ខេត្តស្វាយរៀង ៖ យុវជនម្នាក់ជាជាងជួសជុលរថយន្តបានផឹកស្រាជាមួយគ្នាហើយបានខឹងរឿងជនរងគ្រោះនិយាយបង្អាប់ថាធ្វើឡានមិនល្អអោយ ស្រាប់តែជនសង្ស័យខឹងស្ទុះទាញបានខ្វែវយកមកកាប់លើជនរងគ្រោះជាអ្នកហៅម៉ូយជិះឡានបណ្តាលឱ្យរងរបួសធ្ងន់តែម្តង។ ហេតុការណ៍នេះបានកើតឡើងកាលពីវេលាម៉ោង២០ និង១៥នាទី យប់ថ្ងៃទី ៩ ខែ សីហា ឆ្នាំ២០១៨ស្ថិតក្នុងភូមិព្រៃឆ្លាក់សង្កាត់ព្រៃឆ្លាក់ ក្រុងស្វាយរៀង ខេត្តស្វាយរៀង។
បើយោងតាមសមត្ថកិច្ចបានឲ្យដឹងថា ៖ ករណីហឹង្សានេះបង្កឡើងដោយជនសង្ស័យឈ្មោះ ព្រំ សុផាត ហៅ ឌឿ ភេទប្រុស អាយុ ២២ឆ្នាំ មុខរបរ ជាងជួសជុលរថយន្ត រស់នៅភូមិព្រៃឆ្លាក់សង្កាត់ព្រៃឆ្លាក់ក្រុងស្វាយរៀង បានធ្វើសកម្មភាព យកខ្វែវ (ឧបករណ៍សំរាប់ច្រូតស្មៅ ) កាប់ទៅលើជនរងគ្រោះឈ្មោះ នឹម ជុន ភេទប្រុស អាយុ ៣៨ឆ្នាំ មុខរបរជាអ្នកហៅម៉ូយតាក់ស៊ីមានទីលំនៅភូមិព្រៃឆ្លាក់សង្កាត់ព្រៃឆ្លាក់ក្រុងស្វាយរៀង បណ្តាលអោយរងរបួសម្រាមដៃ កដៃខាងឆ្វេង និង ធ្លាយពោះផ្នែក ខាងឆ្វេង របួសធ្ងន់ បញ្ជូនទៅសម្រាកព្យាបាលនៅមន្ទីរពេទ្យភ្នំពេញ។
ប្រភពដដែលបានឱ្យដឹងទៀតថា ៖ មូលហេតុនៃអំពើហឹង្សាបង្ករបួសស្នាមខាងលើនេះបណ្តាលមកពី ស្រវឹងស្រាទាស់ពាក្យសំដីគ្នា ពីរឿងជួសជុលរថយន្តមិនស្អាត ។ហើយបច្ចុប្បន្ន ជនសង្ស័យឈ្មោះ ព្រំ សុផាត ហៅ ឌឿ ត្រូវបានឃាត់ខ្លួននៅ អធិការដ្ឋាននគរបាលក្រុងស្វាយរៀងដើម្បីចាត់ការបន្តតាមនិតិវិធីច្បាប់ ៕ វ៉ៃកូ
