កាលពីថ្ងៃទី២៦ ខែមករា ឆ្នាំ២០២៤ គេហទំព័រ kenh14 របស់វៀតណាម បានរាយការណ៍ថា ភោជនីយដ្ឋានប៊ូហ្វេគ្រឿងសមុទ្រមួយកន្លែងនៅទីក្រុងហាណូយ បានចេញមកបង្ហាញនូវទង្វើដ៏អាម៉ាសរបស់ក្រុមអតិថិជនចំនួន ៧ នាក់ ដែលបានមកទទួលទានអាហារប៊ូហ្វេនៅភោជនីយដ្ឋានក្នុងតម្លៃ 409,000 ដុង (ប្រហែល ១៦ ដុល្លារ) ក្នុងមួយនាក់ មុនពេលចុងក្រោយ ពួកគេបានលួចអាហារយ៉ាងសម្ងាត់យកទៅផ្ទះ រួមមានបង្គា ក្តាម ត្រីឆៅ និងនំប៉ាវ សរុបទម្ងន់ជាង ១០ គីឡូក្រាម។
តាមរយៈឃ្លីបដែលហាងបានបង្ហោះនៅលើ TikTok និង Facebook បានបង្ហាញឲ្យឃើញថា បុគ្គលិកម្នាក់កំពុងឆែកឆេរកាបូបរបស់អតិថិជន និងបានដកហូតយកគ្រឿងសមុទ្រមួយចំនួនធំ ដាក់លើថាស។ មិនមែនមានតែម្នាក់ ឬ ២នាក់នោះទេ ប៉ុន្តែពួកគេទាំងអស់គ្នាបានលួចដាក់ក្នុងកាបូបរៀងៗខ្លួន ដើម្បីយកទៅផ្ទះ។
ពេលដែលវីដេអូឃ្លីបនេះ ត្រូវបានផ្សព្វផ្សាយ បានក្លាយជាការចាប់អារម្មណ៍ខ្លាំង ពីសំណាក់អ្នកនិយមលេងអ៊ីនធឺណេត រហូតដល់ជាង ៧.៦ លាននាក់ បានមើល ហើយពួកគេភាគច្រើន បានស្តីបន្ទោសចំពោះទង្វើរបស់អតិថិជន ដែលមិនគោរពច្បាប់នៃការញ៉ាំអាហារប៊ូហ្វេ ដែលមិនត្រូវយកអាហារដែលនៅសេសសល់ ទៅផ្ទះឡើយ។
សារព័ត៌មានក្នុងស្រុករាយការណ៍ថា ហេតុការណ៍នេះបានកើតឡើងនៅរសៀលថ្ងៃទី២៥ ខែមករា ឆ្នាំ២០២៤ ដោយមានអតិថិជន ៧ នាក់ មកញ៉ាំអាហារប៊ូហ្វេនៅតុមួយ។ អំឡុងពេលនោះ បុគ្គលិកបានកត់សម្គាល់ឃើញថា ពួកគេតែងតែដើរជុំវិញកន្លែងនាំយកគ្រឿងសមុទ្រមកតុ។ ប៉ុន្តែនៅពេលដែលពួកគេទៅបោសសម្អាតតុ ផ្ទុយទៅវិញមិនមានបង្គា ក្តាម ឬសូម្បីតែសំបកនៅលើតុនោះទេ។ ដូច្នេះបុគ្គលិកហាងក៏មានការសង្ស័យ។
ពេលធ្វើការឆែកមើលកាមេរ៉ាសុវត្ថិភាព ពួកគេបានរកឃើញថា អតិថិជនពិតជាបានលួចដាក់ម្ហូបក្នុងកាបូបដែលលាក់នៅក្រោមតុ ដែលត្រូវបានហៅថាជា ការញ៉ាំនិងលាក់ទុក។ ដូច្នេះហើយពេលអតិថិជនមួយក្រុមនេះហូបចប់ បុគ្គលិកក៏ប្រញាប់នាំពួកគេទៅកន្លែងសួរនាំ ហើយបានសុំឆែកឆេរកាបូប។ ដំបូងអតិថិជនបានបដិសេធមិនអនុញ្ញាតឲ្យធ្វើការត្រួតពិនិត្យទេ ដោយអះអាងថាមានតែសម្លៀកបំពាក់ក្នុងកាបូបប៉ុណ្ណោះ។ ប៉ុន្តែពេលឃើញវីដេអូ CCTV ទីបំផុត ពួកគេក៏យល់ព្រមឆែកឆេរកាបូប។ ហើយលទ្ធផល គឺដូចបានបង្ហាញក្នុងឃ្លីប ដោយមានបង្គា ក្តាម ត្រីឆៅ និងនំប៉ាវជាច្រើន នៅក្នុងថង់ ទម្ងន់សរុបនៃអាហារដែលលាក់ទុកជាង១០គីឡូក្រាម!។
បន្ទាប់ករណីនេះកើតឡើង ហាងត្រូវធ្វើតាមច្បាប់ ដោយស្នើឱ្យអតិថិជនបង់ប្រាក់ពិន័យសម្រាប់អាហារដែលនៅសេសសល់ទាំងនេះ។ ប៉ុន្តែក្រុមអតិថិជនមិនយល់ព្រម ហើយបានសុំប៉ូលិសជួយ ប៉ុន្តែនៅទីបំផុត ពួកគេត្រូវបានភោជនីយដ្ឋានផាកពិន័យ ចំពោះបរិមាណអាហារដែលពួកគេបានលួចយកទៅក្រៅ។ ការផាកពិន័យនេះត្រូវបានគេរំពឹងថា នឹងលើសពី ៦ លានដុង (ប្រហែលជាង ២០០ ដុល្លារ)៕ រក្សាសិទ្ធិដោយ៖ លឹម ហុង
