ភ្នំពេញ ៖ នគរបាលម្នាក់ ធ្វើការនៅកងអន្តរាគមន៍ពិសេស នៃអគ្គស្នងការដ្ឋាននគរបាលជាតិ បានបាញ់កាំភ្លើងខ្លីម៉ាកកា៥៤ ជិត១០គ្រាប់ ។ ការបាញ់នោះ ដោយសារដេកសុបិនឃើញមនុស្សដេញវាយគាត់ និងចាប់វះពោះ ទើបបានជាមមើរទៅទាញកាំភ្លើងបាញ់ នៅរសៀល ថ្ងៃទី៨ ខែសីហា ឆ្នាំ២០១៨ នៅចំណុចបន្ទប់ជួលជាន់ទី៣ ក្នុងភូមិព្រៃទា សង្កាត់ចោមចៅទី៣ ខណ្ឌពោធិ៍សែនជ័យ រាជធានីភ្នំពេញ។
មន្ត្រីនគរបាលឈ្មោះ កែវ សុផល អាយុ៤០ឆ្នាំ ស្នាក់នៅបន្ទប់ជួលជាន់ទី៣ ភូមិព្រៃទា បានប្រើប្រាស់កាំភ្លើងខ្លីម៉ាកា៥៤ បាញ់ជិត១០គ្រាប់ ហើយកាំភ្លើង ត្រូវបាន នគរបាលខណ្ឌពោធិ៍សែនជ័យ ដកហូត និងរកឃើញគ្រាប់កាំភ្លើងចំនួន៤គ្រាប់ រួមជាមួយសម្បកកាទូស្សជាច្រើនទៀត។
ប្រជាពលរដ្ឋនៅកន្លែងកើតហេតុ បាននិយាយថា គេបានឃើញបុរសរូបនេះ ឈរកាន់កាំភ្លើងនៅជាន់ទី៣ ក្នុងផ្ទះជួលខាងលើ បន្ទាប់មកស្រាប់បាញ់ឡើងលើ ជាច្រើនគ្រាប់តែម្ដង ដោយមិនដឹងមូលហេតុ។ ដោយភ័យខ្លាចមានគ្រោះថ្នាក់ ពួកគាត់បាននាំគ្នារត់ចូលក្នុងផ្ទះ។ បន្ទាប់ពីឃើញកម្លាំងនគរបាលខណ្ឌពោធិ៍សែនជ័យ ចុះទៅដល់នាំខ្លួនបុរសនេះ ទើបពួកគាត់ហ៊ានចេញក្រៅផ្ទះវិញ។ បើតាមការសួរនាំជាជំហ៊ានដំបូងនោះ មន្ត្រីនគរបាលរូបនេះ បាននិយាយថា មូលហេតុដែលគាត់បាញ់ជិត១០គ្រាប់យ៉ាងដូច្នេះ ដោយសារគាត់បានដេកសុបិនឃើញមនុស្សមួយក្រុមដេញវាយគាត់ និងចាប់វះពោះគាត់ ទើបបានជាមមើរទៅទាញកាំភ្លើងបាញ់ ។
នេះជាការឆ្លើយរបស់មន្ត្រីនគរបាលរូបនេះ ខណៈសមត្ថកិច្ចកំពុងសួរនាំនៅអធិការដ្ឋាននគរបាលខណ្ឌ៕ ដោយ ៖ បញ្ញាស័ក្តិ
