ថៅកែស្រីក្រុមហ៊ុនដឹកជញ្ជូនម្នាក់នៅក្នុងប្រទេសចិន បានបង្កឲ្យមានការភ្ញាក់ផ្អើលយ៉ាងខ្លាំង បន្ទាប់ពីបានមានគំនិតដ៏មិនធម្មតាដែលមនុស្សជាច្រើនមិនអាចធ្វើបាន ដោយបានជួលមនុស្សឱ្យទៅភ្ជាប់ឧបករណ៍តាមដាន GPS ដោយសម្ងាត់ ទៅនឹងរថយន្តប៉ូលីសជាច្រើនគ្រឿង ដែលជាប្រយោជន៍សម្រាប់ណែនាំឲ្យអ្នកបើកបររថយន្តដឹកទំនិញរបស់ខ្លួន ប្តូរទិសដៅទៅផ្លូវវាងភ្លាមៗ ដើម្បីគេចពីកន្លែងត្រួតពិនិត្យ។
នាយកដ្ឋានសន្តិសុខអ៊ីនធឺណិតនៃការិយាល័យសន្តិសុខសាធារណៈស្រុក Xiangzhou ទីក្រុង Xiangyang ខេត្ត Hubei ប្រទេសចិន ថ្មីៗនេះបានទទួលការជូនដំណឹងថា នៅពេលដែលប៉ូលីស Xiangzhou បានយករថយន្តដែលអនុវត្តច្បាប់ទាំងអស់មកថែទាំ និងក្នុងអំឡុងពេលត្រួតពិនិត្យជាប្រចាំ ពួកគេបានរកឃើញថានៅក្រោមរថយន្តមួយចំនួនមានប្រអប់ការ៉េខ្មៅតូចមួយ។ នៅពេលពិនិត្យកាន់តែជិត ពួកគេបានបញ្ជាក់ថាវាជាឧបករណ៍តាមដាន GPS ។
តាមរយៈការស៊ើបអង្កេតប៉ូលិស បានរកឃើញថា រថយន្តរហូតដល់ទៅ ៦ គ្រឿង ក្នុងចំណោមរថយន្ត ១១ គ្រឿង របស់អង្គភាព ត្រូវបានបំពាក់ឧបករណ៍តាមដាន GPS ។ ភ្លាមៗនោះ សមត្ថកិច្ចបានកំណត់អត្តសញ្ញាណជនសង្ស័យជាស្រ្តីឈ្មោះ Chu ដែលជាថៅកែឡានដឹកទំនិញដ៏ធំមួយនៅក្នុងតំបន់។
នៅពេលចាប់ខ្លួន អ្នកស្រី Chu បានសារភាពថា គាត់គឺជាម្ចាស់ក្រុមដឹកជញ្ជូននៅក្នុងខេត្ត Hubei ។ ហេតុដូច្នេះ ដើម្បីកុំឲ្យក្បួនរថយន្តរបស់ខ្លួនត្រូវបានត្រួតពិនិត្យដោយប៉ូលីសចរាចរណ៍ អ្នកស្រីក៏នឹកឃើញនូវគំនិតនៃការដំឡើងឧបករណ៍កំណត់ទីតាំងដោយសម្ងាត់ នៅលើរថយន្តប៉ូលីស ដើម្បីចាប់យកទីតាំងរបស់ពួកគេបានត្រឹមត្រូវ តាមរយៈកម្មវិធីកំណត់ទីតាំង នៅលើទូរស័ព្ទដៃរបស់អ្នកស្រី។ ហើយសម្រាប់គំនិតដ៏ល្អនេះ អ្នកស្រីអាចជូនដំណឹងដល់អ្នកបើកបរឱ្យបើកទៅផ្លូវវាងភ្លាមៗ នៅពេលដែលមានប៉ុស្តិ៍ត្រួតពិនិត្យ។
អ្នកស្រី Chu ក៏បានប្រាប់ឲ្យដឹងថា នៅក្នុងខែមិថុនា ឆ្នាំ ២០២៣ អ្នកស្រីបានជួលមនុស្សម្នាក់ទៅដំឡើង GPS នៅលើរថយន្តប៉ូលីសចំនួន ៦ គ្រឿង ដែលចតនៅស្ថានីយ៍ Xiangzhou នៅពាក់កណ្តាលអធ្រាត្រ។
បច្ចុប្បន្ននេះ ស្ត្រីរូបនេះកំពុងស្ថិតក្នុងការឃុំខ្លួនផ្នែករដ្ឋបាលរយៈពេល ៨ ថ្ងៃ តាមច្បាប់របស់ប្រទេសចិន និងពិន័យជាប្រាក់ចំនួន ៥០០ យន់ (ប្រហែលជាង ៧០ ដុល្លារ) សម្រាប់ការរារាំងដល់ភារកិច្ចរបស់សមត្ថកិច្ច៕ រក្សាសិទ្ធិដោយ៖ លឹម ហុង
