កាលពីថ្ងៃទី៣ ខែមករា ឆ្នាំ២០២៤ អ្នកប្រើហ្វេសប៊ុកម្នាក់ដែលជាម្ចាស់ភោជនីយដ្ឋានប៊ូហ្វេគ្រឿងសមុទ្រ នៅក្នុងខេត្តកំពង់ស្ពឺ បានបង្ហាញរូបភាពបរិយាកាសក្នុងហាងរបស់ខ្លួននាពេលយប់។ ប៉ុន្តែអ្វីដែលចាប់អារម្មណ៍ជាខ្លាំងនោះ គឺរូបភាពយុវជន២នាក់ ដែលជាអតិថិជននៅតុតែមួយ ខណៈម្នាក់ឈ្ងូកមុខចុះ ខណៈម្នាក់ទៀតប្រហែលកំពុងបឺតស្រាក្នុងកែវ ទាំងទឹកមុខគួរឲ្យអៀនខ្មាស ខណៈនៅលើតុគឺពេញទៅដោយគ្រឿងអាហារបង្គា បង្កង និងក្តាម ដាក់ជង់គរលើគ្នារហូតសឹងតែគ្មានទំនេរ។
ជាការពិតណាស់ ចំពោះរូបភាពនេះផងដែរ គឺក្រោយពីត្រូវបានបង្ហោះ ខណៈម្ចាស់ហាងក៏ពុំបានបញ្ជាក់ពីហេតុផលអ្វី ដោយគ្រាន់តែសុំឱ្យបងប្អូនដាក់ចំណងជើងឲ្យផង ក៏បានធ្វើឲ្យមនុស្សជាច្រើនបានគិតថា នេះប្រហែលមកពីអតិថិជនទាំងពីរយកគ្រឿងសមុទ្រដ៏ច្រើនលើសលប់ ហើយប្រហែលពុំមានលុយបង់ថ្លៃផាកពិន័យ ទើបម្ចាស់ហាងថតបង្ហោះបែបនេះទៅ រីឯអ្នកខ្លះទៀតយល់ឃើញបែបនេះថា ម្ចាស់ប៊ូហ្វេថតបង្ហោះ ព្រោះបានជួបរបស់ពិត!!។
តែអ្វីដែលធ្វើឲ្យគ្រប់គ្នានឹកស្មានមិនដល់នោះ គឺថាតាមពិតទៅ នេះគ្រាន់តែជារូបភាពមួយ ដើម្បីទាក់ទាញការចាប់អារម្មណ៍ពីសំណាក់មហាជនប៉ុណ្ណោះ ខណៈម្ចាស់ហាងក្រោយពីទទួលមតិរិះគន់ បានចេញមុខបកស្រាយហេតុផលថា បន្ទាប់ពីគិតលុយរួច តម្លៃសរុបដែលអតិថិជនទាំងពីរត្រូវបង់គឺត្រឹមតែ 16.50 ដុល្លារ ប៉ុណ្ណោះ។ ហើយក៏បានឆ្លៀតឱកាសផ្សព្វផ្សាយថា មិនថាអ្នកញ៉ាំច្រើន ឬតិចទេ អ្នកនឹងត្រូវគិតថ្លៃដូចគ្នា។ លើសពីនេះ ម្ចាស់ហាងក៏បានប្រាប់ថា ញ៉ាំមិនទាន់ឆ្អែត អាចយកថែមបាន ពោលគឺដាក់ទាល់តែឆ្អែត មិនគិតម៉ោង ពេលវេលានោះទេ សំខាន់កុំឲ្យតែវេចខ្ចប់ទៅផ្ទះ។ ទន្ទឹមនឹងនេះ ម្ចាស់ហាងក៏ថ្លែងអំណរគុណ ដល់អតិថិជនសម្រាប់ការគាំទ្រដ៏លើសលុប។
ក្រោយការបង្ហោះនេះត្រូវបានគេចែករំលែក អ្នកលេងអ៊ីនធឺណិតបានចូលមកបញ្ចេញមតិព្រោងព្រាតថា «បបួលគ្នាហើយៗបង តែមិនដឹងថ្ងៃណាបានទៅទេចង់ទៅដល់ហើយ, ចង់ទៅញ៉ាំដែរ តែខ្លាចញ៉ាំច្រើន បងថតបង្ហោះ,…»។ តែក្នុងនោះ អ្នកខ្លះទៀត ក៏បានបង្ហាញក្តីព្រួយបារម្ភជំនួសថា «ប្រសិនបើអ្នកជួបកំពូលអ្នកហូបច្រើនបែបនេះញឹកញាប់ អ្នកអាចនឹងក្ស័យធន»៕ រក្សាសិទ្ធិដោយ៖ លឹម ហុង
