ្ងៃទី ២៤ ខែកក្កដា ឆ្នាំ២០១៨ ម៉ោង១៨.៣០យប់ នៅចំណុចភូមិព្រៃតាធឹក ឃុំគគីសោមស្រុកស្វាយទាប មានករណីឃាតកម្មមួយកើតឡើង ដែលបង្កឡេីងដោយជនសង្ស័យ ឈ្មោះផល ឆាយយ៉ា ភេទប្រុស អាយុ ២៥ឆ្នាំ ត្រូវជាកូនរបស់ជនរងគ្រោះ បានយកកាំបិតកាប់ ទៅលើឈ្មោះ សុខ មន ភេទប្រុស អាយុ ៥៦ឆ្នាំ ត្រូវជាឪពុកបង្កើត បណ្តាលអោយដេកស្លាប់ក្នុងថ្លុកឈាម មូលហេតុ ខឹងឪពុកមកពីផឹកស្រាស្រវឹងជេរអ្នកនៅផ្ទះ។ ក្រោយធ្វើសកម្មភាពរួចជនសង្ស័យបានរត់គេចខ្លួនបាត់តែម្តង ៕ វ៉ៃកូ
