ភ្នំពេញ ៖ ឯកឧត្តម ប៉ែន បូណា មានប្រសាសន៍ថា រាជរដ្ឋាភិបាលគណបក្សប្រជាជនកម្ពុជាដឹកនាំដោយសម្តេចតេជោ ហ៊ុន សែន បានកសាងប្រទេសកម្ពុជាឱ្យស្គាល់ការអភិវឌ្ឍកម្រិតកំពូលមិនដែលធ្លាប់មាននៅក្នុងប្រវត្តិសាស្ត្រសម័យទំនើបរយៈពេលជាង ៥០០ ឆ្នាំចុងក្រោយ។
តើមានអំណះអំណាងអ្វីខ្លះ ដែលបញ្ជាក់ថា រាជរដ្ឋាភិបាលគណបក្សប្រជាជនកម្ពុជាដឹកនាំដោយសម្តេចតេជោ ហ៊ុន សែន បានកសាងប្រទេសកម្ពុជាឱ្យស្គាល់ការអភិវឌ្ឍន៍មិនដែលធ្លាប់មាននៅក្នុងប្រវត្តិសាស្ត្រសម័យទំនើប?
ថ្លែងនៅក្នុងវេទិកាសារព័ត៌មានលើកទី២ កាលពីថ្ងៃទី១៦ខែកុម្ភៈឆ្នាំ២០២៤ នៅទីស្តីការគណៈរដ្ឋមន្រ្តី ឯកឧត្តម ប៉ែន បូណា បានមានប្រសាសន៍ថា រាជរដ្ឋាភិបាលគណបក្សប្រជាជនកម្ពុជា ដឹកនាំដោយសម្តេចតេជោ ហ៊ុន សែន បានកសាងប្រទេសកម្ពុជាឱ្យស្គាល់ការអភិវឌ្ឍកម្រិតកំពូលក្នុងប្រវត្តិសាស្ត្រសម័យទំនើប។
ឯកឧត្តម ប៉ែន បូណា បានបញ្ជាក់យ៉ាងដូច្នេះថា «នេះជាអំណះអំណាងច្បាស់លាស់។ នេះគេអាចផ្ទៀងផ្ទាត់បាន កុំឱ្យថាខ្ញុំចេះតែថា សូមអ្នកទាំងអស់គ្នាផ្ទៀងផ្ទាត់មើល។ អីចឹង អាចនិយាយបានថា ក្រោមការដឹកនាំសម្តេចតេជោ ហ៊ុន សែន កម្ពុជា ឈានដល់កម្រិតមួយខ្ពស់បំផុត កម្រិតកំពូលរយៈពេល៥០០ឆ្នាំចុងក្រោយ។ សូមបញ្ជាក់ជូនថា សម្តេចតេជោ ហ៊ុន សែន ដែលលោកដឹកនាំប្រទេស អភិវឌ្ឍបានប៉ុណ្ណឹង ដែលខ្ញុំហៅថា កម្រិតកំពូលក្នុងប្រវត្តិសាស្ត្រសម័យទំនើប ដឹកនាំចេញពីណា? ចេញពីគំនរផេះផង់ ឈាមទឹកភ្នែក ក្រោយរបបប្រល័យពូជសាសន៍ ប៉ុលពត»។
ឯកឧត្តមបន្តថា «ឥឡូវ យើងស្រមៃថា បើសិនជាសម្តេចតេជោ ហ៊ុន សែន គាត់ដឹកនាំប្រទេស តពីសម័យសង្គមរាស្ត្រនិយម របស់ព្រះករុណាសម្តេចតា ដែលមានហេដ្ឋារចនាសម្ព័ន្ធសព្វបែបយ៉ាងជាជន្ទល់ស្រាប់ ហើយអត់ឆ្លងកាត់របបសាធារណរដ្ឋខ្មែររបស់លោក លន់ នល់ របបប៉ុលពតទេ យើងស្រមៃមើលមើរ៍ តើការអភិវឌ្ឍប្រទេសកម្ពុជា នឹងដល់កម្រិតណា? លើសពីនេះប៉ុន្មានដង?»។
បើតាមឯកឧត្តមប៉ែន បូណា នេះជាសំណួរច្បាស់ចែស ដើម្បីបញ្ជាក់ថា រាជរដ្ឋាភិបាល ដែលដឹកនាំដោយគណបក្សប្រជាជនកម្ពុជា ដែលមានសម្តេចតេជោ ហ៊ុន សែន ជាប្រមុខ ហើយឥលូវនេះកំពុងតែមានរាជរដ្ឋាភិបាលបន្តវេន ដោយសម្តេចធិបតី ហ៊ុន ម៉ាណែត ជាប្រមុខដឹកនាំរាជរដ្ឋាភិបាល ដែលដឹកនាំប្រទេសកម្ពុជាអភិវឌ្ឍខ្ពស់បំផុតកម្រិតកំពូល។ ឥឡូវនេះ អ្នកបន្តវេនជំនាន់ទី២ របស់គណបក្សប្រជាជនកម្ពុជា បានចាប់ផ្តើមចេញដំណើរហើយ ៦ខែ។ អ្នកដឹកនាំជំនាន់ថ្មី គឺសម្តេចធិបតី ចេញពីគ្រួសារសម្តេចតេជោ ហើយគណៈរដ្ឋមន្ត្រី សុទ្ធតែចេញពីគណបក្សប្រជាជនកម្ពុជា អីចឹងអាចនិយាយបានថា នេះជាក្រុមអ្នកដឹកនាំថ្មី ខ្លាំងក្លា ពូកែ ជំនាន់ទី២ របស់គណបក្សប្រជាជនកម្ពុជា។
ឯកឧត្តមបន្ថែមថា ក្រុមអ្នកដឹកនាំថ្មី នឹងនាំប្រទេសកម្ពុជា លឿនទៅមុខទៀត ដោយសារមានគ្រឹះរួចស្រេច ដោយសាររៀមច្បង កើតឡើងដោយសារការដឹកនាំរបស់សម្តេចតេជោ ហ៊ុន សែន។ នេះជាក្តីសង្ឃឹមរឹងមាំណាស់ របស់ប្រជាពលរដ្ឋខ្មែរ។
ឯកឧត្តម ប៉ែន បូណា បានថ្លែងបន្តទៀតថា កម្ពុជាឆ្នាំ២០៥០ មិនត្រឹមតែមានចំណូលខ្ពស់ តែជាប្រទេសដែលមានសេដ្ឋកិច្ចរឹងមាំ បរិស្ថានល្អ និងសង្គមដែលគាំពារពលរដ្ឋគ្រប់បែបយ៉ាង។ យុទ្ធសាស្ត្របញ្ចកោណមានចក្ខុវិស័យកម្ពុជាឆ្នាំ២០៥០ ក្លាយជាប្រទេសដែលមានចំណូលខ្ពស់។ ឯកឧត្តម ប៉ែន បូណា រដ្ឋមន្ត្រីប្រតិភូអមនាយករដ្ឋមន្ត្រី បានបញ្ជាក់ថា រាជរដ្ឋាភិបាលបានគិតគូគ្រប់ទិដ្ឋភាពដើម្បីធ្វើឱ្យកម្ពុជាឆ្នាំ២០៥០ ក្លាយជាសប្រទេសដែលមានចំណូលខ្ពស់ សេដ្ឋកិច្ចរឹងមាំ និងសង្គមបរិយាកាសល្អគ្រប់បែបយ៉ាង។ ឯកឧត្តមក៏ឆ្លៀតអំពាវនាវឱ្យប្រជាពលរដ្ឋខ្មែរនិងយុវជនខ្មែរទាំងអស់ ចូលរួមជាមួយរាជរដ្ឋាភិបាល ដើម្បីរុញច្រាននាវាកម្ពុជា ឱ្យសម្រេចបានចក្ខុវិស័យកម្ពុជាឆ្នាំ២០៥០។
រដ្ឋមន្ដ្រីប្រតិភូអមនាយករដ្ឋមន្ដ្រី លោក ប៉ែន បូណា បានលើកនូវអំណះអំណាងមួយចំនួន ដែលរាជរដ្ឋាភិបាលកម្ពុជា ហ៊ានកំណត់បែបនេះ ពោលដោយសាររាជរដ្ឋាភិបាលកម្ពុជា នីតិកាលទី៧នេះ មានគ្រឹះដ៏រឹងមាំដែលបានកសាងឡើងដោយ សម្ដេចតេជោ ហ៊ុន សែន អតីតនាយករដ្ឋមន្ដ្រី និងបន្ដមកអ្នកជំនាន់ក្រោយដែលសុទ្ធសឹងតែជាអ្នកបន្ដវេនដ៏ខ្លាំងពូកែ ប្រកបដោយសមត្ថភាព និងមានឆន្ទៈមុះមុត។
លោក ប៉ែន បូណា បានបង្ហាញដោយបែងចែកជ្រុងសំខាន់មួយចំនួនដើម្បីរុញច្រាននាវាកម្ពុជា ឱ្យសម្រេចបានចក្ខុវិស័យកម្ពុជាឆ្នាំ២០៥០គឺសេដ្ឋកិច្ចប្រជាពលរដ្ឋមានចំណូលខ្ពស់ ប៉ុន្ដែត្រូវតែជាសេដ្ឋកិច្ចមួយដែលមានភាពធន់ រឹងមាំ បរិយាប័ន្ន។ ភាពធន់មានន័យថា សេដ្ឋកិច្ចដែលមិនងាយមានអ្វីមានប៉ះពាល់បានទេ, រឹងមាំ មានន័យថា គ្មានឥទ្ធិពលអ្វីដែលងាយនឹងផ្ដួលរលំសេដ្ឋកិច្ចកម្ពុជាបានទេ និងបរិយាប័ន្ន មានន័យថា ការបែងចែកភាគផលដល់ប្រជាពលរដ្ឋប្រកបដោយសមធម៌។ កម្ពុជាជារដ្ឋមួយដែលរឹតម៉ឹង សុខសន្ដិភាព ស្ថេរភាពនយោបាយ នីតិរដ្ឋ មានយុត្តិធម៌សង្គម ឯករាជ្យម្ចាស់ការ អធិបតេយ្យភាព បូរណភាពទឹកដី មានកិត្យានុភាពខ្ពស់ នៅលើឆាកអន្ដរជាតិ ហើយស្មើភាព ស្មើមុខមាត់។
កម្ពុជាជាប្រទេសមួយដែលប្រជាពលរដ្ឋគ្រប់រូប ទទួលបានការគាំពារពីសង្គមគ្រប់បែបយ៉ាងទាំងអស់ នៅពេលដែលពួកគាត់មានបញ្ហា ដូចកម្មវិធីគោលនយោបាយ៦ចំណុច។ ជាប្រទេសមួយដែលមានបរិយាកាសល្អ បរិស្ថានបៃតង ប្រជាពលរដ្ឋសប្បាយរីករាយជាមួយបរិស្ថានល្អ។
ជាមូលធនមនុស្សដូចក្នុងជ្រុងទី១ នៃយុទ្ធសាស្ដ្របញ្ចកោណបានបញ្ជាក់ថា ការកសាងមូលធនមនុស្ស ជាធនធានមនុស្សដែលមានកម្រិតខ្ពស់ ហើយមានចំណេះជំនាញច្បាស់លាស់យ៉ាងតិចមួយ។ ជាមនុស្សដែលមានគុណធម៌ សីលធម៌ សុខភាពល្អ ឆន្ទៈការងារខ្ពស់។
ដើម្បីឈានសម្រេចបានទាំងស្រុងនូវមហិច្ឆតាទាំងអស់នេះ ក្រៅពីកិច្ចខិតខំប្រឹងប្រែងរបស់រាជរដ្ឋាភិបាលកម្ពុជា លោក ប៉ែន បូណា ក៏បានអំពាវនាវដល់ប្រជាពលរដ្ឋទាំងអស់ ត្រូវចូលរួមគាំទ្រដល់រាជរដ្ឋាភិបាល ដើម្បីទទួលបានជោគជ័យ៕៕ រក្សាសិទ្ធដោយ ៖ សុទ្ធលី