ប៉ូលិសមូលដ្ឋានបាននិយាយថា កាលពីថ្ងៃទី២៧ ខែវិច្ឆិកា គ្រោះថ្នាក់ដ៏រន្ធត់មួយបានកើតឡើងនៅបន្ទប់តាំងបង្ហាញសម្លៀកបំពាក់មួយកន្លែង នៅក្នុងទីក្រុង Ghumar Mandi ប្រទេសឥណ្ឌា ។ ជនរងគ្រោះនៃឧបទ្ទវហេតុនេះត្រូវបានគេនិយាយថា ជាក្មេងស្រីអាយុ ៣ ឆ្នាំ មកពី Flower Enclave, Ludhiana។
យោងតាមប្រភពព័ត៌មានបានឲ្យដឹងថា នៅថ្ងៃកើតហេតុ កុមារីរងគ្រោះបានទៅបន្ទប់តាំងបង្ហាញសម្លៀកបំពាក់ជាមួយឪពុកម្តាយ ហើយបានដើរលេងនៅម្តុំច្រកចូលហាង ស្រាប់តែទ្វារកញ្ចក់បានរលំពីលើកន្លែងដែលក្មេងស្រីតូចនោះឈរទាំងកម្រោលតែម្តង។
អ្នកប្រើប្រាស់ Twitter ម្នាក់ដែលបានចែករំលែកវីដេអូនេះ បាននិយាយថា «យោងទៅតាមសាក្សី គឺខណៈដែលក្មេងស្រីកំពុងលេងជាមួយទ្វារ ស្រាប់តែគ្រោងទ្វារទាំងមូលបានដួលរលំលើ បណ្តាលឱ្យរងរបួសយ៉ាងធ្ងន់ធ្ងរ»។
ភ្លាមៗនោះ មនុស្សម្នានៅជុំវិញក្នុងហាងបានប្រទះឃើញហេតុការណ៍នេះ ក៏ប្រញាប់នាំក្មេងស្រីទៅកាន់មន្ទីរពេទ្យ Dayanand Medical College (DMCH)។ ទោះជាយ៉ាងណា ក្មេងស្រីរងគ្រោះត្រូវបានគ្រូពេទ្យបញ្ជាក់ថា បានស្លាប់យ៉ាងអាណោចអាធម ក្រោយកើតហេតុ។
ប៉ូលីសមានវត្តមាននៅកន្លែងកើតហេតុ និងធ្វើការស៊ើបអង្កេត។ អធិការ Vijay Kumar, SHO មកពីស្ថានីយ៍ប៉ូលីសផ្នែក 8 បាននិយាយថា ប៉ូលីសនឹងចាត់វិធានការ បន្ទាប់ពីការកត់ត្រាសេចក្តីថ្លែងការណ៍របស់ឪពុកម្តាយរបស់ក្មេងស្រីរងគ្រោះ។
ក្រោយវីដេអូនៃឧប្បត្តិហេតុទាំងមូលត្រូវបានបង្ហោះ អ្នកលេងបណ្តាញសង្គមមួយចំនួនបានសម្តែងការភ្ញាក់ផ្អើលចំពោះហេតុការណ៍នេះ និងទាមទារឱ្យមានការផ្តន្ទាទោសយ៉ាងតឹងរ៉ឹងចំពោះម្ចាស់ហាង។ ក្នុងនោះ មនុស្សមួយចំនួនបានលើកឡើងថា «ទន្ទឹមនឹងការធ្វេសប្រហែសរបស់ឪពុកម្តាយ នោះបន្ទប់តាំងបង្ហាញក៏បានបង្កើតកំហុសក្នុងការដំឡើងប្រព័ន្ធទ្វាររបស់ខ្លួន, វាជារឿងដ៏សោកសៅ ដែលម្ចាស់ហាងត្រូវតែទទួលទោសចំពោះការដំឡើងខុសបង្កគ្រោះថ្នាក់នេះ»៕ រក្សាសិទ្ធិដោយ៖ លឹម ហុង
