កាលពី ៣៥ ឆ្នាំមុន នៅថ្ងៃទី២៤ ខែកុម្ភៈ ឆ្នាំ១៩៨៩ ប្រហែលម៉ោង ១ និង ៥២ នាទី ព្រឹក (ម៉ោងក្នុងតំបន់) យន្តហោះរបស់ក្រុមហ៊ុនអាកាសចរណ៍ United Airlines ជើងហោះហើរលេខ ៨១១ បានហោះចេញពីកោះ Honolulu រដ្ឋ Hawaii សហរដ្ឋអាមេរិក ដើម្បីមកដល់ទីក្រុង Auckland ប្រទេសនូវែលសេឡង់ និងទីក្រុងស៊ីដនី ប្រទេសអូស្ត្រាលី។ ទោះជាយ៉ាងណា យន្តនេះបានជួបប្រទះបញ្ហាដ៏ធំមួយ។
ក្រៅពីអ្នកដំណើរ ៣៣៧ នាក់ ជើងហោះហើរលេខ ៨១១ ក៏មាននាវិកចំនួន ១៨ នាក់ រួមទាំងអ្នកបម្រើលើយន្តហោះចំនួន ១៥ នាក់។
គេបានដឹងថា នៅមុនពេលកើតហេតុ យន្តហោះនោះស្រាប់តែញ័រខ្លាំង ខណៈនៅកម្ពស់ប្រហែល ៧០០០ ម៉ែត្រ។ ហើយប្រហែល១វិនាទីកន្លះក្រោយមក ទ្វារនៅខាងមុខយន្តហោះក៏ផ្ទុះភ្លាមៗតែម្តង។ កម្លាំងនៃការផ្ទុះដ៏ខ្លាំង បានបណ្តាលឲ្យ «ហែក» អស់មួយផ្នែកធំ នៃតួរបស់យន្តហោះ ដែលពិតជាគួរឲ្យរន្ធត់ណាស់។
នៅពេលនោះ មនុស្ស ៩ នាក់ ត្រូវបានទាញចេញពីលើមេឃ រួមទាំងអ្នកបម្រើលើយន្តហោះ មិនដឹងធ្លាក់រសាត់អណ្តែតដល់ទីណានោះទេ។ មិនត្រឹមតែប៉ុណ្ណោះ ការផ្ទុះនេះក៏បានបំផ្លាញផ្នែកនៃប្រព័ន្ធផ្គត់ផ្គង់អុកស៊ីហ្សែនសង្គ្រោះបន្ទាន់ផងដែរ។ ហើយម៉ាស៊ីន ៣ និង ៤ របស់យន្តហោះ ក៏បានឈប់ដំណើរការថែមទៀតផង។
នៅម៉ោង ២ និង ២០ វិនាទី (ម៉ោងក្នុងតំបន់) ភាពអាសន្នត្រូវបានប្រកាស ហើយនាវិកបានចាប់ផ្តើមចុះចតជាបន្ទាន់ មុនពេលអ្វីៗកាន់តែអាក្រក់ទៅៗ។
បន្ទាប់ពីរកឃើញផ្លូវរត់ដែលនៅជិតបំផុត យន្តហោះនៅតែជួបការលំបាកដោយសារការខូចខាតយ៉ាងធ្ងន់ធ្ងរ ប៉ុន្តែសំណាងល្អ នៅតែចុះចតដោយជោគជ័យ។ អ្នកដំណើរ និងអ្នកបម្រើលើយន្តហោះទាំងអស់ ដែលនៅសេសសល់ បានចាកចេញពី Boeing ក្នុងរយៈពេលតិចជាង ៤៥ វិនាទី។
តាមការត្រួតពិនិត្យ តួយន្តហោះត្រូវបានរហែកអស់ប្រហែល ៣២ ម៉ែត្រការ៉េ។ កៅអី G និង H នៅជួរទី៨ ដល់ ១២ និងគ្រឿងសង្ហារិមទាំងអស់នៅខាងក្នុងកន្លែងដាក់ទំនិញខាងមុខ ត្រូវបានបាត់បង់។
អ្នកដំណើរម្នាក់ឈ្មោះ Caudwell បានប្រាប់កាសែត Rotorua Daily Post ថា «ខ្ញុំស្ទើរតែមិនជឿ ទំហំនៃការរហែកនៅក្នុងយន្តហោះនោះទេ វាពិតជាធំខ្លាំងណាស់» ។
គេក៏បានឲ្យដឹងទៀតថា អ្នកបម្រើលើយន្តហោះទាំងអស់បានបាត់បង់ជីវិត និងរងរបួស នៅក្នុងគ្រោះថ្នាក់នេះ។ អាជ្ញាធរបានរៀបចំការរុករកតាមអាកាស និងសមុទ្រយ៉ាងទូលំទូលាយ ប៉ុន្តែរកមិនឃើញអ្នកស្លាប់ឡើយ៕ រក្សាសិទ្ធិដោយ៖ លឹម ហុង
