សៀមរាប ៖ មានការផ្សព្វផ្សាយនូវរូបភាពវីដេអូមួយ ក្នុងផេកហ្វេសប៊ុក អំពីហេតុការណ៍ទាស់សម្តីគ្នាមួយ បានកើតឡើង រវាងភ្នាក់ងារទេសចរណ៍ ជាមួយក្រុមអាជ្ញាធរជាតិអប្សរា បន្ទាប់ពីមានអ្នកទេសចរណ៍ជនជាតិវៀតណាមមួយក្រុម ប្រុងនឹងធ្វើពិធីសាសនា តាមបែបសាសនារបស់វៀតណាម នៅក្នុងបរិវាណប្រាសាទអង្គរវត្ត ប៉ុន្តែត្រូវបានអាជ្ញាធរជាតិអប្សរា ហាមឃាត់។
ក្នុងហេតុការណ៍នេះ មានបុរសម្នាក់ដែលស្លៀកពាក់អាវភ្នាក់ងារទេសចរណ៍ (ហ្គាយ៍) ដែលនិយាយភាសាខ្មែរមិនច្បាស់ ដែលដឹកនាំក្រុមអ្នកទេសចរណ៍ជនជាតិវៀតណាមមួយក្រុមនេះ បានឈ្លោះប្រកែកជាមួយ ក្រុមអាជ្ញាធរជាតិអប្សរា អស់ជាច្រើននាទីផងដែរ ហើយទំនងគាត់ហាក់ដូចជាខឹងណាស់ ទាំងដឹងថាអ្វីដែលគាត់ធ្វើ គឺជាទង្វើដែលត្រូវបានហាមជាដាច់ខាត ពេលចូលទស្សនាប្រាសាទបុរាណរបស់ខ្មែរ ។ ក្នុងជម្លោះយ៉ាងតឹងសរសៃកនោះ បុរសម្នាក់ដែលស្លៀកពាក់អាវភ្នាក់ងារទេសចរណ៍ បាននិយាយថា ភ្ញៀវទេសចរវៀតណាម គេមកយកលុយមកឲ្យខ្មែរ ចុះហេតុអ្វីគ្រាន់តែធ្វើពិធីបួងសួងសុំសេចក្តីសុខសប្បាយនៅប្រាសាទអង្គរវត្តមិនបាន ហើយគេមកនេះគេលុយមកឲ្យខ្មែរ ហើយបើមិនឲ្យធ្វើប្រាប់ទៅភ្ញៀវវៀតណាមវិញទៅ គេនឹងទៅវិញហើយ។ ចំណែកការតពាក្យសម្តីគ្នាវិញ ក្រុមអាជ្ញាធរជាតិអប្សរា បានតវិញទៅបុរសនោះវិញថា ប្រាសាទអង្គរវត្តមិនមែនជាកន្លែងបូជាសាសនាសម្រាប់ជាតិសាសន៍ដ៏ទៃនោះ គឺសម្រាប់តែជនជាតិរបស់ខ្លួនតែប៉ុណ្ណោះ ទើបអាចធ្វើបាន ។ ភ្ញៀវទេសចរ អាចមកមើលនិងទស្សនាបានដោយសេរី និងគោរពទៅតាមច្បាប់ និងបទបញ្ជា ជាពិសេសភ្ញៀវទេសចរវៀតណាម ពេលមកទស្សនាម្តងៗ តែងតែមកអុកឡុក និងទាមទារធ្វើពិធីសាសនា ក្នុងបរិវេណប្រាសាទអង្គរវត្តរបស់ខ្មែរ ដែលច្បាប់ត្រូវហាមឃាត់។
ក្នុងនោះ មហាជនជាច្រើនបានគាំទ្រការទប់ស្កាត់របស់ អាជ្ញាធរអប្សរា ដែលធ្វើការបានល្អ សូមសរសើរដែលបានមើលការខុសត្រូវដោយយកចិត្តទុកដាក់ នេះជាគំរូដ៏ល្អមួយ ច្បាប់គឺច្បាប់ សូមឲ្យភ្ញៀវដែរមកត្រូវគោរពច្បាប់នៃប្រទេសយើងផង។ ទោះយ៉ាងណា ក្រោយពីមានការប៉ះពាល់ពាក្យសម្តីគ្នាមួយប្រាវ ក្រុមភ្នាក់ងារទេសចរណ៍បាននាំភ្ញៀវទេសចរវៀតណាម ចេញពីបរិវេណប្រាសាទអង្គរវត្ត៕ ដោយ៖បញ្ញាស័ក្តិ
