ម្តាយជនជាតិចិនម្នាក់ រស់នៅក្នុងទីក្រុង Guangan ខេត្ត Sichuan ពិតជាស្រឡាំងកាំងយ៉ាងខ្លាំង បន្ទាប់ពីបានឃើញកូនស្រីអាយុ ៥ ឆ្នាំ ត្រឡប់មកពីសាលាមត្តេយ្យវិញ ជាមួយនឹងកាដូពិសេសពីមិត្តរួមថ្នាក់ ដែលមិនមែនជាស្ទីកឃ័រ ឬអាហារសម្រន់អ្វីទេ ប៉ុន្តែរបស់នោះ គឺជាដុំមាសដ៏មានតម្លៃបំផុត។
ស្រ្តីជាម្តាយបានបង្ហើបថា នាងមានកូនស្រីអាយុ៥ឆ្នាំម្នាក់ ដែលកំពុងរៀនថ្នាក់មត្តេយ្យ។ ប៉ុន្តែ នៅថ្ងៃមួយ គឺនៅពេលកូនស្រីរបស់នាងត្រលប់មកពីសាលារៀនវិញ បានធ្វើឲ្យរូបនាងជាម្តាយពិតជាមានការងឿងឆ្ងល់យ៉ាងខ្លាំង បន្ទាប់ពីបានសង្កេតឃើញប្រអប់ក្រហមចម្លែកមួយនៅក្នុងកាបូបសិស្សរបស់កូនស្រី។ ដំបូងឡើយ ស្រ្តីជាម្ដាយបានគិតតថា វាជាស្ទីគ័រ ឬអាហារសម្រន់ដែលកូនស្រីតែងតែទិញមកពីសាលាឲ្យនាង ប៉ុន្តែពេលនាងបើកវា នាងពិតស្រឡាំងកាំង ព្រោះថានៅក្នុងប្រអប់នោះមានដុំមាសដ៏ភ្លឺចាំងចំនួន២ដុំ ដែលជាកាដូរបស់មិត្តរួមថ្នាក់ប្រុសម្នាក់ ទើបតែបានឲ្យកូនស្រីរបស់នាង។ នៅលើដុំមាសនីមួយៗមានអក្សរចារឹកបួនតួអក្សរដែលសរសេរថា «មាសចិន» ។ ហើយពេលនាងលើកមកពិនិត្យមើល ក៏ឃើញថាមាសនោះមានទម្ងន់ដ៏មិនធម្មតា ដែលពិតជាធ្វើឱ្យនាងភ័យស្លន់ស្លោខ្លាំង។
ដោយសារនាងមិនចង់ជឿថាមាននរណាម្នាក់យកវាមកឲ្យកូនពិតប្រាកដ ម្ដាយក៏សួរម្ដងទៀតថា៖ «តើកូនស្រីប្រាកដជាមិត្តរបស់កូនឲ្យវាមែនទេ?»។ ពេលទទួលបានការបញ្ជាក់ពីកូនស្រី ភ្លាមៗនោះ ម្តាយក៏បានទាក់ទងទៅឪពុកម្តាយរបស់ក្មេងប្រុសនោះ ដើម្បីយកមាសទម្ងន់ ២០០ ក្រាម មកប្រគល់ជូនវិញ តាមរយៈគ្រូបង្រៀនរបស់ពួកគេ។
ទោះជាយ៉ាងនេះក្តី ម្តាយបានស្រឡាំងកាំងម្តងទៀត នៅពេលដែលឮការពន្យល់ពីឪពុកម្តាយរបស់ក្មេងប្រុសនោះ ដោយពួកគេបានប្រាប់ឲ្យដឹងថា តាមពិតទៅ មាសទាំងនេះគឺជាកំណប់ទ្រព្យដែលឪពុកម្តាយរៀបចំឲ្យកូនប្រុស ដើម្បីជូនដល់អនាគតប្រពន្ធ។ ប៉ុន្តែមិននឹកស្មានដល់ថា ថ្លៃបណ្ណាការដែលបានរៀបចំ បែរជាត្រូវបានកូនប្រុសប្រើប្រាស់ ខណៈពួកគេមានអាយុត្រឹមតែ៥ឆ្នាំប៉ុណ្ណោះ ដែលធ្វើឱ្យអ្នកម្តាយទាំងសងខាងអស់សំណើចយ៉ាងខ្លាំង។ ឪពុកម្តាយរបស់ក្មេងស្រីបាននិយាយកំប្លែងលេងថា «ខ្ញុំមិនដែលគិតថាមាននរណាម្នាក់មកសុំកូនស្រីរបស់ខ្ញុំលឿនបែបនេះទេ»។
គួរឲ្យដឹងផងដែរថា សម្រាប់តម្លៃមាសក្នុងទីផ្សារប្រទេសចិន គេបានរកឃើញថា មាសទាំងពីរដុំមានតម្លៃប្រមាណ ៩៥,៨០០ យន់ (ប្រហែល ១៣,០០០ ដុល្លារ)។ ហេតុនេះ វាពិតជាកាដូដ៏ថ្លៃថ្លាសម្រាប់កុមារីមត្តេយ្យម្នាក់នេះ៕ រក្សាសិទ្ធិដោយ៖ លឹម ហុង
