កំពង់ស្ពឺ ៖ ក្រុមចោរ៤នាក់ ដែលធ្វើសកម្មភាពឆក់ទ្រព្យសម្បត្តិរបស់ប្រជាពលរដ្ឋ ក្នុងទឹកដីក្រុងច្បារមន និងផ្សារកំពង់ស្ពឺត្រូវចាប់ខ្លួន និងបានបង្ហាញមុខជនសង្ស័យចំនួន ៤នាក់ ហើយកំពុងស្វែងរកចាប់ខ្លួនបក្ខពួកបន្ថែមទៀត។ លោកឧត្តមសេនីយ៍ទោ សម សាមួន ស្នងការនគរបាលខេត្តកំពង់ស្ពឺ បានឲ្យដឹងថា ជនសង្ស័យចំនួន ៤នាក់នៅថ្ងៃទី៥ ខែសីហា ឆ្នាំ២០១៨នេះ ត្រូវបានបង្ហាញមុខ ជាសាធារណៈ។
លោកស្នងការបានរៀបរាប់ថា មុខសញ្ញាសង្ស័យ ៤នាក់ពាក់ព័ន្ធករណីលួចដោយស្ថានទម្ងន់ ទោស(ឆក់កាបូប)ត្រូវបាននគរបាលការិយាល័យព្រហ្មទណ្ឌខេត្ដ ស្រាវជ្រាវបង្ក្រាបបានភ្លាមៗ ដកហូតសម្ភារៈ និងមធ្យោបាយប្រព្រឹត្ដបទល្មើស(ម៉ូតូ)។
សូមបញ្ជាក់ថា កាលពីថ្ងៃទី១ខែសីហាឆ្នាំ២០១៨ ម៉ោង២១ នៅតាមផ្លូវលេខ ១៤៤០ ស្ពានរលួស ស្ថិតក្នុងភូមិរលួស សង្កាត់ច្បារមន ក្រុងច្បារមន មានករណីលួចដោយស្ថានទម្ងន់ទោស(ឆក់កាបូប) ជនសង្ស័យ ២នាក់មិនស្គាល់អត្តសញ្ញាណជិះម៉ូតូDream ពណ៌ខ្មៅ ជនរងគ្រោះឈ្មោះ ឆេង លាងងីម ភេទស្រី អាយុ៥៥ឆ្នាំ នៅភូមិពាណិជ្ជកម្ម សង្កាត់រកាធំ ក្រុងច្បារមន ជនល្មើសជិះម៉ូតូតាមពីក្រោយជនរងគ្រោះ រួចធ្វើសកម្មភាពឆក់កាបូប តែម្ដងបណ្តាលឲ្យជនរងគ្រោះដួលម៉ូតូ បែកក្បាលជង្គង់ខាងឆ្វេង បាក់កដៃឆ្វេង(របួសធ្ងន់) សម្ភារៈក្នុងកាបូបរួមមាន លុយ ៣៥០០ ០០០រៀល អត្តសញ្ញាណប័ណ្ណ ១សន្លឹក លិខិតឆ្លងដែន ១ក្បាល កាតគ្រីម៉ូតូ៣ កាតATM លីហួ ១ ។ ក្រោយកើតហេតុ កម្លាំងជំនាញបើកកិច្ចប្រតិបត្តិការស៊ើបអង្កេត រហូតដល់ថ្ងៃទី០៤ ខែកក្កដា ឆ្នាំ២០១៨ បានស្រាវជ្រាវ និងឃាត់ខ្លួនជនស្ស័យចំនួន ៤នាក់ រួមមាន ៖១.ថុល ប៊ុនថៃ ប្រុសអាយុ ១៧ឆ្នាំនៅភូមិក្រាំងតារ័ត្ន ឃុំ ព្នាយ ស្រុកសំរោងទង បានដកហូតម៉ូតូ C125 ស៊េរី២០១៨ ពណ៌ខ្មៅស្លាកលេខ1L-1733(ម៉ូតូធ្វើសកម្មភាព)ជាអ្នកបើកម៉ូតូ ២.នៅ លីហៀង ប្រុស អាយុ ១៧ ឆ្នាំនៅភូមិខោប សង្កាត់រកាធំ ក្រុងច្បារមន(អ្នកឆក់) ៣.សេង ម៉េងសាន់ ប្រុស អាយុ ១៩ឆ្នាំនៅភូមិខោប សង្កាត់រកាធំ ក្រុងច្បារមន អ្នកបើកម៉ូតូបិទគូថ ៤.នង រុំ ប្រុស អាយុ១៨ឆ្នាំ នៅភូមិខោប សង្កាត់រកាធំ ក្រុងច្បារមន អ្នកជិះម៉ូតូបិទគូថ។
ករណីខាងលើ ជំនាញខេត្តកំពុងកសាងសំណុំរឿងចាត់ការតាមនីតិវិធី។
តាមចម្លើយសារភាព ពួកគេនៅមានគ្នារួមគំនិតផ្សេងទៀត កំពុងរត់គេចខ្លួន។ ពួកគេបានឆក់ជាច្រើនកន្លែងផ្សេងទៀត និងខេត្តផ្សេងទៀត ជាច្រើនករណីផងដែរ។ បច្ចុប្បន្នកម្លាំងសមត្ថកិច្ច បន្តស្រាវជ្រាវដើម្បីឃាត់ខ្លួនបក្ខពួក ដែលនៅសេសសល់៕ ដោយ៖បញ្ញាស័ក្តិ
