អ្នកស្រី Vien អាយុជាង ៦០ ឆ្នាំ រស់នៅទីក្រុង Dong Quan ខេត្ត Guangdong ប្រទេសចិន មានជីវភាពលំបាកខ្លាំង បន្ទាប់ពីប្តីរបស់គាត់បានស្លាប់ ហើយគាត់ត្រូវរែកពន់បន្ទុកគ្រួសារទាំងមូល ដោយត្រូវធ្វើការរកស៊ីជាច្រើន ដើម្បីមានលុយចិញ្ចឹមកូន។ ទោះជាយ៉ាងនេះក្តី កូនប្រុសតែមួយរបស់ស្រ្តីចំណាស់ដ៏កំសត់រូបនេះឈ្មោះ Sinh Cuong បែរជាមិនជួយខិតខំរកស៊ីម្តាយ ដោយតែងតែដើរលេងមិនខ្វល់ពីការសិក្សា។ ធំឡើង រូបគេមិនមានការងារស្ថិរភាពទេ ហើយចំណាយពេលពេញៗមួយថ្ងៃនៅទំនេរ ដើរបង្កបញ្ហា។
ដោយដឹងថា មិនអាចពឹងផ្អែកលើកូនប្រុសបាន អ្នកស្រី Vien បានបើកតូបលក់ដូរតូចមួយ ហើយឆ្លៀតដើររើសអេតចាយ ដើម្បីរកលុយផ្សែផ្សំបន្ថែម។ ផ្ទះតូចដែលអ្នកស្រី Vien កំពុងរស់នៅ គឺមានលក្ខណៈបុរាណបំផុតដោយមានតែមួយជាន់ ដំបូលធ្លុះធ្លាយ ជញ្ជាំងប្រេះ និងគ្រឿងសង្ហារិមចាស់ខ្លាំង។ ទោះជាយ៉ាងណា ស្ត្រីចំណាស់រូបនេះមិនស្វែងរកជីវិតប្រសើរជាងនេះទេ មានតែសង្ឃឹមថា កូនប្រុសរបស់គាត់នឹងមិនបង្កបញ្ហាដល់គាត់ទៀតទេ ហើយជួយរកលុយម្តាយ។ តែអ្វីដែលស្ត្រីចំណាស់ម្នាក់នេះព្រួយបារម្ភ នៅទីបំផុតបានកើតឡើង។
យោងតាមប្រភពព័ត៌មានបានឲ្យដឹងថា គេមិនច្បាស់ទេថា នៅពេលណាដែល Lam Sinh Cuong បានជួបបុរសម្នាក់ឈ្មោះ Liu Li ដែលបុគ្គលនេះគឺជាម្ចាស់ធនាគារឯកជន ដែលមានឯកទេសក្នុងសកម្មភាពហិរញ្ញវត្ថុខុសច្បាប់។
ថៅកែម្នាក់នេះមាននាមត្រកូល Liu តែងតែប្រើប្រាស់កាតធនាគារ ឬសេវាផ្ទេរប្រាក់តាមអ៊ីនធឺណិត ប្រតិបត្តិការសាច់ប្រាក់ និងវិធីសាស្រ្តជាច្រើនទៀត ដើម្បីធ្វើការផ្ទេរប្រាក់ឆ្លងប្រទេស និងទទួលបានប្រាក់ចំណេញខ្ពស់។ ដោយទាក់ទាញតាមការអូសទាញរបស់លោក Liu កូនប្រុសរបស់អ្នកស្រី Vien លោក Lam Sinh ក៏បានក្លាយជា «អ្នករត់ការ» យ៉ាងឆាប់រហ័សសម្រាប់បុគ្គលនេះ។
ចាប់ពីពេលនោះមក ជីវិតកូនប្រុសរបស់អ្នកស្រី Vien ចាប់ផ្ដើមប្រសើរឡើង។ Lam Sinh បានចំណាយលុយដូចទឹកទិញខោអាវម៉ាកល្បីៗ និងបើកឡានទំនើបៗ ដោយមិនដឹងថា គ្រោះមហន្តរាយហៀបនឹងវាយប្រហារគ្រួសារគាត់នោះទេ។
នៅឆ្នាំ ២០២៣ ខណៈពេលដែលការស៊ើបអង្កេតករណីដែលទាក់ទងនឹងការផ្ទេរប្រាក់ឆ្លងប្រទេស និងការលាងលុយកខ្វក់ ប៉ូលីសក្វាងទុង បានរកឃើញថាធនាគាររបស់ Liu Li មានសញ្ញានៃការរំលោភធ្ងន់ធ្ងរ។ តាមរយៈតម្រុយដែលប្រមូលបាន ប៉ូលិសបានកំណត់អត្តសញ្ញាណលោក Lam Sinh យ៉ាងឆាប់រហ័សថាជា «អ្នកក្រោមបង្គាប់» ដ៏មានប្រសិទ្ធភាពម្នាក់របស់ថៅកែ Li ។ ក្រោយពីមានភស្តុតាងគ្រប់គ្រាន់នៃបទល្មើសហើយ ប៉ូលិសបានសម្រេចចាប់ខ្លួនជនសង្ស័យពីរនាក់នេះគឺ Liu Li និង Lam Sinh ដើម្បីស៊ើបអង្កេតករណីនេះ។
ប៉ូលីសជំនាញមួយក្រុម ត្រូវបានបញ្ជូនទៅកាន់មូលដ្ឋានដែលជាកន្លែងមុខសញ្ញាទាំងពីរនេះស្នាក់នៅ ដើម្បីស្វែងរកលំនៅដ្ឋាន និងទ្រព្យសម្បត្តិរបស់ពួកគេ។ ប៉ូលីសបានរកឃើញយ៉ាងងាយស្រួលនូវកន្លែងដែល Liu កំពុងលាក់ខ្លួន ហើយចាប់ខ្លួនមនុស្សនេះ។ ទោះជាយ៉ាងណា Lam Sinh មានល្បិចកលជាង គាត់មិនមានទីលំនៅស្ថិតថេរនោះទេ ដូច្នេះការស្វែងរកកន្លែងលាក់ខ្លួនរបស់មនុស្សនេះគឺពិបាកណាស់។
ទោះជាយ៉ាងណា ទីបំផុត បន្ទាប់ពីសួរនាំអ្នកជិតខាង ប៉ូលីសបានដឹងថា ពេលខ្លះ Lam Sinh បានត្រឡប់ទៅផ្ទះម្តាយរបស់គាត់ ហើយស្នាក់នៅមួយរយៈ រួចក៏ចាកចេញទៅវិញ។ ជាមួយនឹងព័ត៌មាននេះ ប៉ូលីសបានសង្ស័យថា រូបគេកំពុងលាក់លុយ ឬលាក់ខ្លួននៅផ្ទះម្តាយរបស់គេ ទើបពួកគេសម្រេចចិត្តធ្វើការឆែកឆេរផ្ទះអ្នកស្រី Vien។
ពេលប៉ូលិសទៅដល់ ស្ត្រីវ័យ៦០ឆ្នាំរូបនេះ ពិតជាមានការភ្ញាក់ផ្អើលជាខ្លាំង ដោយមិនយល់ថាមានអ្វីកើតឡើង។ ប៉ូលីសបានប្រាប់គាត់ថា ពួកគេកំពុងស៊ើបអង្កេតលើករណីដែលពាក់ព័ន្ធនឹងបទល្មើសដែលមានឯកទេសក្នុងសកម្មភាពហិរញ្ញវត្ថុខុសច្បាប់ ហើយកូនប្រុសរបស់អ្នកស្រី លោក Lam Sinh គឺជាជនសង្ស័យម្នាក់ក្នុងចំណោមជនសង្ស័យជាបក្ខពួក។
ឮដូច្នេះ អ្នកស្រី Vien មិនជឿនូវអ្វីដែលប៉ូលិសនិយាយនោះទេ ប៉ុន្តែនៅតែយល់ព្រមឲ្យសមត្ថកិច្ចធ្វើការឆែកឆេរផ្ទះ។ ដំបូងឡើយ ប៉ូលិសរកមិនឃើញអ្វីគួរឲ្យសង្ស័យនោះទេ ខណៈផ្ទះស្ត្រីចំណាស់តូចទ្រុឌទ្រោម គ្មានកន្លែងលាក់លុយនោះទេ។ ទោះជាយ៉ាងណា ពេលប៉ូលិសរៀបនឹងចេញទៅវិញ ស្រាប់តែរកឃើញព័ត៌មានលម្អិត។
យោងតាមសក្ខីកម្ម Lam Sinh តែងតែទាក់ទងជាមួយលុយយ៉ាងច្រើននៅពេលកំពុងធ្វើកិច្ចការឱ្យ Liu Li ។ ដោយសារភាពលោភលន់ពេក គាត់គិតរកវិធីដកលុយចៅហ្វាយខ្លួនឯង។ ទោះជាយ៉ាងណាក៏ដោយ ដោយសារតែគាត់មិនហ៊ានទុកលុយនោះនៅជាប់ខ្លួន ឬដាក់ក្នុងធនាគារ ទើប Lam Sinh គិតចង់លាក់លុយនៅផ្ទះម្តាយ ដើម្បីសុវត្ថិភាព ដោយរូបគេបានប្រគល់លុយឱ្យម្តាយទុក ហើយសុំកុំឱ្យប្រាប់អ្នកណាឲ្យសោះ។
ដោយសារតែអ្នកស្រី Vien ខ្វះការយល់ដឹង ទើបគាត់ចេះតែស្តាប់កូនគាត់។ ស្ត្រីចំណាស់នេះមិនដែលគិតពីបញ្ហា ឬគ្រោះថ្នាក់ដែលលុយទាំងនោះនឹងនាំទុកដល់គាត់នោះទេ។ ក្នុងពេលសួរចម្លើយ ប៉ូលិសបានបង្ហាញភ័ស្តុតាងចោទប្រកាន់លោក Lam Sinh ពីបទរំលោភច្បាប់។ ជាមួយគ្នានេះ រូបគេក៏ត្រូវបានស្តីបន្ទោសចាស់ដៃ ចំពោះមុខសញ្ញានេះ ដែលបានទាញយកប្រយោជន៍ពីការជឿទុកចិត្ត និងសេចក្តីស្រឡាញ់របស់ម្តាយ ដែលធ្វើឱ្យម្តាយមានបញ្ហា។
ក្រោយមក Lam Sinh បានសារភាពកំហុសរបស់ខ្លួន ហើយបានសុំទោសម្តាយ។ ទោះជាយ៉ាងណា ទាក់ទិននឹងករណីអ្នកស្រី Vien ជួយរក្សាទុកលុយខុសច្បាប់នោះ ប៉ូលិសបានសម្រេចផ្ដន្ទាទោសស្ត្រីចំណាស់ម្នាក់នេះកម្រិតស្រាលប៉ុណ្ណោះ។ ទន្ទឹមនឹងនោះ ពួកគេក៏បានជួយនាងដាក់ពាក្យសុំប្រាក់ឧបត្ថម្ភការរស់នៅ និងការធានារ៉ាប់រងសុខភាព ដើម្បីមានជីវិតកាន់តែប្រសើរឡើងផងដែរ។
ចំណែកលោក Lam Sinh ត្រូវកាត់ទោសដាក់ពន្ធនាគារ និងពិន័យជាប្រាក់។ រីឯថៅកែ Liu និងបក្ខពួករបស់គាត់ផ្សេងទៀត ត្រូវបានផ្តន្ទាទោសជាប់គុកអស់មួយជីវិត។
ទាក់ទងករណីខាងលើនេះ គេអាចមើលឃើញថា ការលោភលន់ជាឫសគល់នៃអំពើបាប។ ដូច្នេះហើយ យើងទាំងអស់គ្នាគួរតែដឹងពីរបៀបគ្រប់គ្រងចំណង់លោភលន់របស់យើង។ ប្រសិនបើអ្នកបន្តព្យាយាមបង្វែរវត្ថុរបស់អ្នកដទៃមកជារបស់អ្នក មិនយូរមិនឆាប់ អ្នកនឹងត្រូវរៀនមេរៀនមួយនេះពុំខានឡើយ៕ រក្សាសិទ្ធិដោយ៖ លឹម ហុង
