វីដេអូមួយបានធ្វើឲ្យអ្នកលេងបណ្តាញសង្គម ក្នុងប្រទេសថៃ ផ្ទុះការភ្ញាក់ផ្អើលយ៉ាងខ្លាំង ដែលវីដេអូបានបង្ហាញឡានក្រុង ស្រាប់តែបញ្ចេញផ្សេងហុយឡើងទ្រលោមពេញផ្លូវតែម្តង ដែលធ្វើឲ្យអ្នកដំណើរតាមម៉ូតូនាំគ្នាសែ្រកដាក់ទៅកាន់ឡានក្រុងនោះយ៉ាងខ្លាំង ព្រោះតែពួកគេពិបាកក្នុងការធ្វើដំណើរ។
ទាក់ទងនឹងហេតុការណ៍ដ៏ចម្លែកនេះ លោក Ekkawin Chokprasapruay សមាជិកក្រុមប្រឹក្សាក្រុងបាងកក (SK) នៃស្រុក Ratchathewi បានបង្ហោះឃ្លីបពីអ្នកដំណើរម្នាក់ ដែលបានប្រទះឃើញឡានក្រុង១គ្រឿង កំពុងរត់តាមដងផ្លូវ ដោយបញ្ចេញផ្សែងពណ៌សហុយគ្របដណ្តប់ពេញដងផ្លូវ ជាមួយនឹងសារដាក់ជាសំណួរបែបនេះថា «ខ្សែលេខ ៥៣៨ ឆ្លងកាត់ស្រុករាជធាវី សូមសួរទៅនាយកដ្ឋានដឹកជញ្ជូនផ្លូវគោក តើអាចចេញឡានក្រុងក្នុងលក្ខខណ្ឌនេះបានដោយរបៀបណា?»។
ជាក់ស្តែង តាមវីដេអូឃ្លីបអាចត្រូវបានឃើញថា មានផ្សែងពណ៌សចេញពីឡានក្រុងនោះយ៉ាងខ្លាំង ដែលបង្កើតជា «ទុក្ខ» សម្រាប់អ្នកប្រើប្រាស់ផ្លូវ ដែលមិនអាចមើលឃើញក្នុងពេលបើកបរ ហើយមនុស្សនៅក្នុងហេតុការណ៍នេះក៏បាននិយាយថា ពួកគេព្រួយបារម្ភថាតើវានឹងផ្ទុះឬអត់?។
ទន្ទឹមនឹងនេះ អ្នកនិយមលេងអ៊ីនធឺណេត ដែលមានការស្រឡាំងកាំងជាមួយនឹងវីដេអូឃ្លីបនេះ បាននាំគ្នាបញ្ចេញមតិទាំងហួសចិត្តបែបៗនេះថា «ខ្ញុំគិតថាឡានបាញ់មូស! ខ្ញុំជឿថារថយន្តប្រហែលខូច វាបានរត់ទៅខាងស្ដាំ ហើយមិនទទួលអ្នកណាទេ, «ប្រហែលជាទៅយានដ្ឋាន ប៉ុន្តែប្រសិនបើផ្សែងខ្លាំងនេះ អ្នកគួរតែឈប់ ហើយទុកឲ្យរថយន្តមកសណ្តោងទៅ ព្រោះការរត់បែបនេះមានគ្រោះថ្នាក់ដល់អ្នករួមដំណើរ ហើយអាចបង្កជាគ្រោះថ្នាក់ បំពុលខ្យល់ និងគ្រោះថ្នាក់ដល់អ្នកបើកបរដទៃផងដែរ»៕ រក្សាសិទ្ធិដោយ៖ លឹម ហុង
