ភ្នំពេញ ៖ បុរសម្នាក់ បានជាជិះម៉ូតូជ្រុលចង្កូតទៅបុកចំពីខាងក្រោយ គោយន្ដពេញទំហឹងដែលដឹកឫស្សីបណ្ដាលឲ្យជង់ធ្លាយបំពង់កដួលស្លាប់ភ្លាមៗ នៅល្ងាចថ្ងៃទី៣ ខែសីហា ឆ្នាំ២០១៨ ស្ថិតនៅតាមបណ្តោយផ្លូវជាតិលេខ៦អា ខាងត្បូងប៉ុស្តិ៍បាក់ខែង ក្នុងភូមិក្តីចាស់ សង្កាត់ បាក់ខែង ខណ្ឌជ្រោយចង្វា រាជធានីភ្នំពេញ។
មន្ត្រីនគរបាលបានឲ្យដឹងថា បុរសរងគ្រោះដែលស្លាប់ក្នុងគ្រោះថ្នាក់ចរាចរនេះ មានឈ្មោះ ផាត់ សុខលីន អាយុ២៨ឆ្នាំ ជនជាតិខ្មែរស្នាក់នៅភូមិថ្មី ឃុំក្រឡា ស្រុកកំពង់សៀម ខេត្តកំពង់ចាម បានបើកម៉ូតូ ម៉ាកហុងដាឌ្រីម សេ១២៥ ពណ៌ខ្មៅ ពាក់ស្លាកលេខកំពង់ចាម 1F-1857 ។
មន្ត្រីនគរបាលបានឲ្យដឹងទៀតថា បើតាមប្រជាពលរដ្ឋ នៅមុនពេលកើតហេតុ បានឃើញគោយន្តដែលដឹកឫស្សីពេញប្រៀប ហើយម៉ូតូរងគ្រោះ បានបើកស្របទិសគ្នា តាមបណ្តោយផ្លូវជាតិលេខ៦អា ពីត្បូងទៅជើង ដោយគោយន្តបើកពីខាងមុខម៉ូតូបើកពីខាងក្រោយ ខណៈមកដល់ចំណុចកើតហេតុ ម៉ូតូជនរងគ្រោះបានជ្រុលចង្កូតទៅបុកពេញទំហឹង ចូលចំពីក្រោយគល់ឫស្សី ដែលនៅពីលើគោយន្ដ បណ្តាលឲ្យម៊ុតជង់កធ្លាយដួលប្រកាច់ស្លាប់ភ្លាមៗ នៅកន្លែងកើតហេតុ។
ក្រោយពេលកើតហេតុ សមត្ថកិច្ច បានធ្វើការវាស់វែង និងយកគោយន្ដដឹកឫស្សី ម៉ូតូរងគ្រោះទៅរក្សាទុកនៅការិយាល័យចរាចរផ្លូវគោក នៃស្នងការនគរបាលរាជធានីភ្នំពេញ ដើម្បីរង់ចាំដោះស្រាយគ្នាតាមនីតិវិធី៕ ដោយ ៖បញ្ញាស័ក្តិ
