អាកាសយានដ្ឋានអន្តរជាតិសៀមរាបអង្គរ មានជើងហោះហើរជាមធ្យមចំនួន ៥០ជើង ទាំងទៅ និងមកជារៀងរាល់ថ្ងៃ

សៀមរាប៖ អ្នកទទួលបន្ទុកផ្នែករកក្រុមហ៊ុនយន្តហោះ នៃព្រលានយន្តហោះអន្តរជាតិសៀមរាបអង្គរ លោក ពេជ្រ សុប៉ុនតារា បានប្រាប់ក្រុមអ្នកសារព័ត៌មានថា ជារៀងរាល់ថ្ងៃ មានជើងហោះហើរជាមធ្យមចំនួន ៥០ជើងទាំងទៅនិងមក និងមានភ្ញៀវទេសចរប្រហែល ៥,០០០នាក់ក្នុងមួយថ្ងៃ ដែលមានការកើនឡើងប្រហែល ៥ភាគរយ បើប្រៀបធៀបនិងព្រលានយន្តហោះអន្តរជាតិសៀមរាបចាស់។ ​

លោកពេជ្រ សុប៉ុនតារា បានបន្តថា ព្រលាននេះ គឺធ្វើឡើង ដើម្បីទទួលភ្ញៀវទេសចរចំនួន ៧លាននាក់ក្នុងមួយឆ្នាំ ហើយដំណាក់កាលទី២ គឺ១០លាននាក់ក្នុងមួយឆ្នាំ ដោយបន្ថែមនូវជើងហោះហើរ។ លោក បានឱ្យដឹង នៅក្នុងឱកាសក្លឹបអ្នកកាសែតកម្ពុជា ដឹកនាំដោយលោកពុយ គា នាំក្រុមអ្នកសារព័ត៌មានប្រមាណជិត ៥០នាក់ មកពី ៣០ស្ថាប័នមាន ចិន វៀតណាម មកទស្សនកិច្ចព្រលានយន្តហោះ នាថ្ងៃទី១៥ ខែមីនា ឆ្នាំ២០២៤។

លោកពេជ្រ សុប៉ុនតារា បានបន្ថែមថា បច្ចុប្បន្ននេះ យន្តហោះនៃអាកាសយានដ្ឋានអន្តរជាតិសៀមរាប-អង្គរ គឺហោះទៅកាន់៦ប្រទស នៅក្នុងតំបន់អាស៊ានលើកលែងតែប្រទេសព្រុយណេ ភូមា ឥណ្ឌូនេស៊ី និងហ្វីលីពីនតែប៉ុណ្ណោះ។ ហើយក៏មានការហោះទៅកាន់ប្រទេសចិន និងកូរ៉េខាងត្បូងផងដែរ ខណៈជើងហោះហើរពីប្រទេសឥណ្ឌា នឹងមានក្នុងពេលឆាប់ៗនេះ។

ក្នុងឱកាសនោះដែរ លោកពេជ្រ ប៉ុនតារា បានលើកឡើងទៀតថា នាពេលខាងមុខ នឹងមានជើងហោះហើរថ្មីៗបន្ថែមទៀត ស្របពេលនឹងមានការលើកទឹកចិត្តជើងហោះហើរ ដែលកំពុងដំណើរការឱ្យបង្កើននូវការហោះហើរ ដោយទទួលបាននូវអត្ថប្រយោជន៍ផ្សេងៗទៀត។ លោក បានសង្ឃឹម និងជឿជាក់ថា ក្រុមហ៊ុនក៏នឹងមានគម្រោងបង្កើនជើងហោះហើរទៅកាន់អឺរ៉ុបនិងអាមេរិកផងដែរ។

សូមជម្រាបថា អាកាសយានដ្ឋានអន្តរជាតិសៀមរាប-អង្គរ បានចាប់ផ្តើមសាងសង់ កាលពីខែមីនា ឆ្នាំ២០២០ ដោយក្រុមហ៊ុន Angkor International Airport Investment (Cambodia) Co.,Ltd (AIAI) ក្រោមទុនវិនិយោគប្រមាណ១,១០០លានដុល្លារអាមេរិក ដែលជាការវិនិយោគ BOT (សាងសង់ ដំណើរការ និងផ្ទេរមកវិញ) ក្នុងរយៈពេល៥៥ឆ្នាំ។ ជាមួយគ្នានេះដែរ ព្រលានយន្តសៀមរាបអង្គរ ត្រូវបានកសាងឱ្យទៅជាលំដាប់ថ្នាក់ 4E សម្រាប់យន្តហោះធំៗគ្រប់ប្រភេទ ដែលអាចហោះឡើង និងចុះចតបាន លើកលែងតែយន្តហោះ Boeing ៧៤៧-៨០០ និងយន្តហោះដែលមានទំហំស្លាបលើសពី៦៥ម៉ែត្រប៉ុណ្ណោះ។ អាកាសយានដ្ឋានអន្តរជាតិសៀមរាប-អង្គរនេះ បានចាប់ផ្តើមបើកដំណើរការ ទទួលជើងហោះហើរលើកដំបូងជាផ្លូវការ នៅថ្ងៃទី១៦ ខែតុលា ឆ្នាំ២០២៣៕