ជើងហោះហើររបស់ក្រុមហ៊ុន Voepass Linhas Aéreas ដែលជាក្រុមហ៊ុនអាកាសចរណ៍ប្រេស៊ីល បានធ្វើដំណើរចេញពីកោះ Fernando de Noronha ពេលអ្នកមកដល់កោះ Natal។ រដ្ឋធានី Rio Grande do Norte នៅម៉ោង ១២ និង៣៥ នាទី ថ្ងៃទី ២២ ខែមករា ឆ្នាំ២០២៣ អ្នកដំណើរក៏ស្រាប់តែបានឮសំឡេង «ភ្ញាក់ផ្អើល» យ៉ាងខ្លាំង នៅខាងក្រៅយន្តហោះ។
ពេលក្រុមអាកាសយានិកទៅខាងក្រៅ ពួកគេបានរកឃើញថា យន្តហោះត្រូវបានហ៊ុំព័ទ្ធដោយ «ឃ្មុំ» មួយសំបុកយ៉ាងធំ ហើយពួកវាហាក់ដូចជាមិនផ្លាស់ទីទៅឆ្ងាយទេ។ ដូច្នេះហើយគេបារម្ភថា វាអាចប៉ះពាល់ដល់សុវត្ថិភាពអ្នកដំណើរ។ ដូច្នេះត្រូវហៅមន្ត្រីពន្លត់អគ្គិភ័យមកជួយដោះស្រាយបញ្ហានេះ ហើយសុំឱ្យអ្នកដំណើររង់ចាំនៅកៅអីរបស់ពួកគេសិន។
អ្នកដំណើរម្នាក់បាននិយាយថា «មានសំឡេងលាន់ឮឡើងរងំនៅខាងក្រៅ ហើយបានរកឃើញថាមានសត្វឃ្មុំស្ទើរតែឡោមព័ទ្ធយន្តហោះទាំងមូល ខណៈសំបុករបស់វានៅស្លាបខាងស្តាំរបស់យន្តហោះ។ នៅពេលនោះ អ្នកដំណើរជាច្រើន ពិតជាមានការភ័យខ្លាចជាខ្លាំង នៅពេលបានឃើញសត្វឃ្មុំហើរឡើងប្រសាចបែបនេះ»។
ទោះជាយ៉ាងណា បន្ទាប់មក ក្រុមពន្លត់អគ្គិភ័យបានមកដល់ និងបានឃើញឃ្មុំមួយសំបុកធំនៅស្លាបយន្តហោះ។ ភ្លាមៗនោះ ពួកគេបានយកបាញ់ថ្នាំសម្លាប់សត្វល្អិត ដើម្បីដោះស្រាយ និងត្រូវការចំណាយពេលអស់មួយសន្ទុះធំ ដើម្បីបណ្ដេញសត្វឃ្មុំទាំងនោះចេញអស់។
ជាសំណាងល្អ អ្នកដំណើរទាំងអស់នៅលើយន្តហោះមានសុវត្ថិភាព ពុំទទួលរងការទិចនោះទេ ហើយបានចូលអាកាសយានដ្ឋានដោយរលូននៅម៉ោង ១ និង ៥០ នាទីរសៀល បន្ទាប់ពីជាប់គាំងអស់រយៈពេលជិត ១៩ នាទី ដោយសារតែឃ្មុំមួយហ្វូង ដែលធ្វើឲ្យមិនអាចចុះពីយន្តហោះបាន។
អ្នកនាំពាក្យក្រុមហ៊ុនអាកាសចរណ៍ បាននិយាយថា ក្រុមហ៊ុនបានអនុវត្តតាមនីតិវិធីសុវត្ថិភាព ហើយបន្ទាប់ពីសត្វឃ្មុំត្រូវបានបណ្តេញចេញ អ្នកដំណើរទាំងអស់បានចុះពីយន្តហោះដោយសុវត្ថិភាព។ ចំណែកយន្តហោះត្រូវបានយកមកថែទាំ ហើយការត្រួតពិនិត្យសុវត្ថិភាពទាំងអស់ នឹងត្រូវបានអនុវត្តនៅលើជើងហោះហើរបន្ទាប់៕ រក្សាសិទ្ធិដោយ៖ លឹម ហុង
