បុរសទេសចរវ័យក្មេងម្នាក់បានធ្វើឲ្យអ្នករួមដំណើរជាមួយស្លុតរន្ធត់យ៉ាងខ្លាំង បន្ទាប់ពីបុរសនោះរូបនោះ បានលោតសម្លាប់ខ្លួនពីផ្លូវដើរសសៀរជញ្ជាំងភ្នំដ៏សែនព្រឺព្រួច Hua San នៅក្នុងទីក្រុង Xi’an ខេត្ត Shaanxi ភាគពាយ័ព្យនៃប្រទេសចិន ។ មន្ត្រីបានរកឃើញសាកសពរបស់បុរសនោះ ដែលត្រូវបានគេជឿជាក់ថា ការស្លាប់ដ៏រន្ធត់របស់គាត់នេះ គឺជាលទ្ធផលនៃទង្វើអត្តឃាតសម្លាប់ខ្លួនតែម្តង ។
នៅថ្ងៃបន្ទាប់ទី២៦ កក្កដា មន្ត្រីបានបើកឃ្លីបវីដេអូនៃហេតុការណ៍នេះ ដោយបានបញ្ជាក់ថា ការដើរពុំមានបញ្ហានោះទេ ប៉ុន្តែ បុរសរូបនោះដែលស្ថិតក្នុងសម្លៀកបំពាក់អាវយឺតពណ៌ប្រផេះ បានស្រាយខ្សែក្រវ៉ាត់សុវត្ថិភាព និងលោតចុះដោយខ្លួនឯង នៅវេលាម៉ោង ៤ និង០០ នាទីល្ងាច ស្ថិតនៅចំពោះភ្នែកអ្នករួមដំណើរដទៃទៀតដែលមានស្លុតចិត្តយ៉ាងខ្លាំង ។ ការសន្និដ្ឋានជំហានដំបូង នោះករណីនេះជាទង្វើអត្តឃាត ។ ទោះយ៉ាងណា ការស៊ើបអង្កេតនៅតែបន្ត ហើយមន្ត្រីក៏បានព្យាយាមបញ្ជាក់ពីអត្តសញ្ញាណរបស់បុរសនោះផងដែរ ។
នៅខណៈពេលនោះផងដែរ មន្ត្រីក៏បានបញ្ជាឲ្យបិទផ្លូវដើរនោះបណ្តោះអាសន្ន ដើម្បីរឹតបន្តឹងសន្តិសុខបន្ថែម និងកែប្រែផ្នែករដ្ឋបាល ដោយតម្រូវឲ្យភ្ញៀវទេសចរទាំងអស់ត្រូវតែចុះឈ្មោះរបស់ពួកគេជាមុន ។
គួរបញ្ជាក់ថា ភ្នំ Hua San គឺជាភ្នំមួយក្នុងចំណោមភ្នំចំនួន ៥ នៅក្នុងប្រទេសចិន ដែលមានកម្ពស់ ២០០០ ម៉ែត្រ ដ៏ល្បីល្បាញមួយនៅលើពិភពលោក ដែលបានទាក់ទាញភ្ញៀវទេសចរចូលចិត្តដំណើរកម្សាន្តដ៏ព្រឺព្រួចនេះ ។ វាក៏ជាភ្នំដ៏ល្បីមួយដែលមានផ្លូវដើរឡើងចុះដ៏គ្រោះថ្នាក់ និងវែងបំផុតនៅក្នុងតំបន់ ៕ ឧត្តម (khaosod)
