តាម Daily Mail ព្រឹត្តិការណ៍ក្រៅ “កម្មវិធី” បានកើតឡើងគ្រាដែលលោក Tao អាយុ ៤៥ឆ្នាំ កំពុងសម្តែងសៀកនៅជំរំក្រពើ Phokkathara នាខេត្តឈៀងរ៉ៃ ភាគខាងជើងប្រទេសថៃ មានអ្នកទស្សនាជិត ១០០នាក់ កាលពីថ្ងៃទី ២៩ ខែកក្កដា ។
បន្ទាប់ពីលូកដៃចូលក្នុងមាត់ក្រពើ ដែលកំពុងហាមាត់ស្រាប់ លោក Tao ងាកមកសម្លឹងមើលទស្សនិកជន រួចសំណូមពរឲ្យអ្នករៀបចំកម្មវិធីបិទភ្លេង ។ វេលានោះឯងដែលក្រពើ១ក្បាលនេះ បានធ្វើការត្របាក់យកដៃរបស់គាត់ ហើយចាប់ទាញ់វក់វី ។
លោក Tao ស្រែកព្រោះឈឺចាប់ខ្លាំង និងប្រឹងប្រែងដកដៃចេញមកវិញ ។ ឈាមបានហូរធ្លាក់ចុះលើឥដ្ឋ ហើយគាត់ក៏ដើរចូលទៅក្រោយឆាក ។
ទិដ្ឋភាពទាំងស្រុង នៃឆាកសម្តែងគួរឲ្យតក់ស្លុតនេះ ត្រូវបានថតជាប់ក្នុងកាមេរ៉ារបស់ Khun Phusawit ដែលជាទស្សនិកជន បានមកទីនេះ ជាមួយភរិយា និងកូន២នាក់ ។
សាក្សីឲ្យដឹងថា ទស្សនិកជនពិតជាតក់ស្លុតខ្លាំងណាស់ រីឯក្មេងៗវិញ វាពិតជាស្រែកទ្រហឹង ព្រោះភ័យខ្លាំងពេក ។
Dorg Wihawat ដែលជាថៅកែទីនោះ ប្រាប់ថា លោក Tao កំពុងព្យាបាលរបួស ហើយសុខភាពលោកប្រក្រតីវិញហើយ ។ លោកជាអ្នកស្រឡាញ់ក្រពើ តែនេះជាគ្រោះថ្នាក់ “អាជីព” ដ៏កម្រកើតមានណាស់ ៕ ចន្ទ្រា