បាត់ដំបង ៖ ជនសង្ស័យម្នាក់ដែលលួចគាល់ព្រិលបង្អូចអង់តែនមិត្តហ្វូនលួចយកអាគុយ៤គ្រាប់ ហើយរត់គេចខ្លួនពីខេត្តកំពង់ចាមត្រូវបាននគរបាលចាប់ខ្លួន នៅខេត្តបាត់ដំបង ដោយតាមដីកាបង្គាប់ឲ្យចូលខ្លួនរបស់តុលាការខេត្តកំពង់ចាម។
នគរបាលស្រុកឯកភ្នំ បានឲ្យដឹងថា នៅព្រឹកថ្ងៃទី៨ ខែ សីហា ឆ្នាំ២០១៨ ដោយបានការអនុញ្ញាតពីលោក ឧត្តមសេនីយ៍ទោអ៊ុច សុខុនស្នងការនៃស្នងការដ្ឋាននគរបាលខេត្តបាត់ដំបង លោកឧត្តមសេនីយ៍ត្រី ជេត វណ្ណនី ស្នងការរងទទួលផែនព្រហ្មទណ្ឌបានដឹកនាំកម្លាំងជំនាញសហការជាមួយសមត្ថកិច្ចនគរបាល នៃអធិការដ្ឋាននគរបាល ស្រុកឯកភ្នំ អនុវត្តដីកាបង្គាប់ឲ្យចូលខ្លួនរបស់អយ្យការអមសាលាដំបូងខេត្តកំពង់ចាម ដោយធ្វើការឃាត់ខ្លួនជនសង្ស័យចំនួន១នាក់ ឈ្មោះ វិន រស់ ភេទប្រុស អាយុ៣៥ឆ្នាំ មានទីលំនៅ ភូមិព្រែកជីក សង្កាត់សំបួរមាស ក្រុងកំពង់ចាម ខេត្តកំពង់ចាម ដែលជនសង្ស័យរូបនេះ បានធ្វើសកម្មភាពលួចដោយមានស្ថាន ទម្ងន់ ទោស ប្រព្រឹត្តនៅមូលដ្ឋានក្រុងកំពង់ចាម ខេត្តកំពង់ចាមរួចគេចខ្លួន មកសម្ងំក្នុងភូមិសាស្ត្រ ស្រុកឯកភ្នំ ខេត្តបាត់ដំបង។
យោងតាមដីកា ស៊ន មុនី តំណាងអយ្យការអមសាលាដំបូងខេត្តកំពង់ចាម បានឲ្យដឹងថា ជនសង្ស័យបានប្រព្រឹត្តបទល្មើស លួចមានស្ថានទម្ងន់ទោស (គាល់ព្រិលបង្អូចអង់តែនមិត្តហ្វូនយកអាគុយ៤គ្រាប់) កាលពីចន្លោះថ្ងៃទី១៣ ខែកក្កដា ដល់ថ្ងៃទី១ ខែសីហា ឆ្នាំ២០១៨ នៅចំណុចក្រោយផ្ទះរបស់ឈ្មោះ ជឹម គឹមហ៊ី ស្ថិតនៅភូមិព្រែកជីក សង្កាត់សំបួរមាស ក្រុងកំពង់ចាម ខេត្តកំពង់ចាម ។
ដីកាបង្គាប់បញ្ជាឲ្យជនសង្ស័យចូលបង្ហាញខ្លួននៅអយ្យការអមសាលាដំបូងខេត្តកំពង់ចាម ។ បង្គាប់មកលោកស្នងការនគរបាលខេត្តកំពង់ចាម ត្រូវអនុវត្តដីកានេះ ឲ្យបានសម្រេច ។
បច្ចុប្បនជនសង្ស័យ បានប្រគល់ជូនសមត្ថកិច្ចនគរបាលខេត្តកំពង់ចាម ចាត់ការតាមនីតិវិធី ដែលជាម្ចាស់ដើមបណ្តឹង៕ ដោយ៖កូឡាប