កណ្តាល ៖ យុវជនម្នាក់ មកចូលរួមពិធីសែនព្រេនឲ្យប្អូន តែបែរជាគាំងបេះដូងស្លាប់ភ្លាមៗ ពេលកំពុងហូបបាយ ហេតុការណ៍នេះ កើតឡើងនៅថ្ងៃទី៥ ខែសីហា ឆ្នាំ២០១៨ វេលាម៉ោង ១៥និង១៥នាទី នៅចំណុចភូមិកណ្តាល ឃុំកោះខ្សាច់ទន្លា ស្រុកស្អាង ខេត្តកណ្តាល ។
សេនាធិការ នគរបាលស្រុកស្អាង បានឲ្យដឹងថា ជនរងគ្រោះ ឈ្មោះខន ឧត្តម ភេទប្រុស អាយុ ២៥ឆ្នាំ ជនជាតិខ្មែរមុខរបរកម្មករធ្វើនំប៉័ង មានទីលំនៅៗភមិក្អមសំណរ ឃុំក្អមសំណរស្រុកលើកដែក ខេត្តកណ្តាល ។
តាមការបំភ្លឺឈ្មោះឆូត រ៉ាឈី ភេទប្រុស អាយុ ១៨ឆ្នាំ មុខរបរកម្មករដឹកនំបុ័ង មានទីលំនៅភូមិកណ្តោលកោះ ឃុំកោះខ្សាច់ទន្លា ស្រុកស្អាងខេត្តកណ្តាល បានឲ្យដឹងថា: នៅប្រហែលវេលាម៉ោង១៣ ឈ្មោះខន ឧត្តម(ជនរងគ្រោះ) បានសុំខ្លួនមកលេងក្នុងកម្មវិធីរៀបសែនព្រេន របស់ប្អូនខ្លួន លុះពេលមកដល់ម៉ោង កើតខាងលើឈ្មោះខន ឧត្តមបានអង្គុយហូបបាយ ហើយដើរទៅបន្ទប់ទឹក។ ពេលចេញពីបន្ទប់ទឹកវិញ បានឡើង ក៏ឡើងទៅលើផ្ទះ រួចបានហៅឈ្មោះ ផាន់ណា ឲ្យរកប្រេងកូឡាយកមកហឹត ឮដូចច្នេះឈ្មោះផាន់ណា បានយកប្រេងកូឡាទៅឲ្យឈ្មោះខន ឧត្តម ហឹត រួចកោសខ្យល់ និងនាំគ្នារិតដើមទ្រូងឲ្យ ភ្លាមនោះជនរងគ្រោះបានបែកពពុះមាត់ ពេលឃើញសភាពដូច្នេះ ក៏នាំគ្នាហៅឈ្មោះឧត្តម តែមិនឆ្លើយតប ហើយគ្នាលើកឈ្មោះឧត្តម មកដាក់លើគ្រែមុខផ្ទះ ហើយបាននាំគ្នាធ្វើចលនាឲ្យ តែមិនព្រមដឹងខ្លួនឡើយ ហើយឈ្មោះឧត្តម បានដាច់ខ្យល់ស្លាប់តែម្តងទៅ ។ បន្ទាប់មកបានរាយការណ៍ ទៅសមត្ថកិច្ចនគរបាលប៉ុស្តិ៍ ដើម្បីធ្វើការត្រួតពិនិត្យ ។
ក្រោយពីទទួលបានព័ត៌មានភ្លាម កម្លាំងជំនាញស្រុក កម្លាំងប៉ុស្តិ៍ ក្រុមប្រឹក្សាឃុំ មេភូមិ បានធ្វើការពិនិត្យ ឃើញថា: មានស្នាមកោសខ្យល់នៅផ្នែកខាងមុខជាច្រើនឆ្នូត ក្រៅពីនេះពុំមានស្លាកស្នាមអ្វីគួរឲ្យកត់សម្គាល់ឡើយ។
តាមការបញ្ជាក់អះអាងរបស់ឈ្មោះខន សុខា ភេទស្រី អាយុ ៣០ឆ្នាំ ដែលត្រូវជាបងស្រីបង្កើតរបស់ជនរងគ្រោះ បានឲ្យដឹងថា ជនរងគ្រោះកន្លងមក ធ្លាប់មានកើតជំងឺបេះដូងជាប្រចាំ ។
នគរបាលបានសន្និដ្ឋានថា ក្រោយពីជំនាញពិនិត្យសពឃើញថា ជនរងគ្រោះស្លាប់ដោយសារ គាំងបេះដូងពិតប្រាកដមែន៕ ដោយ៖បញ្ញាស័ក្តិ
