វីដេអូកាមេរ៉ាសុវត្ថិភាព ដែលថតបានពីទិដ្ឋភាពចោរមួយក្រុមជិះសុទ្ធតែឡានទំនើប ដើរ «ប្រមាញ់» សត្វឆ្កែ នៅសងខាងផ្លូវ បានកំពុងបង្កការខឹងសម្បារយ៉ាងខ្លាំង នៅក្នុងសង្គមអនឡាញវៀតណាម។
តាមរយៈវីដេអូដែលបានបង្ហោះ ហេតុការណ៍នេះបានកើតឡើងនៅវេលាម៉ោង១រំលងអាធ្រាត្រ ឈានចូលថ្ងៃទី៩ ខែធ្នូ ឆ្នាំ២០២៣ ដែលខណៈពេលនោះ គេបានឃើញរថយន្តស៊េរីទំនើប១គ្រឿង បានបើកថយក្រោយបន្តិចៗនៅលើផ្លូវតូចមួយ។
លុះចូលទៅជិតឆ្កែដែលឈរនៅចិញ្ចើមផ្លូវ បុរសម្នាក់ដែលអង្គុយកៅអីក្រោយរថយន្ត បានប្រើឧបករណ៍ម្យ៉ាងដែលមានគ្រាប់ដូចជាផ្លែធ្នូដ៏មានឥទ្ធិពល បាញ់សំដៅឆ្កែបណ្ដាលឲ្យដេកដួលទៅនឹងដីភ្លាមៗ ដែលសូម្បីសំឡេងស្រែកបង្កការរំខានក៏គ្មានដែរ។ បន្ទាប់មក បុរសម្នាក់ដែលអង្គុយនៅកៅអីខាងមុខរថយន្ត ក៏បានប្រញាប់ប្រញាល់ចេញមកចាប់សត្វដ៏កំសត់នោះ ហើយបោះចូលទៅក្នុងរថយន្ត។
អ្វីដែលសំខាន់នោះ គឺសកម្មភាពទាំងស្រុងរបស់ពួកគេ ប្រព្រឹត្តទៅយ៉ាងលឿនបំផុត ដោយមានរយៈពេលត្រឹមតែ ២០ វិនាទីប៉ុណ្ណោះ។
ពេលដែលវីដេអូនេះត្រូវបានគេបង្ហោះបានធ្វើឱ្យផ្ទុះកំហឹងពេញបណ្ដាញសង្គម។ មនុស្សជាច្រើនបានរិះគន់ទង្វើរបស់បុរសមួយក្រុមនេះ និងបានក្រើនរំលឹកគ្នាទៅវិញទៅមកឱ្យមើលថែសត្វចិញ្ចឹមរបស់ពួកគេ ដោយប្រុងប្រយ័ត្ន។ អ្នកប្រើប្រាស់អ៊ីនធឺណេតបាននិយាយថា «បន្ទាប់ពីមើលវីដេអូឃ្លីបនេះ ខ្ញុំអាណិតឆ្កែខ្លាំងណាស់ ខ្ញុំកាន់តែអាក់អន់ចិត្តនឹងចោរប្លន់ទាំងនោះ។ ឃើញឆ្កែដេកនៅលើដីពិតជាគួរអោយអាណិតណាស់ គួរតែថ្កោលទោសមនុស្សអាក្រក់ទាំងនេះ»៕ រក្សាសិទ្ធិដោយ៖ លឹម ហុង
