ជនជាប់ឃុំឈ្មោះ Nazri bin Hassan អាយុ ៣៣ ឆ្នាំ បានរត់គេចខ្លួនពីគុកដោយសុវត្ថិភាព បន្ទាប់ពីបានឆ្លៀតឱកាស នៅពេលដែលបុគ្គលិកចាក់សោរកំពុងនាំពួកគេចំនួន៣នាក់ ទៅកាន់បន្ទប់សួរចម្លើយនៅម៉ោងប្រហែល ១២ និង ៣០ នាទី ថ្ងៃត្រង់។
នៅក្នុងវីដេអូ CCTV បានបង្ហាញបុគ្គលិកចាក់សោ នាំអ្នកជាប់ឃុំចំនួន ៣ នាក់ ទៅកាន់បន្ទប់សួរចម្លើយ។ នៅពេលនោះ អ្នកទោសទាំង៣ បានឈរនៅខាងក្រៅតំបន់ទ្វារចម្រឹងដែក ខណៈបុគ្គលិកចាក់សោចូលទៅក្នុងដើម្បីបើកទ្វារមួយផ្សេងទៀត។ តែអ្វីដែលគួរឲ្យភ្ញាក់ផ្អើលនោះ គឺនៅពេលឃើញបុគ្គលិកកំពុងជាប់រវល់ ស្រាប់អ្នកទោសម្នាក់នៅខាងស្តាំ ក្នុងចំណោម៣នាក់ បានឆក់យកឱកាស ឡើងតាមចម្រឹងដែកយ៉ាងលឿន ឆ្ពោះទៅកាន់ដំបូលអគារពន្ធនគារ។ ពេលបុគ្គលិកចាក់សោ បានដឹងពីករណីនេះ អ្នកទោសរូបនោះបានឡើងដល់លើដំបូលទៅហើយដែលមិនអាចដេញតាមទាន់។
បន្ទាប់មក បុគ្គលិកចាក់សោរក៏នាំអ្នកជាប់ឃុំ ២នាក់ទៀត យ៉ាងលឿនចូលទៅក្នុងចន្លោះច្រកទ្វារចម្រឹងដែក និងបន្ទប់សួរចម្លើយ រួចចាក់សោពួកគេ ហើយប្រញាប់ប្រញាល់រត់ទៅខាងក្រៅទ្វារ ដើម្បីជូនដំណឹងដល់មន្ត្រីផ្សេងទៀត។
ទាក់ទងករណីនេះ ស្នងការរងប៉ូលិស Sabah លោក Datuk Shahurinain Jais បាននិយាយថា បន្ទាប់ពីអ្នកជាប់ឃុំបានឡើងលើទ្វារចម្រឹងដែក រូបគេក៏បានដើរសសៀរលើគែមបង្អួចពីលើកន្លែងកម្សាន្តមួយ ហើយបានចេញពីអគារដោយឡើងលើរបងផ្លោះទៅខាងក្រៅតែម្តង។
បុគ្គលិកនៅមន្ទីរឃុំឃាំង Kepayan បានដេញតាម ប៉ុន្តែមិនអាចចាប់ខ្លួនអ្នកទោសរូបនេះបានទេ ខណៈដែលរូបគេបានរត់ចូលទៅក្នុងតំបន់ដែលមានគុម្ពោតព្រៃនៅក្បែរនោះបាត់ទៅហើយ។
ការតាមប្រមាញ់អ្នកទោសដែលបានឆ្លៀតឱកាសរត់គេចខ្លួនរូបនេះ ត្រូវបានធ្វើឡើងភ្លាមៗ ដោយប៉ូលិសបានបើកប្រតិបត្តិការមួយដែលឈ្មោះថា «Op Tutup» ។
គួរឲ្យដឹងផងដែរថា អ្នកទោសរូបនេះត្រូវបានដាក់នៅបន្ទប់ឃុំឃាំងពន្ធនាគារ ចាប់តាំងពីថ្ងៃទី១០ ដល់ថ្ងៃទី១៨ ខែធ្នូ ដើម្បីធ្វើការស៊ើបអង្កេតតាមមាត្រា ៤៣១A នៃក្រមព្រហ្មទណ្ឌ ដែលប្រព្រឹត្តអំពើទុច្ចរិត ដោយបានកាត់ខ្សែតេឡេក្រាម ខ្សែប្រៃសណីយ៍ ឬឧបករណ៍សម្រាប់ផ្តល់សញ្ញាទូរគមនាគមន៍៕ រក្សាសិទ្ធិដោយ៖ លឹម ហុង
