មង្គលការមួយនៅក្នុងប្រទេសចិន បានបង្កឲ្យមានការភ្ញាក់ផ្អើលខ្លាំងតែម្តង នោះក៏ព្រោះថា ខណៈពិធីជប់លៀងកំពុងប្រព្រឹត្តយ៉ាងសប្បាយរីករាយ ស្រាប់តែស្រ្តីប្លែកមុខម្នាក់ បានចូលមកអុកឡុក ហើយអ្វីដែលញាក់សាច់នោះ គឺស្រ្តីរូបនោះបានចាប់កូនកំលោះធ្វើជា «ចំណាប់ខ្មាំង» ដើម្បីទាមទារលុយចំណងដៃ។
ជាក់ស្តែង តាមរយៈវីដេអូដែលត្រូវបានរីករាលដាលនៅលើបណ្តាញសង្គមចិន បានបង្ហាញស្រ្តីរូបនោះបានលុតជង្គង់ចាប់ជើងរបស់កូនកំលោះយ៉ាងណែន ហើយបដិសេធមិនព្រមទៅណាទេ លុះត្រាតែនាងទទួលបានស្រោមសំបុត្រក្រហម (លុយចំណងដៃ)។
ទោះបីជាមានការខិតខំប្រឹងប្រែងរបស់ភ្ញៀវក្នុងការបញ្ចុះបញ្ចូលឱ្យចាកចេញក៏ដោយ ក៏ស្ត្រីរូបនោះបានទទូចឱ្យផ្តល់លុយ ទើបនាងចាកចេញ។ ហេតុនេះ ដោយគ្មានជម្រើសអ្វី គ្រួសារកូនកំលោះកូនក្រមុំ ក៏បានសម្រេចចិត្តផ្តល់លុយឱ្យ ហើយស្រ្តីរូបនេះក៏បានដោះលែងជើងកូនកំលោះ រួចដើរចាកចេញដោយមិនបង្កការរំខានបន្ថែមទៀតទេ។
យោងតាមសេចក្តីរាយការណ៍ ហេតុការណ៍នេះបានកើតឡើងនៅក្នុងទីក្រុង Suqian ខេត្ត Jiangsu ប្រទេសចិន។ ហើយស្ត្រីដែលចូលរោងការ «តោង» ជើងកូនកំលោះ ដើម្បីទាមទារលុយនោះ គឺមិនមែនជាសាច់ញាតិ ឬមិត្តភក្តិរបស់កូនកំលោះទេ ពោលគឺស្រ្តីរូបនេះគឺជាមនុស្សចម្លែកសម្រាប់មនុស្សគ្រប់គ្នា ដែលបានមកចូលរួមក្នុងពិធី។
សាក្សីម្នាក់បាននិយាយថា៖ «ភ្ញៀវផ្សេងទៀតបានព្យាយាមលួងលោមនាងឱ្យក្រោកឈរ ប៉ុន្តែនាងបញ្ជាក់យ៉ាងម៉ឺងម៉ាត់ថា នាងនឹងមិនចាកចេញទេ រហូតទាល់តែនាងទទួលបានស្រោមសំបុត្រក្រហម។ ទីបំផុត អ្នករាល់គ្នាគ្មានជម្រើសអ្វីក្រៅពីផ្តល់ប្រាក់ 50 យន់ ដល់នាង។ បន្ទាប់មក នាងបានយល់ព្រមលែងជើងកូនកំលោះហើយចាកចេញ»។
ទោះជាយ៉ាងណា ក្រោយពីបានឃើញបែបនេះ អ្នកនិយមលេងអ៊ីនធើរណែតជាច្រើន បានសម្តែងការហួសចិត្តថា៖ «៥០យន់មិនច្រើនទេ ប៉ុន្តែខ្ញុំស្អប់មនុស្សបែបនេះ, ខ្ញុំមានអារម្មណ៍ខ្មាសជំនួសកូនកំលោះណាស់, នេះគឺជាទម្លាប់ដ៏អាក្រក់, មនុស្សបែបនេះគួរតែរាយការណ៍ទៅប៉ូលីស,…»៕ រក្សាសិទ្ធិដោយ៖ លឹម ហុង
