Tuesday, April 16, 2024

ទំនាក់ទំនង : 0716140005

Address : #16 (Borey New World) St. 6A sk . Phnom Penh Thmey kh. Sen Sok ct., Phnom Penh 120913 Office: +85523232725 Tel: 017 93 61 91

ត្រឡប់​ពី​ធ្វើការ​នៅ​ក្រៅ​ប្រទេស​ស្ងា​ត់​ៗ កូនស្រី​បន្លំ​ខ្លួន​ធ្វើ​អ្នក​ទិញ ទៅកាន់​ម្តាយ​កំពុង​អង្គុយ​លក់​កំពឹស​ក្នុង​ផ្សារ ធ្វើឲ្យ​ម្ដាយ​រំភើបចិត្ត​ខ្លាំង​ទប់ទឹក​ភ្នែក​មិ​ន​ជាប់

spot_img

សម្រាប់ឪពុកម្តាយ គឺគ្មានអ្វីសប្បាយចិត្តដូចថ្ងៃដែលបានឃើញកូនម្តងទៀត នៅពេលពួកគេវិលត្រឡប់ពីសាលារៀន ឬធ្វើការនៅឆ្ងាយផ្ទះនោះទេ។ ហើយទន្ទឹមនឹងនោះ ទឹកភ្នែក​នៃ​ភាព​រីករាយក៏​បាន​​ស្រក់ហូរ ព្រោះ​​មិន​អាច​បង្ហាញ​ចេញ​ជា​ពាក្យ​សម្ដី។

គេហទំព័រ SAOstar របស់​ប្រទេស​វៀតណាម​ បាន​រាយការណ៍​ថា ស្ត្រី​វ័យ​ក្មេង​ម្នាក់​ដែល​បាន​ធ្វើ​ការ​នៅ​ប្រទេស​ជប៉ុន​ជា​យូរ​មក​ហើយ​បាន​សម្រេច​ចិត្ត​ត្រឡប់​ទៅ​ផ្ទះ​ដើម្បី​ទៅ​លេង​ម្តាយ​របស់​នាង ​ដោយ​មិន​បានឲ្យដឹងដំណឹងជាមុននោះទេ ហើយ​បង្កើត​ឱ្យ​មាន​ការ​ភ្ញាក់​ផ្អើល ​បន្ទាប់​ពី​ត្រឡប់​ទៅ​ប្រទេស​វៀតណាម​វិញ ដោយរូបនាងជាកូនស្រី ​និង​មិត្ត​ភក្តិ​ដែល​ថត​ឃ្លីប​ ​បាន​ទៅ​កន្លែង​លក់​របស់​ម្តាយ​ភ្លាម ​ដើម្បីចង់​សាកទឹកចិត្តគាត់។

នារី​វ័យ​ក្មេង​នោះ​បានស្លៀកពាក់ជិតៗ រួមទាំងមានពាក់មួកទម្លាក់ចុះក្រោមបាំងភ្នែក និងពាក់ម៉ាស់ ដើរចូលសួររកទិញកំពឹស និងត្រីល្អិត ខណៈ​ដែល​ស្រ្តីជាម្តាយ​នៅ​មិន​ទាន់​ដឹង​ថា​ជា​កូន​ស្រី​របស់​គាត់​នោះ គាត់​បាន​បន្ត​ណែនាំ​របស់​សម្រាប់​លក់។ លុះពេលច្រកកំពឹសចូលទៅក្នុងថង់រួច នារីរូបនោះក៏​បានហុចលុយជប៉ុនឲ្យ ធ្វើ​ឱ្យ​ស្រ្តីជាម្តាយ​មានការ​សង្ស័យ ហើយ​ចាប់ផ្តើម​សួរ​ថា «​នេះ​លុយ​អី​?»។ ភ្លាមៗនោះ កូនស្រីដែលក្លែងខ្លួនធ្វើជាអ្នកទិញ បានឆ្លើយថា «លុយជប៉ុន»។

ស្រ្តីជាម្តាយបានបន្តសួរថា «លុយជប៉ុន តើនាងមកពីគ្រួសារណាដែរ?»។

ពេល​នោះ នារី​វ័យក្មេងដោយអត់ទ្រាំនឹងអារម្មណ៍រំភើបនៅពេលបានជួបម្ដាយតទៀតមិនបាន ក៏បាន​ប្រញាប់ស្ទុះចូលទៅឱបម្ដាយដោយក្ដីនឹករឮកជាទីបំផុត ហើយ​សួរ​ថា «​ម៉ាក់ៗ ​គឺ​កូនណា ​ម៉ាក់អត់ចាំសំឡេងខ្លួនមែនទេ​​?»។ ពេល​នោះ​ទាំង​ម្តាយ​និង​កូន​ស្រី បាន​ឱប​គ្នា​យំ​នៅ​កណ្តាល​ផ្សារ ហើយ​ម្តាយ​មិន​អាច​និយាយ​អ្វី​បាន​ទេ ដោយគាត់​បាន​ត្រឹម​ឱប​កូន​ស្រី និង​ជូត​ទឹក​ភ្នែកប៉ុណ្ណោះ។

ពេល​អ្នកជិតខាង​ឃើញ ​ក៏​សួរថា​មានរឿង​អី​កើតឡើង​។ ស្រ្តីជាម្តាយប្រាប់គេឯងថា «កូនស្រីរបស់ខ្ញុំបានមកផ្ទះ»។

ភ្លាមៗនោះ វីដេអូឃ្លីបនេះត្រូវបានបង្ហោះនៅលើបណ្ដាញសង្គម TikTok ហើយទទួលបានការចាប់អារម្មណ៍យ៉ាងខ្លាំងនៅលើអ៊ីនធឺណិត។ មនុស្ស​ជា​ច្រើន​ក៏បានរំជួលចិត្តតាម បន្ទាប់ពីបានឃើញការជួបជុំគ្នារវាងម្តាយនិងកូនស្រី ដែលបានឃ្លាតឆ្ងាយពីគ្នាច្រើនឆ្នាំបែបនេះ។

អ្នកលេងបណ្តាញសង្គមជាច្រើន បានចូលខមិនថា៖ «ទិដ្ឋភាពនេះធ្វើឲ្យខ្ញុំស្រក់ទឹកភ្នែក រាល់ពេលដែលខ្ញុំមើលពួកគេ ខ្ញុំ​ស្រឡាញ់​ឪពុក​ម្តាយ​ខ្ញុំ​ខ្លាំង​ណាស់»។ «ខ្ញុំស្រលាញ់ចំពោះការខិតខំប្រឹងប្រែង ការលះបង់ និងការលំបាកទាំងអស់របស់គាត់ ឱ្យតែកូនរបស់គាត់មានសុខភាពល្អ ហើយនាង​សប្បាយចិត្ត»។ «តាមពិតខ្ញុំជាមនុស្សប្រុស តែហេតុអ្វីខ្ញុំយំពេលមើលឃ្លីបបែបនេះ?»៕ រក្សាសិទ្ធិដោយ៖ លឹម ហុង

spot_img
×